شكشوكة بالقديد الجديد

شكشوكة بطاطا بالقديد الجديد
اول حاجة الكروية مرحية فرشكة ماتخوش متاع السوق الحاضرة لا بنة ولا ريحة
تقشر راس ثوم وقطعو ماتهرسوش
اصمت 2 كعبات بطاطا كبار بالملح والكركم
وابدا قلي في زيت زيتونة 4كعبات طماطم خضراء والثوم المقطع مع بعضهم وكيف تتقلي زيدهم القديد وشوية بالكل طماطم معجونة وكيف قريب تلصق ارمي الفلفل ( اخضر وملاحي وشايح )
وصب البطاطا الي تكون طابت في الماء متاعها وخاثرة اي شوية ماء فيها وماتبزعش الماء صبها بكلها وحرك وزيد فلفل مرحي موش برشا
رش الكروية وفقر العضم
واقلي فلفل ملاحي وفلفل اخضر وزين الصحنات
ملاحظة :
مايلزمش الطماطم تصب عليه ماء باش ماتميصش يلزمها تكون خاثر

ابتسام

لفت المهدية

احنا في المهدية نقولو لفت وبقايع اخرى مرقة لفت
انا ناخذ 2رباطي لفت و2رباطي صلق نقطعهم جويدين واذافيه ريوس نضفهم ونقطعهم زادة ونمجو برشا في الماء ونحطه يطيب في ماء نحطو معاه حمص وفول منفخين من قبل وكيف يطيبو الفول والحمص راهو هو طاب نشوف الماء متاعو انقص منو اذا برشا ونزيدو كاس كبر زيت ومغرفة كبيرة طماطم معجون ومعرفتين كبار هريسة عربي وفلفل ملاحي وملح وتابل ونخليه يشكشك حتي يركح زيته
المغرفة كبيرة الي نغرفو بيها مش متاع اكل

سندس مساعد

توست محشي

خذيت كعبة التوست وعملت فيها مربع وحطيتها في المقلة على نار هادية وفقرت فيها عضمة وغطيت المقلة
خذيت الكعبة الثانية ودهنتها بالهريسة و2جبن مثلثات وتن ورشيت جبن فوندون وبعد هزيت التوست الاول وحطيت التوست الثانية على المقلة وفوقها الاولى ورش عليها ملح وفلفل اكحل وزدت غطيتهاوبعد تلقاها طايبة

شكشوكة قرع

تصمت القرع والملح حتى ينزح تماما من الماء
تقلي بصلة كبيرة بالباهي وتزيدها 5 كعيبات طماطم خضراء حتى تذبال بالباهي وتطيب زيدها 7 قرينات فلفل مقطعين والقرع المصموت وذوق الملح كان ناقص زيدها وشوي فلفل مرحي
المهم ما تزيدش ماء يلزمها تكون شايحة باش ما تميصش

كوشة علوش

كوشة علوش
تصمت اللحم والبصل والزيت وكركم وفلفل اكحل وملح ومغرفة صغيرة طماطم معجونة لين يطيب و بعد تحطو في طبق الفرن وتزيدو حلقات طماطم خضراء وفلفل وقارصوبطاطا وبعد تدخلو 30 دق للفرن يشعل من الجهتين
فما شكون يحبو شايح وفما شكون يخلي فيه شوية مرق باش يعديو
ماتنساش رشيشة معدنوس

عجة بغلال البحر

تنظف الكروفات والمول والشوباي والكالمار ، وبعد في الطنجرة تحط زيت و3 كعبات طماطم خضراء تسوتيهم وتزيدهم الكروفات والشوباي مقطع مع الكالمار – يكون غطستهم مسبقا في الماء المغلى – وبعد زيد مغرفة صغيرة هريسة وارمي المول وفوح بالملح والفلفل الأكحل وشوية كركم وفلفل مرحي وغطي وخليها تشكشك لين تطيب كان تحب فقر العضم كان ماتحبش زيدها رشة معدنوس وتأكلو بالشفاء

قاتو بالفاكية

عملت جينواز فاني وجينواز شكلاطة بالنسبة للجينواز فاني تركض أربعة عضمات مع باكو فاني وخمسة مغارف سكر ومغرفة صغيرة جيلك تركضهم مليح ثم تزيدهم خمسة مغارف فرينة مغربلين وتحطها في الصينية في الفور وتحضر الجينواز الشكلاطة وهي نفس طريقة الجينواز الأولي اما تعوض زوز مغارف فرينة بزوز مغارف كاكاو ومن بعد تحضر كريمة الزبدة 300غ زبدة طرية تركضها مليح ومن بعد تزيدها 200غ سكر محور وحكة نستلي ومغرفة نسكافيه محلولة في شوية ماء وتركض كرام شانتي وحدها وتقسمها في اثنين النصف تزيده لكريمة الزبدة والنصف الاخر تخليه ابيض وتقسم كل جينواز علي اثنين وتاخذ نصف جينواز فاني وتسقيها بشحور خفيف وتحط كريمة الزبدة وتستويها ثم تحط نصف جينواز الشكلاطة وتسقيها وتحط كريمة الزبدة ومن بعد تكمل تحط جينواز الفاني وتسقيها وتحط كريمة الزبدة ومن بعد تكمل تحط جينواز الشكلاطة وتسقيها وتغلف القاطو بكلها بكرام شانتي وتذوب الشكلاطة مع شوية زبدة وتصبها من فوق وتزين بلوز إيفيلى وترش في الأجناب بالفستق

 مفيدة حمزة

كسكسي رأس السنة الهجرية

اصمت الفول وحدو بالقارص وقت إلى يطيب زللو زيدو ملح وفلفل أكحل وكركم
تصمت الحمص وحدو وقت إلى يطيب زيدو ملح وفلفل أكحل وكركم
بل الزبيب بالماء الساخن وبعد خلطو مع الحمص الطايب
أصمت العضم بكعيبة ملح باش يتقشر فيسع
أقلي قرينات فلفل اخضرلعشاق الفلفل المقلي
صوص الكسكسي :
طماطم معجونة وزيت وكركم وفلفل اكحل وفلفل مرحيو بصلة صغيرة قطعها جويدة وقديد :عصبان ومرقاز ولحم ( أغسلو كان القديد متاعك مالح )
ماتحطش ملح في الصوص
وتزيد طمطومة خضراء
قريّن فلفل أحمر
في المهدية يرميو وريقة سلق باش العام يجي أخضر أما في المناطق الاخرى بلاش على خاطر يطيبوه ليلة رأس السنة
سقي الكسكسي
وزينو
تاكلو بالشفاء والهناء

عين سبنيورية دون فرن

تحضّركمية من اللحم المفروم والبيض المسلوق ،نضع عليه الملح والفلفل الاكحل  ووالنعناع والثوم والتابل ، ثم كريات صغيرة فى حجم متوسّط ، ثم تلف البيضة باللحم ونقليها فى الزيتوتسقطرها بالباهي وبعد تقصها بسكين حاد