سلاطة مشوية

اشوي الفلفل والطماطم والثوم على الكانون أو فوق النار مباشرة وبعد غطيهم يبردو  في طنجرة وقشرهم وارحيهم وخلي فيهم لقش وفوح بالملح والكروية والزيت

 

مقرونة بالحوت

قلي بصلة صغيرة وزيدهم كعبة طماطم خضراء مقشرة وكيف يتقلاو تزيدهم مغرفة كبيرة طماطم معجونة وشوية طماطم شريحة وثوم وتابل مفوح وامرق وزيد فلفل مرحي وكركم وملح وفلفل اكحل وارمي الحوت في كسكاسو وخليها تغلي حتى تطيب وبعد اصمت المقرونة وخلطها

اعشاش التالياتلي بالتن

الصوص: تقلي بصلة صغيرة وبعد تزيدها طماطم خضراء مرحية وتفوح بالثوم وتابل وكروية ورند وملح وفلفل اكحل وكركم وفلفل أحمر وكيف تطيب أطفي عليها وتكون خاثرة موش جارية

الحشو : تقلي بطاطا مكعبات صغيرة وبعد في مقلة تيفال نقلي بصلة وفوقها شوية معدنوس وبعد نهبطهم من النار وتزيدهم البطاطا وممكن تستغنى عليها موش ضرورية وتن وملح وفلفل أكحل وجبن ووشوية كرام فراش

تصمت التالياتلي بالملح وقطيرة زيت وتسقطرها وبعد تحطها في شكل أعشاش وفوقها الصوص وبعد الحشو ثم رشة جبن قرويار أو برموزان وجبن موتزارلا وأخيرا جبة شرائح ودخلها للفرن 10 دق باش تتجبّن ويذوبو الاجبان الكل

كسكسي بالبسباس وتن مشوي

تقطع البسباس وتحطو يفور وفوقو الكسكسي
الصوص : تقلي بصل وطماطم معجونة وطماطم شريحة وهريسة عربي و هريسة حانوت  وبعد تمرق وتزيد راس ثوم مهرس وكروية وملح وكركم مغرفة مليان فلفل مرحي وفلفل ملاحي وفلفل بر العبيد
وكيف يطيب الكسكسي ويكون خلطو مع البسباس وعاودت فورتو سقيه بالمرق
واقلي أو اشوي الحوت الموجود عندك

مرقة حوت - الراسكاس-

في الطنجرة نحط زيت وبصل وطمطومة خضراء ونقليهم ونزيدهم مغيرفة طماطم معجونة ونمرق ونفوح بالملح والكركم وفلفل مرحي وتابل مفوح ومغرفة هروس وراس ثوم كامل صحيح وكعبة بطاطا مقطعة ونحط الحوت في الكسكاس ونسقطو مع المرق يغلي باش مايسيبش الشوك متاعو في المرقة ويسيب الفيحة
وكيف تطيب المرقة وتقر زيتها زيد رشة صغيرة كمون وطفي
زين الصحن بكعيبة قارص وقرين فلفل وتاكلو بالشفاء

كايك باللوز

تاخو100غ زبدة طرية و100غ سكورخلّطهم لين بيياضو زيدهم 3 عضم و2 سكر فانيليا واركض وزيد150غ فرينة ونصف باكو خميرة قاتو مغربلين وتركضهم لين يولي عندك خليط كريمي عاقد حطو في المول ورش عليه اللوز وطيب الكايك في 150 درجة وكيف تطيب ادهنها بالناباج باش تعمل شوية حلاوة للصغار

ممكن كمية السكر تنقص شوية فيها

 

جمّة ومجّل مشوي

نظف  الجمّة  ومعاها حزمة خبيزة أو سلق باش ترطبها واغسلها بالباهي بقطيرات جافال ومصمص برشا مرات حتى تنظاف ويتنحى التراب الكل وبعد قطعها واصمتها وأخيرا سقطرها في الكسكاس وانزل عليها حتى يخرج ماها الكل ، وبعد قلي بصل في بزايد زيت زيتونة وبعد 2 كعبات طماطم خضراء وتزيد طماطم معجونة وطماطم شريحة وهريسة عربي وهريسة حكة وفلفل مرحي وتقليهم وتزيدهم 2 رؤوس ثوم وكروية وملح وفلفل مرحي ، وتصب الجمّة المصموتة والمسقطرة بالباهي وأخيرا زيد شوية فلفل شايح أحمر وفلفل بر العبيد وفلفل ملاحي وردو بالكم تمرقو ماتزيدو حتى قطرة ماء تميص وتولي حااااااااااالة ماتتاكلش

محمص بالمناني

تقلّي في الزيت بصلة وكعيبة طماطم خضراء وبعد تزيد مغرفة ماكلة طماطم معجونة وتمرق بالباهي وتفوح بالملح والكركم والفلفل الاكحل وفلفل مرحي وطماطم شريحة ومغرفة قهوة هروس وكيف يغلي أرمي الحوت وبعد وقت إليّ يطيب خرجو بالسياسة وارمي المحمص واقلي قرينات فلفل وكان تحب زيد أقلي كعيبات حوت سردينة أو سكمري زيد عديو بيه

تارت باللوز العائلية

العجينة :400 غ فرينة
تاخو200 غ زبدة
1/2 كيس خمرة قاتو
بيضة
ذرة ملح
تخلط الكل وتكمل تلم العجينة بالحليب
وخليها ترتاح 15دق في ساشي غذائي
حلها بالقلقال جويدة
وافرشها في طبق التارت 30صم/30صم وماتنساش حط ورق الطبخ
انقبها بالفرشيطة
وتحضر الخليط متاعك

 ترحي 400غ لوز مقلي شوية

 سكرعادي 200غ  ممكن اقل او اكثر حسب الرغبة
تذوب 200غ زبدة
تخلطهم في الرحى مع اضافة 5 بيضات واحدة واحدة
تزيدهم 100 غ فرينة مغربلة

كيس خميرة قاتو
كيس فانيليا وتخلط بالباهي وممكن تزيد قطرات روح اللوز للي يحبو
وتكون حضرت التارت متاعك وشعلت عليها الفور من
فوق باش تاخو وجه وتطيب شوية
صب الخليط رشق فيها كعيبات لوز مقلين وطيبها عادي على 180 ° وكيف تطيب
وتحمار ادهنها بالناباح وخليها تبرد باش كيف
تقصها ماتتفتفتش