كفتة البروكلو

صمت البروكلو بالملح والكركم وسنينة ثوم ووريقة رند ومعاه كعبية بطاطا، وبعد تسقطرو بالباهي وترفسو بالباهي وتزيدو معدنوس وبصل جويدين وجبن وفلفل أكحل وتابل مفوح بالثوم وشوية زعتر وعضمة وزدتها مغرفة هريسة دياري و2 مغارف كبار فرينة ومغرفة خبز مرحي وتخلط بالباهي بحيث تتحصل على عجينة ، اعمل كرات ولفهم في الخبز المرحي ( شابلور) وبعد أقليهم على نار هادية في شوية زيت

مقرونة بالصوص والجبن

تقلي بصلة ومعاها 4 طماطم خضراء تصمتهم وتسقطرهم وترحيهم وبعد تزيدهم طماطم معجونة ورأس ثوم مهرس مع تابل ووريقة رند وملح وفلفل أكحل وكركم وفلفل مرحي وكيف قريب تطيب زيدها رشة زعتر وقرين فلفل أخضر قصو جرار ، أصمت المقرونة ومعاها قطيرات زيت وبعد زين صحنك بالعضم المصموت والسلصة كان تحبها والزيتون والتن والجبن

بيتزا تركية

البات :
150 مل حليب
150 مل ماء دافئ
2 مغارف قهوة سكر
مغرفة قهوة ملح
1 خميرة فورية
تخلطهم بالباهي وتخليهم يتخمرو في مكان دافئ
وبعد 15 دق زيدهم 150 مل زيت نباتي
وزيد الفرينة حتى تتلم العجينة وزيد خليها تتخمر حتى يتضاعف حجمها
قصها في شكل دوائر واجبدهم شوية وعبيهم ب
هريسة وبعد بصل مسوتي
مع المعدنوس
وبعد عضم مصموت
جبن فوندون وموتزارلا
كبار
تن
واخيرا بيضة ورشة زعتر وملح وحلقات فلفل بر العبيد وزيتون
طيبها في الفرن على 180 °
وكيف تطيب زيدها معدنوس مقطع وتن فرشك
وتاكلو بالشفاء

طبيخة فول وجلبانة وخبز قمح دياري

الخبز :
كيل بكاس 225مل
كاس حليب
كاس ماء دافئ
كاس زيت
2 مغارف صغار ملح
2 مغارف ص سكر
2 مغارف ماكلة خميرة خبز
كاس فرينة
خلط كل هذه المكونات بالمكسور وخليهم يتخمرو في مكان دافئ
كيف يتخمرو زيد الخليط 3 كيسان قمح كامل و اعجن كان لقيت العجينة مازالت موش ملمومة كمل بالسميد او الفرينة على خاطر القمح وحدو يخلي الخبز يتفتفت
كيف تتلم العجينة ادهنها بالزيت وخليها تتخمر للمرة الثانية حتي يتضاعف حجم العجينة
واخيرا كيف تتخمر اصنع الخبز بالشكل الي تحب عليه ولف الخبزة في السميد من فوق وحطهم في الطبق شقهم للزينة
كان تحب رش سينوج او جلجلان او بسباس ….
وخلي الخبزات يتخمرو للمرة الثالثة
يتضاعف حجم الخبزة وتزيان
طيبهم في الفرن على 180° واخيرا شعل عليهم الفرن من فوق باش يحمار الخبز
وتاكلو بالشفاء

الطبيخة:
نقطع في الطنجرة :
حزمة سلق وحزمة معدنوس و2 سفناريا و2 لفت و2 رؤوس بصل كبار وكاس فول مصري وكاس ونصف جلبانة وكاس ونصف فول اخضر ومغرفة كبيرة طماطم معجونة ومغرفة كركم وزيت وفلفل اكحل
قلي الكل وامرق
زيد شوية فلفل مرحي
وغطي الطنجرة وخليها تشكشك وحدة وحدة باش تطيب بالباهي
في نصف الطياب زيدها البطاطا وكيف تشيح وتخثار وتقر زيتها ارمي قرينات فلفل ملاحي
الطبيخة ماتحبش الكوكوت وتحسها تطيب ولكن المطعم موش كيما تطيب وحدة وحدة
وشاهية طيبة

