قراتان بالدجاج

القراتان: تقطع البطاطا روندالات و تقليهم و بعد تاخو السكالوب تقطعو مربعات صغار و تحطو في طاوة تفوحو بفلفل اكحل و كمون و هيل (فاح تركي موجود منو في السوق) و بعد تزيدو مغرفة صغيرة طماطم معجونة و تمرق شوية بركا و تخليه يشيح من ماه ..و بعد تحط فرشة بطاطا في البلاطو و فوقو السكالوب الطايب و بعد صوص بشاميل مخلطة باصفر عضمة و تحطو في الفور ربع ساعة على 180درجة

عواطف بن محجوب

كسكسي بعصبان الدجاج

العصبان :
قطع لحم الدجاج والكبدة  وحزمة معدنوس و 2 رؤوس بصل جويدين وفوح بالملح والكركم ومغرفة هريسة عربي من غير ثوم وفلفل اكحل تابل وكروية ونصف كاس صغير برغل جويد وقطيرة زيت زيتونة وتخلطهم بالباهي
تذبل اوراق السلق معناها دوبما تغطسهم في الماء الي يغلي وتخرجهم فيسع وتحل الورقة في يدك وتعبيها بالخليط وتسكرها وعلى البلاصة لفها بالخيط حتي تتحصل على عصبانة مزيانة
الصوص :
تحط ماء وزيت وكيف يغلي ارمي العصبانات بعدما تنقبهم
وتفوح بالطماطم معجونة ( لكل كاس كبير كسكسي مغرفة ماكلة مليانة طماطم ) و2 مغارف فلفل مرحي وملح وكركم وفلفل اكحل
بل الكسكسي بقطيرة زيت وكركم وماء وخلي يتشرب وبعد حطو يفور
وفي نصف الطياب تريه بالمرق ورجعو يفور مرة ثانية
اصمت الحمص والسفناريا وحدهم بماء الماجل وفوحهم بالملح والكركم والفلفل الاكحل
سقي الكسكسي واقلي الفلفل

مرقة كعابر باللحم

مكونات الكعابر:
لحم وكبدة ومعدنوس وبصل وبيض وشوية فرينة وفلفل اكحل وكركم وملح وتابل مفوح وسنينة ثوم مقطعة جويدة وفلفل مرحي خلط الكل واقليه بعدما تلف الكعبورة في الفرينة
الصوص :
بصل وطماطم معجونة وفلفل اكحل وكركم وملح وفلفل مرحي وتابل وزيت و جلبانة و ارمي كعيبة بطاطا وكيف قريب تطيب ارمي قرين فلفل اخضر او بر العبيد

 

 

8

مقرونة بالغزال

تقلي بصلة
وتزيدها 2مغارف ماكلة طماطم معجونة وتقليهم وتزيد راس ثوم مفروم وتمرق ومغرفة فلفل مرحي وتابل وفلفل اكحل وشوية طماطم شريحة وكركم وملح وارمي القطيعات والراس بعدما يكونو استقطرو بالباهي من الدم الي فيهم
وكيف تطيب اصمت رطل مقرونة وخلط عادي

 

خبيزة المهدية

نظف الخبيزة  ومعاها حزمة جمّة باش تحرشها واغسلها بالباهي بقطيرات جافال ومصمص برشا مرات حتى تنظاف ويتنحى التراب الكل وبعد قطعها واصمتها وأخيرا سقطرها في الكسكاس وانزل عليها حتى يخرج ماها الكل ، وبعد قلي بصل في بزايد زيت زيتونة وبعد 2 كعبات طماطم خضراء وتزيد طماطم معجونة وطماطم شريحة وهريسة عربي وهريسة حكة وفلفل مرحي وتقليهم وتزيدهم 2 رؤوس ثوم وكروية وملح وفلفل مرحي ، وتصب الخبيزة المصموتة والمسقطرة بالباهي وأخيرا زيد شوية فلفل شايح أحمر وفلفل بر العبيد وفلفل ملاحي وردو بالكم تمرقو ماتزيدو حتى قطرة ماء تميص وتولي حااااااااااالة ماتتاكلش

 

خبزة هواء

تاخذ كعبتين بسكوى سيدة وتحط بيناتهم كرام شانتي وتغطسهم في القهوة وتحهم واقغين في الطبق وتكمل الصفة هكه ومن بعد تلسق علي التجناب ككعبة كعبة بسكوى وتحط الكرام شانتي وتلسقها علي الاجناب ومن بعد تغلفها الكل بالكرام شانتي وتسخن كرام فراش وتحط معاها شكلاطة حتي تذوب وتصبها من فوق وتاكل بالشفا

مفيدة حمزة

خبز سميد

تأخو 600 غ  فرينة و 400غ سميد جويد و 2 خميرة خبز  و2 بيضات و 2 مغارف سكر وماء دافئ للخميرة وملح ونعجنها وزيت وشوية زبدة وقرفة وعود ونخليها تتخمر بالباهي وادهنها بألبيض البيض

ريم المنزلي

طاجين الباي بالدجاج

خذيت صدر دجاجة وحطيتو يتصمت مع الملح والفلفل الاكحل ورأس بصل مفروم وتابل وزنجبيل وكركم وقطيرات زيت وكيف ينزح من الماء متاعو ارحيه وزيدو عضمة مصموتة وجبن و4 بيضات كاملين وحطو يطيب في الفرن وحضر الطبقة الثانية : رطل سبناخ فورو وخليه يستقطر وزيدو جبن وملح وفلفل أكحل و 7 فصوص بيض والبياض خليه جانبا وكيف تحس الطاجين شد روحو صب عليه طبقة السبناخ برفق ورجعو للفرن وحضر الطبقة الثالثة : 300غ ريقوتة وجبن والبياض متاع 7 بيضات وملح وفلفل أكحل وارحيه وكيف يصمل ويشد روحو السبناخ صب عليه الطبقة الاخيرة ورجعو يطيب ، قصو كيف يبرد شوية انا قصيتو سخون حسيتو موش مسبوك كيما نحب . وملاحظة للطبخ في الفرن باش يطيب وفي نفس الوقت يبقى أصفر ما يتحرقش :سخن الفرن وحك في الطبقة الاولى 10 دق تقريبا والفور يشعل من الاسفل وفيسع أطفي الوطاني وشعل من فوق دوبما يعمل طبقة شادة روحها تقريبا 4 دقائق خرج وصب عليه الطبقة الثانية بنفس الطريقة والثالثة كذلك

فريكاسي

تأخو 600 غ فرينة و 400غ سميد أرطب و2 بيض  وملح وكركم و مغارف كبار زيت زيتون ونصف كأس حليب و 2 خميرة خبز فورية نحلها مع القليل من الماء الدافئ وقليل من السكر واتركها 5 دقائق ثم أضيفيه لبقية المكونات واعجن بالماء حتى تولي رخوة نوعا ما واتركها تتخمر ثم شكلها أقراص واتركها تتخمر مرة ثانية واقليها في زيت غزير والحشو عضم وتن وبيض وهريسة ومعدنوس وزيتون

ريم المنزلي