قاتو الجوكاي

تاخو 4بيضات وتكيل بكعبة الجوكاي فارغة 2 سكر و 1فانيليا وتركضهم حتى تتحصّل على خليط كريمي وتزيد محتوى كعبة الجوكاي و1 حليب و 1 زيت نباتي أو زبدة وتغربل 3 فرينة و 1 خميرة قاتو وتخلطهم برفق وتصبهم في المول متاع الفور إلى تكون مدهونة بالزبدة والفرينة مسبقا وأنا بقى عندي الخليط صبيت في حاويات صغار وتطيبها في الفور على 180 د وتحضر القاناش 200غ شكلاطة مع 50غ زبدة مع حكة كرام فراش وتذوبها في حمام مائي وتزين خبزتك كيما تحب

قاتو الطبقات

طبقة الكيك
3بيضات كاس غير ربع سكر 1فانيلية نصف كاس حليب ونصف كاس زيت نباتي كاس فرينة ملعقتين كاكاو ملعقة اكل خميرة قاطو
الحشوة
250غ كرام شانتي مع كاس ماء او حليب انا عملت حليب تركضهم تزيدهم 2 ياغرت طبيعي انا زدتها كعبة جوكي جبن طازج وملعقة عسل طبيعي نقصم الخليط على 2نزيد لواحد منهم 120غ شكلاطة انا عملت مايسترو مذوبة نخلطه ونخليه على جنب
بعد ما الكيك يطيب يبرد شوية نسقيه بكاس حليب نخليه يبرد تماما بعد نصب الخليط الابيض ونحله بعد فوقه الخليط بالشكلاطة وخليها نصف ساعة في الفريجو نذوب 120غ شكلاطة اخرى من نفس النوع الاول ونزيدها كاس حليب وناخذ ملعقة اكل جيلاتين بودرة نزيدها 7ملاعق ماء عادي نحله مليح ونزيد للشكلاطة وهي سخونة نخلط ملح بعد نخرج الكيكة من الفريجو ونصبها كطبقة اخيرة ونجعها للفرجو 10دق بعد تاكل بالشفاء
ملاحظة كل واحد ونوع الشكلاطة الي يحبذها انا كان اجتهاد مني زدت ياغرت جبن طازج جوكي لزيادة النكهة وملعقة نوتيلا لطبقة الشلاطة الاخيرة

سندس مساعد

 

قاتو بالغلة

القاتو: تأخو 3 بيضات وكأس ناقص سكر و1 فانيليا وذرة ملح وتركضهم حتى تتحصل على خليط كريمي وزيد 2 ياغورت طبيعي وكاس ناقص زيت نباتي  و2 كيسان فرينة مغربلين مع 1 خميرة خلط الكل بالباهي وبعد طيبها في الفرن على 180 ° وكيف تطيب خليها تبرد وحضر كريمة البرتقال : 3 كعبات برتقال معصورين وتزيدهم كأس ماء و 3مغارف نشاء ومغرفة سكر وتطيبهم وبعد صبهم على القاتو ، وكيف تبرد الكريمة وتيبس قصها وبعد زينها بالغلة الموجودة عندك وادهنها بالناباج وتأكلو بالشفاء

 

قاتو بالدقلة

تاخو 3 مغارف دقلة مرحية حطهم في كاس حليب وسخنهم توا يتحلو وخليه يبرد
تركض 4 بيضات و4 مغارف سكر محور وكيس فانيليا حتى يولي الخليط لزج ومتماسك
زيدهم 350 غ فرينة مغربلة وكيس خميرة كيميائية
صب على الحليب نصف كاس زيت نباتي وخلط الكل وحط في الفرن على 180 °
كيف تخرجها سخونة ادهنها بالناباج وبعد 10 دق رش على القاتو جوز الهند وبعد قصها

خوذ شطرات دقلة وادهنهم بالناباج وزين القاتو متاعك

 

 

 

 

