لازانيا بالدجاج

لازانيا بالدجاج المفروم
تفرم سكالوب الدجاج مع البصل وبعد تقليه في شوية زيت وتفوحو بالكركم والملح والتابل المرحي والزنجبيل وشوية ثوم وفلفل أكحل وشوية فلفل مرحي .
الصوص: تقلي بصلة ووطماطم خضراء مصموتة ومرحية وتزيدها طماطم معجونة وتفوح بالتابل والثوم والملح والرند والفلفل الأكحل والفلفل مرحي وتمرق وتحطها تطيب وخليها صوص جارية موش خاثرة
صوص باشامال :
تحط 2 مغارف زيت زيتونة ومغرفة زبدة و3 مغارف فرينة وتخلطهم بالباهي على الغاز وبعد تصب عليهم كأس حليب وكاس ماء وخلط لين تتحصل على صوص جارية كان لقيتها يابسة زيدها شوية ماء أو حليب وزيد ملح وفلفل أكحل وفي الاخير كيف تهبط زيدها جبن
اتبعي الصور في وضع الطبقات ورشي الجبن بين الطبقات وبالنسبة للباشامال تكون في الطبق والطبقة الاخيرة
رشي الجبن والموتزارلا بين الطبقات واخيرا زيد رشة موتزارلا 

 وخليها تطيب في الفرن على نار هادية

كالمار محشي في الفرن

الحشو :الشوش متاع الكالمار أصمتهم وزيدهم بصل ومعدنوس وبرغل وبسباس مرحي وكركم وملح وفلفل مرحي و فلفل أكحل وبعد شق كعبة الكالمار من الأسفل واحشيهم وبعد ارميهم في الصوص إلى تغلي

الصوص : تقلي بصلة في شوية زيت وبعد امرقها وزيدها ملح وكركم وفلفل أكحل وبسباس مرحي وكيف تغلي أرمي كعيبات الكالمار  وفي نصف الطياب ارمي كعيبات بطاطا وبعد كيف ينزح المرق حط في طبق الفرن جريرات طماطم ورصف البطاطا والكالمار وحط الكل في الفرن باش يطيب ويتجمر بالباهي ممكن تزيد قرينات فلفل ورشيشة معدنوس

الارز : تاخو تقريبا 25غ زبدة تقطع فوقها بصلة صغيرة وتذوبها وبعد زيدها كأس من صوص الكالمار قبل ما يخثار وكأس ماء ساخن وكأس أرز وكعيبة هيل وملح وفلفل أكحل وكركم وخليه يغلي على نار هادية لين ينزح غطيه وخلي السخانة ترجع عليه

واخيرا أعمل نوع من السلاطة إلى تحب عليها وزين الصحنات وتأكلو بالشفاء والهناء

 

أرز بالعصبان

مكونات العصبان:
لحم وكبدة وريّة ( الرية غليها قبل وبعد قطعها مع بقية المكونات ) وقلب ومعدنوس وبصل ونعناع شايح وبرغل وهريسة عربي وفلفل مرحي وكركم وملح وتابل وكروية وفلفل اكحل وقطيرة زيت ، وتلف في الكرشة إلى تكون ولّدتها كيف الشكيرات الصغار وبعد زيد لفهم في الردى وبعد بالمصارن إلى تنظفهم بالباهي وتعدي عليهم السكينة باش يخرج إلى في وسطهم ويبقاو جويدات ورهاف برشا ، وأخيرا لف بالخيط باش ما يتحلوش
صوص الأرز:
تغلي الماء وتحط فيه العصبان بعدما تنقبو وتزيد طماطم وفلفل مرحي وفلفل أكحل وزيت وهروس عربي متاع فلفل باهي وكركم وتبل الأرز بالماء الساخن وبعد سقطرو وحطو يفور وبعد تريه مرتين بالصوص واقلي فلفل
تصمت السفناريا والحمص وتفوحهم بالملح والكركم والفلفل الاكحل

سلاطة البطاطا

تصمت البطاطا بالملح وكيف تطيب تسقطرها وتزيدها شوية زبدة وشوية زيت وفلفل أكحل وشوية حليب وترسها بالباهي لين تولي عجينة رطبة وكالقيتها يابسة زيدها حليب وبعد اطرحها في الصحن وزينها بالتن والزيتون والعضم وفلفل بر العبيد والماييس ….. وقدمها مع الاطباق الموجودة عندك

