كيكة البرتقال

تأخو 4 بيضات ومعاهم كأس سكر و1 فانيليا وذرة ملح وتركضهم بالباهي حتى تتحضل على خليط كريمي تزيدو عصير 2 كعبات طمسن ومبشور برتقالة وكاس ناقص زيت نباتي ونصف كأس حليب وتغربل 2 كيسان فرينة ونصف كأس نشاء و1 خميرة قاتو تخلطعم مع بعض وتزيدهم شيئا فشيئا للخليط وأخيرا صبهم في قالب الفرن وطيبهم على 180 ° وقصها كيف تبرد تماما

قاتو بالدقلة

تاخو 3 مغارف دقلة مرحية حطهم في كاس حليب وسخنهم توا يتحلو وخليه يبرد
تركض 4 بيضات و4 مغارف سكر محور وكيس فانيليا حتى يولي الخليط لزج ومتماسك
زيدهم 350 غ فرينة مغربلة وكيس خميرة كيميائية
صب على الحليب نصف كاس زيت نباتي وخلط الكل وحط في الفرن على 180 °
كيف تخرجها سخونة ادهنها بالناباج وبعد 10 دق رش على القاتو جوز الهند وبعد قصها

خوذ شطرات دقلة وادهنهم بالناباج وزين القاتو متاعك

 

 

 

 

أرز جربي بالشوفرات

تنظف الشوفرات بالباهي من غير ما تقشرها وحطها تتصمت 20 دق وبعد خرجها وصفي الماء متاعها وخبيه باش نسقيو بيه الارز ، وبعد في قلاّية قرانيت حط سفناريا جويدة وجلبانة وبصل وطمطومة خضراء وزيت ومعدنوس وشوية سلق وقليهم بالباهي وزيدهم مغرفة طماطم معجونة وملح وفلفل أكحل وكركم وفلفل مرحي واسقي بماء الشوفرات ورد بالك كمية الماء تكون ضعف كمية الارز يعني كأس أرز و 2 كيسان ماء وغطيه وخليه يغلي وكيف قريب يطيب حط الشوفرات إلي طايبة مسبقا وخليها لين تشيح من الماء طفي عليها النار وخلي ترجع عليها السخانة متاعها

شوفرات سوتي

تأخو كعبتين طماطم خضراء وقطيرة زيت وتسوتيها لين تطيب الطماطم والشوفرات وتقشرها وتحطها فوق الطماطم الطايبة وتزيد تسوتيها وتفوح بالكركم وملح وفلفل اكحل وأخيرا كيف تشيح رش عليها معدنوس ودوبما تحركها وهبطها من فوق النار

سلاطة مقرونة

انا اخترت مقرونة خاصة بالخضر
تصمتها بالملح وتحط معاها كيف تطيب وتستقطر
معدنوس وزبدة وزيت وجبن قرويار ومكعبات شيدار وتن وبيض وفلفل بر العبيد وفلفل اكحل وزين كيما تحب

سلاطة أرز بالشوفرات

تغسل الشوفرات وتنظفها وتصمتها وسقطرالماء متاعها وتكيلو ،اصمت فيه الأرزبالبصل وقطيرات زيت ، كيلة أرز و 2 كيلات ماء الشوفرات وكمل بماء دافي وبعد قطع طماطم وجبن ومالح وشوية معدنوس وحبات ذرة وزيتون وكيف يطيب الارز خليه يبرد وبعد خلط الكل مع بعضو وزين بكعيبات الشوفرات كيما تحب

كسكسي بالخضر

 الماء حطو يغلي ومعاه زيت وطماطم خضراء وطماطم معجونة وفلفل اكحل وكركم وفلفل مرحي وشوية طماطم شريوهريسة عربي كان تحبو حاااار وملح و قديد وحمص وبصل و3 سنات ثوم وفول أخضروفلفل أحمر شايح وفلفل ملاحي ووريقات سلق وسفناريا وكرنب وبطاطا وتحط الكسكسي يفور وبعد في نصف الطياب تريه بالمرق ورجعو يفور وبعد أصمت العضم واقلي الفلفل وسقي كسكسيك

قاتو zebra

300غ فارينة
2 ساشي خميرة
1 ساشي فانيليا
250 مل زيت نباتي
250 مل حليب
4 عضمات
زوز مغارف كبار كاكاو
زوز مغارف كبار خل ابيض
شوية قشور ليم مرحي
رشة ملح
نركضو لعضم والسكر والفاني لين يبياض الخليط نزيدو الزيت والحليب( الحليب نخليو منو زوز مغارف كبار على جنب) نغربلو الفارينة والخميرة نزيدوهم ونزيدو قشور الليم والخل ونقسمو الخليط على زوز واحد نخليوه كيما هو والثاني ناخذو الزوز مغارف كاكاو وزوز مغارف حليب الي نحيناهم نخلطوهم وحدهم بعد نصبوهم عليه ونخلطو هكا نتحصلو على خليط ابيض وخليط اكحل
ندهنو البلاتو بالزبدة والفارينة أو بورق الطبخ وناخذو مغرفة من الخليط الابيض نصبوها في الطبق ونصبو فوقها مغرفة من الخليط الاكحل لين تكمل
طيبها على 180 درجة مدة 45 دق ومتخرجهاش من الفور خليها تبرد شوية
صوص الشكلاطة نسخنو 200مل كرام فراش ليكيد عليهم 200غ شكلاطة بعد تنحيها من الغاز وتزيدها مغرفة صغيرة زبدة وتحرك وتخلي الصوص الكل تبرد بعد تزين بيها القاطو

ابتسام

تارت بالتن

العجينة : 300 غ فرينة ونصف باكو خميرة قاتو وعضمة و 150 غ زبدة وملح وتعجنها بالحليب
وتفرشها في الطبق وتنقبها بالفرشيطة وخليها ترتاح
الخليط :حكة تن تفرقها في القاع وترش 100غ جبن قرويار و2 عضم مصموتين و4  طوابع جبن مثلثات وزيتون وكبار وفلفل بر العبيد جويد ورشة معدنوس وأخيرا موتزارلا وتخلط 4عضم نيء مع علبة كرام فراش مع فلفل أكحل وتصب الخليط فوق التارت وتطيبها في الفرن على 180 درجة