مقرونة fruit de mer

مقرونة fruit de mer
تحط في الطاوة
راس بصل مفروم وراس ثوم مفروم وزيت و5 كعبات طماطم مقطعين وتحركهم شوية وبعد تحط المول يكون منظف وتحرك شوية وتخليه يشكشك توا تتحل كعاب المول بالكعبة بالكعبة حتى يتحلو الكل زيدهم مغرفة كبيرة طماطم معجونة وشوية هروس باش نفلفلوها والقرنيط وامرق وزيد سرة التن وملح وفلفل اكحل وكركم وشوية فلفل مرحيوخليها تغلي وكيف قريب تطيب زيد الكروفات وخليها لين تقر زيتها قطع وريقات حبق وبن صوابعك كمون واطفي وغطيها
اصمت المقرونة عادي وبعد نحي المول والقرنيط والكروفات وسرة التن وحدهم وخلط المقرونة بالصوص وزين بالباقي

لقمة الباشا

لقمة الباشا من الاطباق الرمضانية للسهرية
مكوناتها موجودة في الدار و ساهلة
لأربعة أشخاص تحط 2 كيسان حليب و 1/2 كاس سكر و كاس غير ربع فرينة تحط على النار و تحرك و تثردها كيف العصيدة و وقت تعقد تزيدها مغرفة ماكلة زبدة و باكو فانيليا و تخليها تطيب اي تبقبق شوية و تطفي و ترش جوز الهند في طبق او عدد 4 صحفات و باش يشد جوز الهند في الاجناب ادهنهم بشوية زبدة موش ياسر باش تتغلف الصحفة بجوز الهند و تفرغ العصيدة و ترس جوز الهند و بعد تغطيها بالكرام شانيي و تزين بجوز الهند و تحطها تبرد في الثلاجة و عند التقديم تدللها بشوية فاكية اللي عندك .و الي يحب يعوض جوز الهند اي حاجة يحبها اي نوع متاع غلة دقلة و الا موز و بالشفاء

شربة بالحوت

شربة بالحوت
تقلي بصلة وطماطم خضراء وتزدهم مغرفة قهوة طماطم معجونة وامرق شوية وزيد ملح وفلفل أكحل وكركم وشوية فلفل مرحي وكيف تغلي ارمي التشيش ( فنجال صغير ) وكلافس وخليها تغلي على نار هادية ، وبالنسبة للحوت تنظفو وتحطو يتصمت وحدو في الماء وكيف يطيب صفي الماء متاعو بصفاية جويدة وزيد امرق بيه الشربة وسبل الحوت وارميه في الشربة وهكة تضمن شربة بنينة بالحوت ومن غير شوك

فيليه النازلّي باني

فيليه النازلي باني
تنظف النازلي وتنحيلو السلسول وبعد تفوحو بالملح والفلفل الاكحل وشوية كمون وبعد لفو في الفرينة ثم البيض واخيرا شابلور الخبز
اقلي في زيت كثيف ونار هادية
اعصر القارص وتاكلو بالشفاء

كعابر اللوز بنكهة الليمون

كعابر اللوز بنكهة الليمون
ترحي كغ لوز مفسوخ وتزيدة 300 غ سكر محور ومبشور ليمونة جويد وقطرة روح اللوز او بلاش وملون غذائي اصفر وتكمل تعجن بأبيض البيض تكعبر كعيرات صغار وتلفهم في السكر المحور وتزينهم بالملقط وفي الاخير تحطهم في الكاسات عدد 5 وترشق كعيبة فزدق

سابليه الشكلاطة

سابلي الشكلاطة
تذوب رطل شكلاطة صافية من غير اي اضافة وبعد تدهن بيها قوالب السيليكون في طبقتين ( تدهن الطبقة الاولى وتحط في الثلاجة وبعد الطبقة الثانية )
الحشو لوز وبشكوتو ترحيهم وتخلطهم بباقي الشكلاطة الي تزيدها 1/2 علبة كرام فراش و 30 غ زبدة و 3 مغارف حليب دافئ المهم تكون الشكلاطة سائلة بالباهي وتحط في قوالب الشكلاطة وفي الوسط كعبة لوز مقلية وبعد تلصقها في حلقات السابليه الي صنعتهم وطيبتهم مسبقا بمعجون المشمش وفي الاطراف تحط شوية لوز
هي بسيطة في فكرتها وبنينة برشا