وراطة مشوية

أنا ضد توفيح الحوت برشا وهاو علاش : الحوت مختلف طعمه من عند الله سبحانه وكيف نكثر الفاح يولي كلو بالكمون وماعادش تلقى الفارق بين أنواع الأسماك ولذلك كيف تاكل السردينة والمجل موش نفس الطعم ، نعمل خليط زيت وقارص وملح وفلفل أكحل وكركم ونحركو بالباهي ونصبو على الحوت ونخليه يبنان في الثلاجة على الاقل 2 ساعات وبعد نشوية وذوق الطعم

لحم وكبدة مشوين

تقطع اللحم شرائح جويدة والكبدة كذلك وبعد تأخو صحفة وتحط فيها زيت وملح وفلفل أكحل وكركم وكروية وقارص وتخلط الكل بالباهي وتصبو على اللحم والكبدة وتخلط الكل بالباهي وتخليه على الاقل ساعتين في الثلاجة يبنان وبعد تأخو المقلة تيفال أو قرانيت وتدهنها بالزيت وتحط فيها شرائح اللحم والكبدة وتغطيها وتحطها على نار هادية وكيف تطيب زيدها عصرة قارص ورشيشة معدنوس وتاكل بالشفاء

سلاطة روسية

هذه سلاطة مصموتة ومتكونة من جلبانة وسفناريا وبطاطا ومفوحة بالملح وقطيرة زيت وكركم وموش برشا ماء المهم تجي قد قد اي لين ينزح الماء متاعها
وبعد تعمل خليط متكون من زيت وقارص وفلفل اكحل وتقطع شوية بصل ومعدنوس وزين بالعضم والتن والزيتون ….

ساليه عائلي

العجينة :
كاس سعته 150 مل من الحليب وبنفس الكاس
نكيل كاس ماء دافئ وكاس زيت وكاس فرينة ومغرفة قهوة ملح و2 مغارف سكر وكيس خميرة فورية
خلط كل المكونات بالمكسور وخليهم يتخمرو في مكان دافئ
وبعدما يتضاعف حجم الخليط زيدو الفرينة حتى تتلم العجينة وخليها تزيد تتخمر
الحشو :
بطاطا مقطعة جويدة ومقلية مع بصل مسوتي وشوية معدنوس وبيض مسلوق وجبن وقوتا وتن واخيرا بيضة كاملة لخلط المكونات
اتبع مراحل العمل الموجودة في الصور

عصيدة الزقوقو

واحد كغ زقوقو منظف ومسوم ومرحي في رحى بحيث يخرج زيتو ممكن في البيت أو عند الرحاي 3 ل ماء للرحي والتصفية 600 غ فرينة 600 غ سكر (إلى يحبو اكثر أو أقل ممكن يزيدوأو ينقصو  ) الكريمة البيضاء : 1 ل حليب 4 فصوص بيض 4 مغارف  نشاء  سكر قدر الحاجة ترحي الزقوقو وتصفيه بالماء دون إضافة وبعد تزيدو الفرينة وتصفيه مرة ثانية وتحطو يطيب على الغاز على نار هادئة مع التحريك مدة 3ساعات كيف الملوخية حتى يقر زيتو ملاحظات هامة : عند الغليان تميّص العصيدة ما تتفجعش عادي نقص النار وخليها تطيب وبرا أقضي على روحك وحرك من حين لآخر السكر أضيفيه في النصف ساعة الأخيرة تبدا تكحال شيئا فشيئا العصيدة الناجحة تكون كيف تصبّها في الصحافي سائلة وكيف تبرد تولي كيف الياغورت لزجة لا تكون ميّة ولا قالب صابون وعليها نقاط زيت وكيف تمسها في الطبقة العلوية صبعك يبدا فيه الزيت المهم تطيب العصيدة في وقت طويل ووسعو بالكم ماتعملوش كيف ألي هي تيبس ونهبطها وتقول العصيدة طابت ردو بالكم في شراء الزقوقو يكون أسود وفرشك موش مندّي ولاّ بالح لونو وإن شاء الله عصيدتكم تجي بنينة

دجاجا مجمّر في الفرن

ممكن تكون الطبخة بالدجاج العادي
حطيت الدجاج في الماء والزيت في كوكوت وزدتو راس بصل وسنة ثوم وزنجبيل وكروية وملح وفلفل اكحل وكركم واكليل وبعد سكر علي الكوكوت وخلي الدجاج يطيب وكيف ينزح المرق خرج الدجاج سوتيه في شوية زيت حتى يتجمر والمرق يكون خاثر . اصمت مقرونة وخلطها فيه وزين الصحن كيما تحب وباي سلاطة تحبها