مسلة المهدية

قاتو عادي

قاتو عادية لفطور الصباح
تاخو 3 بيضات بحرارة الغرفة وكاس سكر و1 فانيليا تركضهم بالباهي حتى تتحصلي على خليط كريمي ابيض زيدو 3/4 كاس حليب ونصف كاس زيت نباتي و2 مغارف حليب بودرة و 1 خميرة و3 كيسان مغربلين فرينة وتخلطهم وتحطهم في المول وترش عليهم كعيبرات الشكلاطة وطيبها في الفرن على 180°
وكيف تطيب وتبرد ذوب 150 غ شكلاطة في حمام مائي مع 20 غ زبدة و2 مغارف حليب
وكيف تذوب هبطها وخليها تيبس شوية وزين بيها الخبزة

فلفل محشي

فلفل محشي صيافي وخفيف
تغسل الفلفل وتنحي القطمورة والزريعة وتشقو من الاسفل
تاخو اللحم والكبدة وتطيبو بالباهي في الكوكوت لين ينزح من الماء متاعو
تقطعو حويد وتزيدو راس بصل مقطع جويد وحزمة معدنوس وقطيرة زيت ودوبما تسوتيه باش يذبال كل شيء وتفوحو بالملح والكركم والفلفل الاكحل وسنة ثوم جويدة وتابل
وتزيد الخليط مغرفة شابلور ومغرفة فرينة وعضمة وتخلط الكل بالباهي وتحشي بيه الفلفل
وبعد تغطس قرن الفلفل من جهة الحشو بالفرينة وتقليهم وتسقطرهم
الصوص :
هي عبارة على قارنيتور
في طنجرة تحط شوية ماء وزيت وكعيبة بطاطا مقطعة وراس بصل مقطع غليظ وزيت وفلفل اكحل وكركم وملح وسنة ثوم وتابل وخلي الصوص تغلي لين تنزح وتطيب البطاطا بالباهي
وفي طبق الفرن
تحط الصوص وترصف فيها الفلفل المحشي وتحط الجبن الموتزارلافوق الفلفل وكان فما في العائلة شكون مايحبش خلي بايو بلاش ودخلو للفور وشعل عليه من الاعلى باش يذوب الجبن وتتجمر البطاطا
اعمل السلاطة الي تحب عليها وتاكلو بالشفاء

قلاية باللحم

قلاية باللحم
تحط في الكوكوت لحم وماء وزيت وكركم وتسكرها وتخليها تغلي
وبعد 25 دق حل عليها تلقى ماها نقص برشا وقريب ينزح وارمي ملح وبطاطا وفلفل اكحل وكروية
وسكر عليها 5 دق
وبعد حل عليها فقر العضم وسكر الكوكوت من غير ما تشعل الغاز 10 دق تلقى العضم مروب وطايب
زيد رشيشة معدنوس وتاكلو بالشفاء

Croquettes au poulet

Croquettes au poulet
تقطع سكالوب الدجاج مكعبات
تحضر الخليط للتفويح :
زيت وزنجبيل اخضر وعصرة قارص و2 سنات ثوم وراس
بصل صغير وفلفل اكحل وفلفل مرحي وكروية وملح
وزيدو طابع جبن
فوح الدجاج وحطو يبنان ساعة على الاقل
وبعد لفو في الفرينة ثم البيض واخيرا في الشابلور
متاع الخبز
واقلي في زيت كثيف وعلى نار هادية باش يطيب من
الداخل
وزين الاطباق كيما تحب

عصير إجاص

لامواد حافظة لا ملونات 😊😊😊😊بيو
ان شاء الله صحة وعافية للجميع ❤
تنظف الاجاص وتقشرو وتقطعو وفي نفس الوقت تدهنو بالقارص باش ما يكحالش ويتبدل لونو
وكيف تتحصلي على كغ اجاص زيدو 400 غ سكر ولتر ونصف ماء وحطو يغلي لين يطيب الاجاص تقريبا 30 دق
خليه يبرد وبعد ارحيه
حطو في دبابس بللر في الكونجيلات كان تحب تكنجلو وكان للاستهلاك ممكن تزيدو شوية سيتروناد منزلي او خليه خاثر واعصر معاه الفراولو ويولي عندك كوكتال متميز
المهم اللون نفسه لا يتغير وبنة عالمية

كسكسي بالعصبان الملفوف في السلق

كسكسي بالعصبان الملفوف في السلق
العصبان :
قطع لحم وكبدة وكلاوي وقلب المهم الي عندك وحزمة معدنوس و 2 رؤوس بصل جويدين وفوح بالملح والكركم ومغرفة هريسة عربي من غير ثوم وفلفل اكحل تابل وكروية ونصف كاس صغير برغل جويد وقطيرة زيت زيتونة وتخلطهم بالباهي
تذبل اوراق السلق معناها دوبما تغطسهم في الماء الي يغلي وتخرجهم فيسع وتحل الورقة في يدك وتعبيها بالخليط وتسكرها وعلى البلاصة لفها بالخيط حتي تتحصل على عصبانة مزيانة
الصوص :
تحط ماء وزيت وكيف يغلي ارمي العصبانات بعدما تنقبهم
وتفوح بالطماطم معجونة ( لكل كاس كبير كسكسي مغرفة ماكلة مليانة طماطم ) و2 مغارف فلفل مرحي وملح وكركم وفلفل اكحل
بل الكسكسي بقطيرة زيت وكركم وماء وخلي يتشرب وبعد حطو يفور
وفي نصف الطياب تريه بالمرق ورجعو يفور مرة ثانية
اصمت الحمص والسفناريا وحدهم بماء الماجل وفوحهم بالملح والكركم والفلفل الاكحل
سقي الكسكسي واقلي الفلفل