شكشوكة جلبانة

تقلي بصلة ومعاها 2 كعبات طماطم خضراء وبعد زيد نصف مغرفة كبيرة طماطم معجونة و2 كيسان كبارجلبانة مفركة ومغسولة وامرق بماء ماجل أو صافية باش تطيب بالباهي وزيدها 2 سنات ثوم مقطعين جويدات وملح وفلفل اكحل وكركم وكروية وقطع كعبة بطاطا صغيــــــــــرة وغطيها وبل الفلفل الشايح متاع الصيف أو فلفل أحمر حار وارميه في المرق وأخيرا كيف تلقاها طابت وولات خاثرة ارمي قرين فلفل ملاحي وفقر عضيمات وغطيها وبعد أطفي وخلي النار ترجع عليها ، المهم تكون خاثرة وطايبة بالباهي الجلبانة والبطاطا نذوب زادة

كسكسي بعصبان الوزف

كسكسي بعصبان الوزف :
تنظف الوزف بالباهي بالملح وبعد تتبعو بالكعبة بالكعبة حتى يتنحى قشورو الكل وكمل خليط العصبان .بصل ومعدنوس وهريسة عربي وملح وفلفل اكحل وتابل وفلفل مرحي وشوية كمون وكركم وقطيرة زيت و2 سنات ثوم قطعهم جويدين خلطهم بالباهي ولفهم في السلق (غطس وريقات السلق في الماء الي يغلي وفيسع خرجهم )
وبعد لفهم في الخيط
المرق :
اقلي قرينات فلفل في الزيت وخرجهم وبعد قلي بصلو و 2 كعبات طماطم خضراء و2 مغارف ماكلة كبار مليانين طماطم معجونة وقليهم وزيدهم هريسة عربي وطماطم شريحة وملح وكركم وفلفل مرحي وامرق شوية وبعد ارمي الفلفل الي قليتو في الصوص باش يبنان وخرجو
امرق وارمي بصل وقرع ولفت وبطاطا والعصبانات و4 سنات ثوم صحاح
خليه يغلي والكسكسي يفور وكيف يطيب سقي عادي وسربي الصحنات

بشكوتو دياري

بشكوتو : كيلو فرينة ،6 بيضات 320 غ سكر ،250 غ زبدة ، بشر 4 كعبات قارص وزوز برتقال ، رشة ملح ، 2 فنيليا
،2 خميرة
انا نقصت زوز كيسان فرينة وعوضتهم بالنشاء
تاخد الفرينة والنشاء وتخلطهم مع الزبدة تكون طرية وتزيد السكر والخميرة وبشر الليمون والبرتقال والفنيليا والبيض ورشة الملح وتخلط الكل لين تتحصل على عجينة متماسكة
نحط في المكينة ونطلع البشكوتو ونغطسو من الفوق في السكر ونحط على ورق الفرن ونطيبو في فرن سخون على 200 د 15 -20 دق

نزهة

فلفل محشي

الروسات : تغسل الفلفل وتجي للشطر متاعو وتقصو في اثنين وتنحي القصبة متاعو بش كيف تحطو في البلاتو يبدا مرتاح . الحشو: تقطع زوز رووس بصل وتقليهم شوية في الزيت وتحط اللحم المفروم يتمروج مفوح بالملح والكركب وفلفل احمر وفلفل اكحل وتابل راس حانوت وشوية نعناع وتزيد السبناخ وتخليه منو يطيب ومنو يشيح المرق متاعو وبعد تحط الجبن كيفما تحب و مغرفتين كرام فراش وتخلط بعضمتين انت والحشو وبعد تعبي وتنظم في البلاتو . الصوص: زوز مغارف ماكلة معجون وزوز هريسة عربي فلفل شايح رحيتو وتحلو بالماء والزيت وتحط شوية كركم مغرفة قهوة ومغرفة فلفل اكحل وفلفل مرحي وشوية ملح والصوص تبداخاثرة اني خليتها تغلي شوية فوق الناروبعد صبيت على جنب في البلاتو وحطيتها في الفور ساعة الا ربع طابت وتاكل بالشفاء😍

عفيفة واجة