كسكسي باللحم

تقلي اللحم مع بصلة وفلفل اكحل وملح وتزيد الطماطم معجونة والفلفل احمر والحمص وتمرق بالماء وكيف قريب يطيب اللحم حط الخضرة بطاطا وسفنارية

ابتسام بوعزيز

سابليه الدمعة

تاخو 300 غ زبدة حيوانية بحرارة الغرفة وزيدهم 100 غ زبدة جديدة و 200 غ سكر محور تخلطهم بالباهي وبعد زيدهم 4 بيضات واحدة واحدة وخلط وزيد 1 فانيليا وزيدهم 150 غ نشا ونخلط بالباهي حتى تتحصل على خليط كريمي وبعدين نغربل كغ فرينة ( ممكن أقل حسب نوعية الفرينة يحيث ما تكونش يابسة
وزيدهم 2 خميرة وخليها ترتاح ساعة وبعد اصنع عادي
خوذ شوية من العجينة وزيدها اي ملون تحب عليه واصنع بيها زهرات وزين الكعاب كيما تحب
وكيف يطيب لصقهم بمعجون المشمش

كيكة المرمر

أربعة عضمات عليهم كاس سكر تركضهم وتزيدهم كاس حليب وكاس زيت ومغرفة خل ابيض وباكو فاني وفي الاخر ثلاثة كيسان فرينة وباكو خميرة وتحط في قالب الكايك وتخلي شوية من الخليط تزيده مغرفة كاكاو وتصب من الفوق وكيف تطيب تغلفها بالكرام شانتي وتصب فوقها شكلاطة ذائبة وتمشيها بالمغرفة تعطي الشكل اللي تشوف فيه

مفيدة حمزة

بسكوي بالزبدة

250غ زبدة طرية و200غ سكر و باكو فانيليا تركضهم حتى يوليو كيف الpommade و تزيد بيضتين بالكعبة بالكعبة و انت تركض و تزيد شوية لوز مرحي ارطب موس ياسر مقدار مغرفتين و قطرة روح اللوز اختياري و تلم بالفرينة600 غ تقريب و باكو خميرة و تحط العجينة في ساجي في الثلاجة ترتاح ربع ساعة و بعد تاخذ بالكعبورة و تحطها بين ورقتين متاع فرن و تحل بالقلقال تخليهم خشان شوية خاطر موش باش تحطو كعبتين على بعضهم و تحط في طبق الفرن فوق ورق الفرن و تطيبهم على 170درجةمدة ربع ساعة ت بعد ما يبرد نرشو شوية سكر محور

كلثوم

عصيدة بالرُب

خوذ 2 كيسان ماء خليهم يغلو شوية و نص ملعقة صغيرة ملح وزيت زيتون تقريبا نص فنجان
وبعد الغليان نحي منهم كأس  اللي كيلت بيه   وخليها ع جنب 
تعالي انت هبط طنجرتك وحطي كأس سميد رقيق وطوووول ابدي حركي بالطريقة المعروفة باش يكعبرش الدقيق
حط طنجرتك عالنار وصبي الكأس  اللي خليته ع جنب وماتحركها ولكن قسمي العجينة بالمغرفة ع أربع وخليها تغلي باش يطيب الدقيق ع نار متوسطة ليين تشوفي الماء نزح لكن مش نهاااائي تشوفها خثرت برشا ابدا حرك
نزليها وزيد اثردها وكوري في صينية لوح أفضل باش تجييك مسبوكة وهدا السر ياغالية
وما تنساش زيت الزيتون باش تملسي بيه ويعطي لمعة

 

سابليه بالكاكاو

4بيض ،200 غ سكر ،150زيت نباتي 1فنيليا ،1 خميرة قاتو،650 الى 700 فرينة
تخلط البيض والسكر وتزيد الفنيليا والزيت والفرينة والخميرة تخلطهم مليح وبعد تقسمها على 2 وحدة تخليها بيضة والثانية تزيدها 2مغارف كاكاو البات هذي مش لازم تخليها ترتاح تنجم تخدمها و تشكل بيها اي نوع بسكوي و تنجم تخليها في الثلاجة تخدمها وقت ما تحب تعمل بيها الاشكال الي تختارها و تطيبها في فرن 180 د 15 دق

