نصف لتر حليب عليهم عضمتين و2 مغارف زيت وتركض وتزيد الفرينة بالشوية حتى تختار مش برشا ومش جارية واطيب الكراب الوجه الاول وكيف تقلب تحط الهريسة والجبن والعضم والتن وتلمها وتسكرها

مفيدة حمزة

قلاية علوش بالطماطم

تقطع اللحم جويد وتحطو يغلي في الماء والزيت ومغرفة كركم حتى قريب يطيب زيدو مغرفة قهوة صغيرة طماطم معجونة وفلفل أكحل وكروية وكعيبة بطاطا وخليها تطيب لين تخثار وتقر زيتها فقر عضيمة كان تحب وسربي في الصحنات  ممكن البطاطا ترميها تطيب في المرق أو تقليها مع قرين فلفل وماتنساش رشة معدنوس

muffin au escalope de poulet

تحط سكالوب دجاج مقطع جويد في شوية ماء وزيت وبصلة وتخليه يغلي وتفوحو بالملح والكركم وتابل وكروية وفلفل أكحل واكليل وشوية زنجبيلوكيف يشيح ويطيب زيدو مغرفة معدنوس مقطع وشوية كرام فراش وطابع جبن مثلثات وجبن قرويار وبطاطا مقطعة جويدة ومقلية وتخلّطهم بالباهي وتزيدهم 4 بيضات و بيضة مصموتة وتدهن المول بيراكس الخاصين بالفرن بالزيت وتسخنهم وبعد تحط فيهم الخليط وتزيد شوية فلفل بر العبيد وحلقات زيتون كان تحب وتحطهم يطيبو في الفرن وتعمل معاهم أي حاجة سريعة

سردينة محشية مع صوص طماطم

تنظف السردية بالباهي وتنحيلها السلسول متاعها  وبعد تاخو كعيبات تصمتهم وفي مقلة تسوتس بصلة وتزيدها حفنة معدنوس وبعد تسبل السردينة إلى صمتها وتحطها فوقها وتفوح بالملح والفلفل الاكحل وشوية بالكل كمون وفلفل مرحي وتزيد عضمة و2 مغارف فرينة وتخلطهم بالباهي وتبسط الخليط فوق الكعاب إلي تكون فوحتهم بالملح والفلفل الاكحل -أنظر الصور  – وبعد تلف الكعيبات في الفرينة وتقليهم في زيت كثيف وعلى نار هادية

بالنسبة للصوص : تصمت الطماطم وترحيه وبعد تقليه في شوية زيت وتزيدو ملح وفلفل أكحل وشوية ثوم وفلفل مرحي ورشيشة كروية وفلفل مرحي وشوية ماء للغلو وكيف تطيب طفي عليها

ممكن تقلي رشة بطاطا وفلفل وتزين الصحنات وتأكلو بالشفاء

عجة بالشوفرات

تنظف الشوفرات بالباهي وبعد في طنجرة تحط 3 كعيبات طماطم وزيت و4 سنات ثوم مقطعين جويدات وتقليهم بالباهي وتزيدهم نصف مغرفة ماكلة طماطم معجونة ونصف مغرفة هريسة دياري وكيف يطيبو بالباهي زيدهم الشوفرات ودوبما تغلي مع رشة ماء موش برشا زيد ملح وكركم وفلفل أكحل وشوية كروية وقرين فلفل أخضر مقطع وفقر العضم

الشوفرات مافيهاش روح ماتغليش برشا وفيسع تسيب فيحتها وتأكلو بالشفاء

اليويو التونسي

روسات

نصف كأس صغيرحليب أي  50مل
مبشور ليمون
بيضتان 

أربع ملاعق سكر محوّر
كيس فانيليا
نصف كاس صغيرزيت أي 50 مل

الطريقة :
في وعاء 

 خلط المكونات بالخلاط زيت مع بيض مع مبشور الليمون مع سكر مع فانيليا جيدا، وإضافة كيس خميرة مغربل مع فرينة مغربلة قدر الحاجة اي حتى تتلم العجينة ، لازم تكون العجينة رطبة وموش يابسة باش تسهال وتفوج بالباهي
الزيت للقلي يكون كثيف وعلى نار هادئة
ملاحظة: في الصنع استعملي الفرينة، وضعي العجينة في كيس بلاستيكي غذائي لترتاح
كعبري كعبورة في اليد ثم أخدثي فيها ثقبا صغيرا وأرميها في الزيت ( طريقة سريعة هههههههه)
بالنسبة للعسل:
كيلو سكر تحطلو 2 كيسان ماء ويبقى يغلي لين تحسو ولاّ لزج صبلو 2 مغارف عطرشاء وخليه يغلي وبعد كيف قريب ييبس يعني يعمل كعبورة بين الصوابع زيدو 2 مغارف قارص ودوبما يهز الغلو وأطفي
حاولي ماتعسلش الكل مع بعضو عسل قدر الاستعمال

ملوخية

غلي الماء في طنجرة
وفي طنجرة ثانية صب بزايد زيت زيتونة وحل فيه الملوخية وبعد حطها على نار هادية ودوبما تشكشك صب عليها الماء إلى يغلي وخليها على نار هادية تشكشك لين تخرج فقعات زيت ومن حين لآخر حرك ( 2 ساعات على الاقل )
تأخو اللحم وتفوحو بكعبة طماطم خضراء ومغرفة صغيرة طماطم معجونة وبالتابل والكروية ورأس ثوم مهرس وفلفل مرحي وفلفل أكحل ووريقات رند ورأس بصل وملح وقرينات فلفل احمر شايح وتخليه يبنان في الثلاجة لين قريب تطيب الملوخية ويتنحى التلعبين متاعها
تحط اللحم المفوح في الملوخية ومن الاحسن تخليها تشكشك على الكانون أونار هادية حتى تطيب وتقر زيتها ومن حين لآخر حرك
الملوخية تحبلها على الاقل 5 ساعات على النار الهادية أو كانون حامي

حلقات الفلفل المحشية

الحشو :
لحم مفروم وبصل طيبهم وزيدهم معدنوس وملح وفلفل اكحل وكركم وشوية تابل وجبن وكبار وبيضة مصموتة وبيضة نية وبطاطا مقطعة جويدة برشا ومقلية
وكيف تقلبها في المقلة رش فوندون وزيد كبار ورشة معدنوس

شكشوكة بيتنجال صبفية

تقطع البيتنجال وتحطها في الزيت تتقلى وفوقها الطماطم وراس ثوم مقطع جويد وغطيهم وخليهم يتقلاو زيدهم مغرفة قهوة طماطم معجونة وملح وكيف تطيب الطماطم ارمي الفلفل المقطع ومايغليش برشا ارمي الكروية المرحية وشوية فلفل مرحي ورش عليها شوية ماء وحرك
واخيرا فقر العضم وخليه مروب
اقلي الفلفل بعدما تحشيه بالملح والكروية
وسربي الصحنات