خبزة برتقال مع العصير

العصير : حط كعبة برتقال طمسن و زوز كعبات قارص في الكنجلاتور و يباتو على الأقل ليلة و هبطهم قصهم طروف صغار و حاول تنحي القلوب الكل و ارحيهم بالميكسور و صفيهم ب 3 ليتر من الماء و زيد سكر حسب الحاجة و بالشفاء
طريقة خبزة البرتقال: ترحي برتقالة كاملة بعد ما تنحي القلوب ارحيها مع كعبة ياغرت نكهة السيترون و ركض 6 بيضات و 8 مغارف أكل سكرخلط الخليط الأول و الثاني مع بعضهم و زيد1/2ياغرتا زيت قطانيا و 250غ فرينة و تنجم بالعين تحط الفرينة حتى تتحصل على خليط خاثر موش عاقد ياسر و باكو و نصف خميرة قاطو و خلط الكل مليح و سخن الفرن و طيبها25دق على 180 درجة

كلثوم

مرقة لوبيا بالدجاج

تغسل لحم الدجاج بالماء والليمون القارص و تخليه يتبل بشوية ملح و فلفل اكحل و كركم و شوية تابل و كروية وسنتين ثوم و راص بصل مقطع على 4 و بعد تقلي راس بصل في الزيت و مغرفة طماطم مع الدجاج المفوح و تمرق شوية ماء وتخلي يتقلى 10 دق و تزيد فلفل احمر و تمرق و تخليه يطيب و في نصف الطباب ترمي كعبات بصل صغير اما اللوبية تنجم تطيبها وحدها في الماء و تضيفها في الآخر

كلثوم

مسلة مقلية من بحرها

لازم الفاح متاعها موش برشا : شوية ملح وشوية كمون وتابل مفوح وتقليها

قاتو البرتقال

تحضر 2 كيسان دورالكس فرينة مغربلة ومعاها 1 خميرة قتو وتخلطهم
تقشر كعبة برتقال وترحيها كاملة مع كاس ناقص زيت و2 كعبات ياغرت
وفي معجنة التركيض حط 5 بيضات وكاس سكر و1 فانيليا وركضهم بالباهي حتى يولي الخليط ابيض كريمي زيدو باقي المكونات بالشوية وخلط الكل وطيبها على 180°
تاخو نصف لتر عصير قارص او برتقال وزيدو مغرفة سكر و2مغارف نشاء وطيبهم على نار هادية
كيف تطيب الخبزة صب عليها كريمة البرتقال
وخليها تبرد ساعة في الثلاجة
حضر الغلة الي عندك
قص الخبزة كيما تحب
وزينها
واخيرا ادهن الغلة بالناباج وقدمها لضيوفك

وتاكلو بالشفاء

كسكسي شمسي باللفت

نقطع حزمة لفت ومعاها الرؤوس نقشرهم ونقطعهم و 2 حزم سلق بالطبع بعد غسلهم
ونزيدهم كاس حمص مبلول وكاس فول مقشر ومبلول ونصب عليهم ل3لترات ماء ماجل ونخليه يغلي وكيف قريب ينزح نفوحو : 2 كعبات طناطم خضراء ومغرفة طماطم معجونة ومغرفة هروس فرشك ومغرفة فلفل مرحي وملح و2 رؤوس ثوم مهرسين مع تابل وكاس زيت ونخليه يغلي حتي ينزح نزيدو قرينات فلفل ملاحي ونخليه يشكشك حتى يقر زيتو وينزح تماما
انا الحقيقة يعجبني القرانيت على خاطر اللفت ينزح وما يلصقش وزيد ماتبزعوش الماء متاعو الفائدة الكل فيه
تفور كسكسي شمسي بعدما تبلو بشوية ماء وزيت تفويرة اولى وثانية وبعد حطو في الصحنات وحط عليهم لفت وخلطو بالباهي ويكون سخون وتاكلو بالشفاء

Canapé au ton

تقص حلقات خبز ( أي نوع تختارو ) وانا نفضل أنه يكون بايت ومن غير ما تدخلو للفرن باش يبقى طري متدهن بهريسة وبعد تعمل خليط متكون من : مايونيز ونصف كعبة أفوكاتو و 2 جبن مثلثات وعضرة قارص وشوية فلفل أكحل ومغرفة فريدو وذوق الملح كان نافص زيد شوية وارحيه وبعد حطو فوق الخبز وزين بالجبن cornichon والتن والماييس والكبار وألي عندك

قاتو عيد الميلاد

تاخو 400غ زبدة وتحركها بين صوابعك حتى تولى بوماد pomade و في وعاء اخر 5 اصفر بيض بحرارة الغرفة
تجهز 400غ سكر مع كاس ماء وتحطهم يغليو حتى يولى عسل ويكون كعبورة بين صوابعك ما يكونش يابس برشا ولا سائل وبخرارة بين 116 و 125 درجة وبع ابدا ركض اصفر البيضوصب العسل في شكل خيط وركض يكون سالل في البداية وكلما يبرد يزيد ييبس وكيف يكمل العسل الكل يكون الخليط بارد زيد الزبدة بالشوية بالشوية حتى يتجانس الخليط الكل
ممكن تزيد الخليط شكلاكة او نسكافيه او خليه عادي وخليه يبرد في الثلاجة لحين تزيين القاتو
الجينواز :
تاخو 8 بيضات بحرارة الغرفة و 8 مغارف سكر مليانين وكيس فانيليا وتركضهم بالباهي حتى تتحصلي على خليط كريمي وبعد صب عليهم نصف كاس زيت ونصف كاس حليب وغربل 8 مغارف فرينة و2 مغارف نشاء و1 خميرة قاتو وخلطهم مع بعض وبعد صبهم على الخليط مع الحليب والزيت وحرك برفق
استعملت قوالب مربعة وفي القاع افرش ورق الزبدة
طيب على 180° وشعل عليه الفرن من فوق
شكل الجينواز كيما تحب
تقص الجينواز على 2 وتعمل خليط ماء وسكر وتبل بيه طبقة الجينواز وبعد تدهنها بالكرام الزبدة وترش الفاكية المقلية ثم الطبقات الباقية بنفس الطريقة
واخيرا تدهن القاتو الكل بكرام الزبدة وتعمل قاناش
القاناش :

200غ شكلاطة و حكة كرام فراش و 50غ زبدة وتذوبهم في حمام مائي وخليهم يبردو شوية وتصبهم على القاتو

قاتو بالفرنبواز والبرتقال

القاتو:
4 بيضات ياغرتة سكر
1 فانيليا
مبشور ليمونة
تركضهم بالباهي وتخلط ياغرتة وياغرتة حليب وياغرتة زيت وتزيدهم للخليط واخيرا 3 ياغرتات فرينة مغربلين ومعاهم 1 خميرة قاتو
خلط الكل برفق
طيبها في الفرن على 180 °
وكيف تخرجها من الفرن اسقيها بكاس صغير حليب 50 مل
الكريمة :
نصف لتر حليب
كيس كريمة فانيليا
1 فانيليا ومغرفة قهوة نشاء
ومغرفة ماكلة سكر
تطيبها على نار هادية
وبعد زيدها كيف تطيب 50غ زبدة وحرك بالباهي حتى تذوب وويولي عندك خليط متجانس
صب الكريمة على القاتو الطايبة وزينها بشوية شكلاطة
نظف الغلة وزينها فوق القاتو وبعد زيدها ناباج باش تحافظ على بريقها ونضارتها
وقسمها كيما تحب وتاكلو بالشفاء
انا نقصت في كمية السكر باش ماتكونش قوية