عصيدة سميد

تأخو 2 كيسان ماء خليهم يغلو شوية و نص ملعقة صغيرة ملح وزيت زيتون تقريبا نص فنجان  تمام خليهم يغلو
وبعد الغليان نحي منهم كأس  اللي كيلت بيه   وخليها ع جنب 
تعالي انت هبط طنجرتك وحطي كأس سميد رقيق وطوووول ابدي حركي بالطريقة المعروفة باش يكعبرش الدقيق
حط طنجرتك عالنار وصبي الكأس  اللي خليته ع جنب وماتحركها ولكن قسمي العجينة بالمغرفة ع أربع وخليها تغلي باش يطيب الدقيق ع نار متوسطة ليين تشوفي الماء نزح لكن مش نهاااائي تشوفها خترت برشا ابدا حركي لين  تسمعي صوت طربيق اللوبان هههههههه
نزليها واعطيها تعصيدة تاااني وكوري في صينية لوح أفضل باش تجييك مسبوكة وهدا السر ياغالية
وصحتيييين
وما تنساش زيت الزيتون باش تملسي بيه ويعطي لمعة

انتصار

 

كسكسي بالخضروالقديد

حط الماء يغلي ومعاه زيت وطماطم خضراء وطماطم معجونة وفلفل اكحل وكركم وفلفل مرحي وشوية طماطم شريحة وملح و قديد وحمص وبصل و3 سنات ثوم وفول وفلفل أحمر شايح وفلفل ملاحي ووريقات سلق وسفناريا وتحط الكسكسي يفور وبعد في نصف الطياب تريه بالمرق ورجعو يفور وبعد أصمت العضم واقلي الفلفل وسقي كسكسيك

 

خبز قمح

خبز قمح (integrale ):
800 فرينة قمح بالنخالة ، 25 غ خميرة 2م ص سكر،2م ص ملح،نصف كاس زيت ماء
نخلط الخميرة مع 100غ و 2م ص سكر ونخليهم يرتاحو 15دق
بعد نصب الخميرة على الفرينة 700 غ و الزيت و نعجن بالماء نعجنها مليح وتنجم تعجن بماكينة العجن للي عندو نخليها ترتاح ساعة و بعد نفورم الخبز و نخليه يرتاح ربع ساعة و ندخلو للفرن يكون سخون.

 نزهة

مثاومة بالسفن

تسمط السفن (كلب بحر)في الماء دوب ما يهز الغلو طفي و صفيه وبدل ماء جديد و خليه يغلي على نار مش قوية وبعد قلي راس ثوم مهرس و 2مغارف طماطم معجون و مغرفة هريسة عربي و تابل و شوية كروية و فلفل اكحل و كركم و ملح و ارمي السفن و امرق بالماء متاعو و خليه يغلي شوية لين تختار المثاومة حط رشة كمون و طفي وتاكل بالشفاء

 نزهة

قاتو لفطور الصباح

تركض حارة عضم كاس و نصف سكر و باكو فانيليا و تزيد نصف كاس زيت و نصف كاس حليب و ثلاث كيسان فرينة و باكو خميرة و تخلط و تقسم الخلبط على اثنين شطر تزيدو زاست متاع كعبة قارس و شطر تزيدو مغرفة ماكلة كاكاو و تدهن الطبق بالزبدة و تصب الخليط واحد وسط الآخر الابيض بعد الشكلاطي حتى تكمل و تطيبها 35 دق على 180 درجة

 كلثوم بالحاج

هريسة دياري

مقرونة بالصوص :
تقلي بصلة وبعد تزيدها طماطم معجونة وثوم وبسباس مرحي وامرق وفوح بالملح والكركم والفلفل مرحي وشوية هريسة عربي وارمي وريقات رند وشوية فلفل اكحل
أصمت المقرونة إلى تحب عليها واقلي قرينات فلفل
:هريسة عربي دياري :
تصمت 2 كعبات طماطم ومعاهم راس بصل وراس ثوم وبعد تزيدهم فلفل احمر شايح وكيف يطيبو سقطرهم وارحيهم وفوح بالملح والكروية وزيت الزيتون وزين كيما تحب

مقرونة بالدندون العربي

مقرونة بالدندون العربي
تقلي الدندون والبصل بالباهي في الزيت وبعد تزيدو طماطم معجونة وطماطم شريحة وراس ثوم مهرس و امرق وزيد تابل وكركم وفلفل اكحل وملح ووريقة رند وفلفل مرحي وخليها تغلي وكيف تطيب اصمت المقرونة وما تطيبهاش برشا وخلط واقلي معاها قريّن فلفل حار وماتنساش رشيشة جبن

 

مقرونة بالكرام فراش

تاخو صدر دجاجة وتقطعو جويد مع راس بصل وزيدهم زيت وتقليهم وبعد تزيدهم ماء وتفوح بالملح والكركم وتابل وكروية وزنجبيل وشوية اكليل حي وتخليه يغلي لين يشيح من ماء تزيدو حكة كرام فراش وشوية معدنوس وتغليه شوية وتطفي
تصمت المقرونة بالملح وبعد تخلطها بالصوص وتزيد عليها الجبن وزين الصحنات

مقرونة بالحوت

تقلي بصلة صغيرة وزيدهم كعبة طماطم خضراء مقشرة وكيف يتقلاو تزيدهم مغرفة كبيرة طماطم معجونة وشوية طماطم شريحة وثوم وتابل مفوح وامرق وزيد فلفل مرحي وكركم وملح وفلفل اكحل وارمي الحوت في كسكاسو وخليها تغلي حتى تطيب وبعد اصمت المقرونة وخلطها

شربة تشيش بالحوت

تقلي بصلة وطماطم خضراء وتزدهم مغرفة قهوة طماطم معجونة وامرق شوية وزيد ملح وفلفل أكحل وكركم وشوية فلفل مرحي وكيف تغلي ارمي التشيش ( فنجال صغير ) وكلافس وخليها تغلي على نار هادية ، وبالنسبة للحوت تنظفو وتحطو يتصمت وحدو في الماء وكيف يطيب صفي الماء متاعو بصفاية جويدة وزيد امرق بيه الشربة وسبل الحوت وارميه في الشربة وهكة تضمن شربة بنينة بالحوت ومن غير شوك