طبق مرقاز مشوي

بيتزا سبيسيال

بيتزا سبيسيال
العجينة :
كاس حليب + كاس ماء دافئ +20 غ خميرة خبز + 2 مغارف صغار سكر + مغرفة صغيرة ملح
تخلطهم بالباهي وتخليهم يتخمرو 15 دق في مكان دافئ وبعد تزيدهم 1/2 كاس زيت نباتي 2 مغارف كبار حليب بودرة ( كان ماعندكش كوش مشكل تنجم تستغنى عليهم ) + فرينة حتى تتلم وخليها ترتاح 10 دق وحضر الصوص
الصوص : تصمت طماطم خضراء وتسقطرها وترحيها
وتقطع 2 بصلات كبار جويدين وتقليهم وتزيدهم 1/2 مغرفة ماكلة طماطم معجونة وبعد تصب الطماطم المصموتة و 3 سنات ثوم مقطعين جويدينوتخليها تشكشك وتفوح بالملح والكركم والفلفل الاكحل والتابل والكروية والزعتر والاكليل الحي وخليها ليت تخثارارمي فيها حلقات فلفل أخضر
تحل العجينة وتحط فيها الصوص وترش الموتزارلا وكان تحبها سبيسيال بالعضمة فقر عضمة ودخلها للفرن تطيب كلها مع بعضها ، وكان تحبها بلاش حطها تطيب وكيف تخرجها رش عليها المعدنوس والتن والزيتون وتاكلو بالشفاء

حلقات البصل بالكروفات

حلقات البصل المحشية بالكروفات
تفوح كعيبات الكروفات بالملح والفلفل الاكحل وتسوتيهم
تحضر حلقات البصل وتحطهم في المقلة مدهونة بالزيت
تعمل خليط متكون من بيض وبصل ومعدنوس وملح وفلفل اكحل وجبن وقطع فيه كعيبة او 2 كروفات وصبهم في حلقات البصل كيف تسخن المقلة وزينهم بكعيبات كروفات وفلفل بر العبيد وغطي المقلة وكيف يطيبو كولوهم مع السلاطة

تالياتلي بالكروفات

تالياتلي بالكروفات
تصمت 8 كعبات طماطم خضراء وبعد سقطرهم وارحيهم
وقلي بصلة صغيرة في الزيت وزيدها الطماطم المرحية وفوح بالثوم وشوية تابل زيدها الملح والفلفل الاكحل والكركم والكروفات وريشة حبق اخضر وخليها تشكشك حتى تخثار وتطيب
اصمت التالياتلي وزين الصحنات

مرقة قناوية بالدجاج العربي

مرقة قناوية بالدجاج العربي
انا اليوم استعملت دجاج عربي في المرقة
تقلي دجاج و2 رؤوس متوسطين بصل وكعبة طماطم خضراء وتزيدهم مغرفة ماكلة ناقصة طماطم معجونة وبعد تمرق وتفوح بالملح والفلفل الاكحل والبسباس المرحي وشوية فلفل مرحي والكركم وشوية زنجبيل وخليها تغلى على نار هادية حتى تطيب وتقر زيتها المرقة تكون موش مطمطمة وخفيفة وبنينة
وفي الاثناء ننظف القناوية ونقصلها الطنقورو ونشقها من الاسفل ونخليها في ماء +ملح ساعة تقريبا
وبعد اغسلها ونحي التلعبين وسقطرها بالباهي واقليها حتى تصفار
كان القناوية كبيرة ماتكثرش وكان صغيرة موش مشكل
كيف تطيب المرقة رش عليها القناوية وماتحركهاش خليها تشكشك 4 دق وطفي عليها النار
كان تحب اقلي بطاطا وفلفل او لا وتاكلو بالشفاء

بقلاوة البرمة التركية

بقلاوة البرمة التركية
تشري البات فيلو حاضرة
تقلي رطل لوز وترحيه وتزيدو 50 غ سكر
300 غ زبدة ذوبها بالباهي لين يتنحى حليبها
تحط الورقة مثل الصورة وتدهنها بالباهي بالزبدة وتستعمل عودة من الخشب باش تطوي عليها الورقة
ترش اللوز
تلويها بالباهي
تضغط عليها من الاجناب باش تولى ماتلاسي
ترصف الكعاب واحدة واحدة
وماتنساش تغطي الكعاب بمنديل نادي باش ما يشيحش
وتدهنهم من جديد بالزبدة
كيف تكملهم حط الطبق مغطي في الثلاجة باش يبرد
وبعد 2 ساعات
قص الكعاب وحطهم يطيبو في الفور على 180 °
تحضر عسل متاع بقلاوة عاقد
وكيق تطيب اسقيها بالعسل وزينها بالفزدق
وخليها تتشرب 6 ساعات على الاقل
وبعد قص الكعاب
وحطهم في الكاسات
وتاكلو بالشفاء