قاتو البرتقال

تحضر 2 كيسان دورالكس فرينة مغربلة ومعاها 1 خميرة قتو وتخلطهم
تقشر كعبة برتقال وترحيها كاملة مع كاس ناقص زيت و2 كعبات ياغرت
وفي معجنة التركيض حط 5 بيضات وكاس سكر و1 فانيليا وركضهم بالباهي حتى يولي الخليط ابيض كريمي زيدو باقي المكونات بالشوية وخلط الكل وطيبها على 180°
تاخو نصف لتر عصير قارص او برتقال وزيدو مغرفة سكر و2مغارف نشاء وطيبهم على نار هادية
كيف تطيب الخبزة صب عليها كريمة البرتقال
وخليها تبرد ساعة في الثلاجة
حضر الغلة الي عندك
قص الخبزة كيما تحب
وزينها
واخيرا ادهن الغلة بالناباج وقدمها لضيوفك

وتاكلو بالشفاء

قاتو عيد الميلاد

تاخو 400غ زبدة وتحركها بين صوابعك حتى تولى بوماد pomade و في وعاء اخر 5 اصفر بيض بحرارة الغرفة
تجهز 400غ سكر مع كاس ماء وتحطهم يغليو حتى يولى عسل ويكون كعبورة بين صوابعك ما يكونش يابس برشا ولا سائل وبخرارة بين 116 و 125 درجة وبع ابدا ركض اصفر البيضوصب العسل في شكل خيط وركض يكون سالل في البداية وكلما يبرد يزيد ييبس وكيف يكمل العسل الكل يكون الخليط بارد زيد الزبدة بالشوية بالشوية حتى يتجانس الخليط الكل
ممكن تزيد الخليط شكلاكة او نسكافيه او خليه عادي وخليه يبرد في الثلاجة لحين تزيين القاتو
الجينواز :
تاخو 8 بيضات بحرارة الغرفة و 8 مغارف سكر مليانين وكيس فانيليا وتركضهم بالباهي حتى تتحصلي على خليط كريمي وبعد صب عليهم نصف كاس زيت ونصف كاس حليب وغربل 8 مغارف فرينة و2 مغارف نشاء و1 خميرة قاتو وخلطهم مع بعض وبعد صبهم على الخليط مع الحليب والزيت وحرك برفق
استعملت قوالب مربعة وفي القاع افرش ورق الزبدة
طيب على 180° وشعل عليه الفرن من فوق
شكل الجينواز كيما تحب
تقص الجينواز على 2 وتعمل خليط ماء وسكر وتبل بيه طبقة الجينواز وبعد تدهنها بالكرام الزبدة وترش الفاكية المقلية ثم الطبقات الباقية بنفس الطريقة
واخيرا تدهن القاتو الكل بكرام الزبدة وتعمل قاناش
القاناش :

200غ شكلاطة و حكة كرام فراش و 50غ زبدة وتذوبهم في حمام مائي وخليهم يبردو شوية وتصبهم على القاتو

قاتو بالفرنبواز والبرتقال

القاتو:
4 بيضات ياغرتة سكر
1 فانيليا
مبشور ليمونة
تركضهم بالباهي وتخلط ياغرتة وياغرتة حليب وياغرتة زيت وتزيدهم للخليط واخيرا 3 ياغرتات فرينة مغربلين ومعاهم 1 خميرة قاتو
خلط الكل برفق
طيبها في الفرن على 180 °
وكيف تخرجها من الفرن اسقيها بكاس صغير حليب 50 مل
الكريمة :
نصف لتر حليب
كيس كريمة فانيليا
1 فانيليا ومغرفة قهوة نشاء
ومغرفة ماكلة سكر
تطيبها على نار هادية
وبعد زيدها كيف تطيب 50غ زبدة وحرك بالباهي حتى تذوب وويولي عندك خليط متجانس
صب الكريمة على القاتو الطايبة وزينها بشوية شكلاطة
نظف الغلة وزينها فوق القاتو وبعد زيدها ناباج باش تحافظ على بريقها ونضارتها
وقسمها كيما تحب وتاكلو بالشفاء
انا نقصت في كمية السكر باش ماتكونش قوية