نزهة

شكشوكة شتاء

تقطع 4كعبات بطاطا مكعبات و تقليهم في الزيت كيف يتقلاو تزيد عليهم الطماطم اخضر مقطع و 2سنون ثوم و كروية وشوية ملح و تخليهم يتقلاو و تزيد قرون فلفل مقطعين وبعد تزيد مغرفة طماطم معجون و تمرقها شوية موش برشة و تخليها تكشكش ما تخليش الفلفل يطيب برشة و ما تشيحش تفقر 4كعبات بيض كيف يطيبو تطفي و تاكل بالشفاء

نزهة

مصلي باللمبوكة

تفوح الحوت بفلفل اكحل ،كركم ،ملح ،تابل،2سنون ثوم مهرسين ،بعد تسخن شوية ماء و تحط فيها شوية زيت و ملح 2مغارف طماطم ،فلفل اكحل ،تابل ،فلفل مرحي و تحط الحوت في بلاتو و تصب عليه الماء الي فوحتو و تقص بصل و سنون ثوم مقطعين و 3 كعبات طماطم تقصهم دوائر و 4 قرون فلفل و بطاطا مقصوصة ترصفهم الكل في البلاتو و تدخلو للفرن و تخليه يطيب كان نقص المرق تزيد شوية و كيف قريب يطيب ترش رشة معدنوس و تحط رندالات قارس و تخرجو و تاكل بالشفاء

نزهة

يويو

5عضمات 5مغارف سكر 5مغارف زيت باكو فانيليا بشر برتقالة و تركضهم و بعد تزيد الفرينة و باكو خميرة قاطو و تلم العجينة حتى تصبح لينة بلاش كيل الفرينة بالعين تحطها ترتاح ربع ساعة و تحل بالشوية بالقلقال و تشكل بقالب او بكاس تاي و تعمل ثقب و تقلي في زيت كثيف و بعد تشحرو (الشحور كاس و نصف سكر و كاس و نصف ماء تحطهم يغليو على نار ضعيفو و تعصر نصف قارصة و قت يولي سطحه بالفقاقيع تطفي)

كلثوم

قاتو بالبوفريوة

اربعة عضمات تركضهم مع 12 مغرفة سكر وباكو فاني ومن بعد تزيدهم 125 غ زبدة ذايبة وكاس حليب وفي الاخر 12 مغرفة فرينة وباكو خميرة وبعدما تطيب تقصها في 2 او 3 انت وكبر الخبزة انا قصيتها في 3 علي خاطر الفورمة صغيرة وجاتني عالية وتسقي الطبقة الاولي بشحور خفيف او حليب او اى نوع من العصير وتحط كرام شانتي مركوض مع شوية زبدة وروح البوفريوة وبوفريوة مرحية تجي بنينة برشا وبعدما تستويها تحط عليها الطبقة الثانية وتسقيها كيف العادة وتحط المرام شانتي اما مع شكولاطة تارتين باش يتبدل اللون وتولي عندك طبقة بطبقة وبعدما تستوبها تحط الطبقة الثالثة وتسقيها وتحط الكرام شانتي اللي بالبوفريوة يعني اللون الابيض وتحط الطبقة الاخيرة واذا كان الخبزة جات منفوخة شوية من فوق حاول تنزع بسكينة هاك الزايد باش تكون مستوية من فوق وتغلفها بالكرام شانتي عادي يعني من غير بوفريوة وتعمل القلاساج اللي هو 125غ ماء و225غ سكر تغليهم عللي النار ومن بعد تزيدهم حكة كرام فراش و30غ كاكاو يغليو مدة 20دقيقة وتخليها تبرد شوية وتصبها فوق الخبزة باش تعطي هاك البرقة 😍

مفيدة حمزة

😍

buche

تركض 5 بيضات 5 مغارف سكر و باكو فانيليا و تزيد 5مغارف فرينة و شطر باكو خميرة او شوية جيلك و تصب الخليط في طبق الفرن مفروش بورق الزبدة و تطيبها ربع ساعة و بعد تروليها في منديلة مندية و تحطها تبرد و بعد تحلها و تطليها بكريمة الزبدة او كرام شانتيي و ترش بوفريوة و تعاود تروليها و تغلفها بقاناش و تخربشها بفرشيطة باش تظهر كيف الحطب و ترش سكر ارطب مثل الثلج و ترش فستق و تتفنن في الزينة

كلثوم