كسكسي بالدنديق

 نظف الدنديق ونرش عليه الملح ونخليه يبنان في الثلاجة
ونحضر الصوص :
نقلي بصلة وكعيبة طماطم خضراء وبعد نزيد 3 مغارف ماكلة طماطم معجونة وكعيبرة طماطم شريحة و2 مغارف فلفل مرحي ونمرق
نحط قرع جديد  وسنة ثوم و فلفل احمر شايح ونمرق ونزيد الملح والكركم والفلفل الاكحل وكيف يغلي المرق نرمي الحوت
نبل الكسكسي بشوية ماء وزيت ونحطو يفور
نتريه بعد بالمرق متاعو ونرجعو يفور
واخيرا نقلي الفلفل ونسقي الكسكسي وماتنساش رش شوية فلفل اكحل فرشك وزين الصحافي

مرقة كالمار محشي

مرقة كالمار
الصوص : ماء وزيت وطماطم معجونة  وكركم وملح وفلفل اكحل وفلفل مرحي وكيف يغلي أرمي كعب الكالمار وخلي يغلي لين يقر زيتو

الحشو :الشوش متاع الكالمار أصمتهم وزيدهم بصل ومعدنوس وبرغل وبسباس مرحي وكركم وملح وفلفل مرحي وبعد شق كعبة الكالمار من الأسفل واحشيهم وبعد ارميهم في الصوص إلى تغلي
بالنسبة للبطاطا ممكن ترميها في المرق أو كيما نعمل انا نصمتها بالملح والكركم وأخر حاجة نحطها في الصحنات على خاطر تمص الفيحة متاع الكالمار الكل وزيد تسيب النشاء متاعها

بقلاوة عربي باللوز

العجينة
2 كغ فرينة
2 فناجل صغار زيت نباتي 
ذرة ملح
وتعجن بالماء الدافئ
اللوز
2كغ ونصف لوز
200 غ فرينة
200 غ سكر
ممكن اضافة فاكية مقلية
العسل :
كيلوغرامين ونصف  سكر تغليهم مع 3كيسان ماء كبار وكيف قريب يتسكر زيدو 1/2 كاس عطرشاء  وأوراق العطرشاء أرميهم في العسل وغليه وبعد كيف قريب ييبس حطلو كاس تاي قارص  ودوبما يهز الغلو تقريبا 4 دق زيد 2،5 مغارف ماكلة قلوكوز واطفي عليه وخليه يبرد

في وعاء فيه ماء بارد باش يبقى أبيض اللون

الطريقة :
تقسم العجينة الى كويرات بالضبط 25
تحط 10 ورقات من الاسفل
تحط اللوز
وتزيد تعرك شوية عجين وتخليها ترتاح المهم اعمل 15 ورقة من فوق
وكيف العادة بين الورقة والورقة شقشق

بالزبدة الذايبة ومغلية بالباهي

بعدما تحط اللوز رش شوية سكر محور باش تشد الورقة الفوقانية
الورقة الاخيرة ماتشقشقهاش خليهاهذيكة تحمي الورقة الاساسية

الطبق 40/60 صم

كان تحب تستعمل اللوز الغير مفسوخ بلو بالماء الساخن باش تحي منو الحمورية والغبرة وشيحو وارحيه واعمل شطر لوز مفسوخ وشطر لوز عادي عندو طعم مميّز ومتاع زمان

القلوكوز مادّة أضفتها للعسل باش تخلي الكعبة تتعلك وبنينة وما يسيحش العسل بالسخانة

كسكسي بالقرّاط

 

تقلي الفلفل وبعد خرجو من الزيت وقلي بصلة وطمطومة خضراء وبعد تزيدهم طماطم معجونة وطماطم شريحة ونزيد مغرفة فلفل مرحي و وفلفل اكحل وكركم وملح و وبعد صب عليه محكار كأس تاي ماء وارمي الفلفل إلي قليتو في الصوص يبنان دوبما يشكشك خرج الفلفل وامرق وارمي القرع والبصل وبعد رش على القراط  الملح وخليه يبنان شوية ثم اغسلو وحطو في كسكاس خاص بالحوت وغطسو في المرق وحط الكسكسي يفور
فما الي يحط بطاطا اما راهي تمسط الكسكسي ، تري الكسكسي بالمرق ورجعو مرة ثانية يفور
وكيف يطيب سقيه عادي

مصلي بالبلاميط

قلي بصلة صغيرة في الزيت وتزدها مغرفة قهوة طماطم معجونة وتمرق شوية وتخليه يغلي وفوحو بالملح والكركم وسنة ثوم وفلفل اكحل ، وفي طبق الفرن حط حلقات طماطم خضراء وقارص وقطعات البلاميط تفوحو بالملح والكركم والفلفل الاكحل والتابل وسنة ثوم مهرسة وبعد تصب عليه الصوص وتزيد فلفل أخضر وتحطو في الفرن لين يشيح ويتجمر أقليلو

البطاطا او ممكن تحطها تطيب مع المرق والفلفل الاخضر ورشة معدنوس