مقرونة بالسبناخ

تفو السبناخ وتفوحو بشوية ملح وفلفل أكحل

تصمت مقرونة بالملح وقطيرة زيت حتى تطيب

تأخو 50 غ زبدة وزيدها 2 مغارف كبار زيت زيتونة وقطع فيهم بصلة صغيرة وزيدهم 3 مغارف كبار فرينة وخلط واسقيهم ب كأسين حليب وحرك وفي نفس الوقت ارفس 3 سنات ثوم وفوح الباشامال بالملح والفلفل أكحل وشوية جوز الطيب وكيف تطيب ماتخليهاش يابسة زيدها شوية حليب أو ماء وتتحصل على صوص بنينة برشا

أعمل طبقة أولى من الباشامال في طبق الفرن وبعد طبقة مقرونة وبعد جبن وبعد طبقة سبناخ وأخير كمل باقي الباشامال ورش عليه موتزارلا وجبن برموزان أو شيدار وزين الباقي كيما تحب وطيبها في الفرن على 200درجة وتأكلو بالشفاء

foie lyonnaise كبدة بالبصل

تنظف الكبدة بالباهي ( ممكن تكون متاع دجاج أو خروف أو بقر ) وبعد سقطرها وتأخو رأس بصل كبير قطعو غليظ وقليه في الزيت ورش عليه الماء باش يبقى مستصفر وزيدو 4 سنات ثوم وبعد زيدهم الكبدة وفوحها بالملح والكركم والكروية وفلفل الأكحل وزنجبيل وشوية اكليل وكيف تتقلي شوية صب عليها كأس ماء صغير وخليها تغلي لين تخثار وتطيب أقلي معاها رشة بطاطا وتاكلو بالشفاء

كسكسي بالخضر

ط الماء يغلي ومعاه زيت وطماطم خضراء وطماطم معجونة وفلفل اكحل وكركم وفلفل مرحي وشوية طماطم شريحة وهريسة عربي كان تحبو حاااار وملح و قديد وحمص وبصل و3 سنات ثوم وفول وفلفل أحمر شايح وفلفل ملاحي ووريقات سلق وسفناريا وكرنب وبطاطا وتحط الكسكسي يفور وبعد في نصف الطياب تريه بالمرق ورجعو يفور وبعد أصمت العضم واقلي الفلفل وسقي كسكسيك

تالياتلي ببنادق الدجاج

ارحي سكالوب الدجاج ، وهرس ثلاث سنينات ثوم مع تابل وكروية  وحط شطرو فوح بيه اللحم متاعك وتزيدو اكليل  ونعناع شايح وزنجبيل مرحي وملح وكركم وفلفل اكحل وشوية فلفل مرحي
وبعد في طنجرة فيها الماء يغلي زيدها زيت وباقي التابل والكروية والثوم  وكركم وملح وشوية اكليل وزنجبيل ، وبل يدك بالماء وكعبر وارمي في المرق الازعر الي يغلي
خليها تغلي لين تشيح

اصمت التالياتلي وخلطها مع الصوص وزينها بكعيبات البنادق و رشة جبن برموزان أو اي جبن آخر تحبو

لازانيا بالدجاج

لازانيا بالدجاج المفروم
تفرم سكالوب الدجاج مع البصل وبعد تقليه في شوية زيت وتفوحو بالكركم والملح والتابل المرحي والزنجبيل وشوية ثوم وفلفل أكحل وشوية فلفل مرحي .
الصوص: تقلي بصلة ووطماطم خضراء مصموتة ومرحية وتزيدها طماطم معجونة وتفوح بالتابل والثوم والملح والرند والفلفل الأكحل والفلفل مرحي وتمرق وتحطها تطيب وخليها صوص جارية موش خاثرة
صوص باشامال :
تحط 2 مغارف زيت زيتونة ومغرفة زبدة و3 مغارف فرينة وتخلطهم بالباهي على الغاز وبعد تصب عليهم كأس حليب وكاس ماء وخلط لين تتحصل على صوص جارية كان لقيتها يابسة زيدها شوية ماء أو حليب وزيد ملح وفلفل أكحل وفي الاخير كيف تهبط زيدها جبن
اتبعي الصور في وضع الطبقات ورشي الجبن بين الطبقات وبالنسبة للباشامال تكون في الطبق والطبقة الاخيرة
رشي الجبن والموتزارلا بين الطبقات واخيرا زيد رشة موتزارلا 

 وخليها تطيب في الفرن على نار هادية

كالمار محشي في الفرن

الحشو :الشوش متاع الكالمار أصمتهم وزيدهم بصل ومعدنوس وبرغل وبسباس مرحي وكركم وملح وفلفل مرحي و فلفل أكحل وبعد شق كعبة الكالمار من الأسفل واحشيهم وبعد ارميهم في الصوص إلى تغلي

الصوص : تقلي بصلة في شوية زيت وبعد امرقها وزيدها ملح وكركم وفلفل أكحل وبسباس مرحي وكيف تغلي أرمي كعيبات الكالمار  وفي نصف الطياب ارمي كعيبات بطاطا وبعد كيف ينزح المرق حط في طبق الفرن جريرات طماطم ورصف البطاطا والكالمار وحط الكل في الفرن باش يطيب ويتجمر بالباهي ممكن تزيد قرينات فلفل ورشيشة معدنوس

الارز : تاخو تقريبا 25غ زبدة تقطع فوقها بصلة صغيرة وتذوبها وبعد زيدها كأس من صوص الكالمار قبل ما يخثار وكأس ماء ساخن وكأس أرز وكعيبة هيل وملح وفلفل أكحل وكركم وخليه يغلي على نار هادية لين ينزح غطيه وخلي السخانة ترجع عليه

واخيرا أعمل نوع من السلاطة إلى تحب عليها وزين الصحنات وتأكلو بالشفاء والهناء

 

أرز بالعصبان

مكونات العصبان:
لحم وكبدة وريّة ( الرية غليها قبل وبعد قطعها مع بقية المكونات ) وقلب ومعدنوس وبصل ونعناع شايح وبرغل وهريسة عربي وفلفل مرحي وكركم وملح وتابل وكروية وفلفل اكحل وقطيرة زيت ، وتلف في الكرشة إلى تكون ولّدتها كيف الشكيرات الصغار وبعد زيد لفهم في الردى وبعد بالمصارن إلى تنظفهم بالباهي وتعدي عليهم السكينة باش يخرج إلى في وسطهم ويبقاو جويدات ورهاف برشا ، وأخيرا لف بالخيط باش ما يتحلوش
صوص الأرز:
تغلي الماء وتحط فيه العصبان بعدما تنقبو وتزيد طماطم وفلفل مرحي وفلفل أكحل وزيت وهروس عربي متاع فلفل باهي وكركم وتبل الأرز بالماء الساخن وبعد سقطرو وحطو يفور وبعد تريه مرتين بالصوص واقلي فلفل
تصمت السفناريا والحمص وتفوحهم بالملح والكركم والفلفل الاكحل