كعابر الشكلاطة

كعابر الشكلاطة
تذوب 200 غ شكلاطة في بان ماري و تزيدها قطرات زيت و بالفوشة تدهن القوالب بالشكلاطة و تحطها تبردفي الكنجلاتور و عاود ادهنهم مرة او مرتين حتى يتغلفو مليح .حضر حشو باكو بسكوي مرحي ارطب و 200 غ لوز مرحي لمهم بالحليب المركز و عبي القوالب بعد ما تيبس الشكلاطة بالخليط متاع اللوز و صب شكلاطة باش تسكر و حطهم يبردو و بعد ما ييبسو نحيهم من القالب و عط نكتة شكلاطة من الفوق و بين بالجوهر او بالي تحب و تنجمو تستغناو على البسكوي و تحطو الفاكية الي تحبو و كل واحد و امكانياته
كلثوم

كعك اللوز

كعك اللوز الحلويات الاصلية و البنة الزمنية نكهة طبيعية لاملون و لا مواد كيميائية
عملت 250 غ لوز مرحي أرطب و 75 غ سكر محور و ابيض عضمة و شطر أصفر عضمة و كملت لميت بماء العطرشية و ما تكونش طرية برشا و ما نعجنوهاش خاطر اللوز يخرج زيتو و نحطوها في ساشي و تخدمو بالشوية نبرمو على الطاولة و نقيسو. طول باكو خميرة القطو و قصو و نسكرو على شكل كعكة و نرشقو الفستق انا غطستو شوية في ابيض العضم باش ما يطيحش و طيبتهم 15 دق على 160 درجة
كلثوم

كعابر اللوز

كعابراللوز
انا اخترت لونين فقط
فسمت كمية اللوز إلى نصفين وكل واحد زدتوا الملون الخاص بيه
طيبت كاس سكر ونصف كأس ماء بالباهي لين شد روحو شوية وخلطت بيه العجينة
وشكلت كريات ولفيتهم في السكر

قلاية قرنيط

تصمت القرنيط حتى يطيب وبعد تسقطرو وتقطعو وتحطو في طنجرة تيفال وتصب عليه زيت زيتونة وتقليه شوية وتزيدو مغرفة طماطم معجونة وترش عليها شوية ماء وتزيد كركم وملح وفلفل اكحل وفلفل مرحي وكروية وتخليه يشكشك على نار هادية
وكان تحب فقر عضيمات عربي كان ماتخبش عادي
اقلي بطاطا وفلفل ورش شوية معدنوس كيف تزين الصحنات
وتاكلو بالشفاء والهناء

عدس بالقرنيط

تغلي ماء ماجل او صافية
وفي الكوكوت حط شوية زيت زيتونة وبصلة وصويبعات قرنيط وقليهم وبعد زيدهم مغرفة فلفل مرحي وشوية طماطم معجونة وامرق بالماء الي يغلي وزيد شوية بسباس مرحي وارمي العدس وغطي الكوكوت 15 دق
وبعد حلها تلقاه طاب زيدو كعيبة ملح وتاكل بالشفاء
ردو بالكم فيسع يطيب كيف يبدا ماء ماجل او صافية وكوكوت

كريم كارامال

تحضر 160غ سكر محور ونحطو في وعاء تيفال على نار هادئة حتى يذوب ويولي في شكل كرمال ويتلون بعدو على النارووزيد 80غ كرام فراش بالشوية بالشوية وخلط حتى يتحل الخليط ويتجانس زيدو 80 غ زبدة وخلط وبعد رجع الوعاء على النار حتى تتحصل على كريمة متجانسة ورطبة ومتماسكة