تارت البرتقال بالمورانق

عجينة التارت :
250 غ فرينة
125 غ زبدة
2 مغارف سكر محور
فص عضمة
ذرة ملح
وتكمل تعجنها بالحليب
كريمة البرتقال :
250 مل عصير برتقال
250 مل ماء
4 مغارف كبار نشا
3 مغارف سكر
تخلط الكل في البارد وتزيدهم
25 غ زبدة
وطيبهم على نار هادية وبعد صبهافي التارت الي طيبتها
المورانق:
4 ابيض بيض
200غ سكر محور
كيس فانيليا
ركضهم بالباهي
تتحصلي على خليط كريمي حطو في البوش وزين بيه التارت فوق كريمة البرتقال
عاود دخل التارت للفور الشاعل 5 دق وبعد شعل عليها الفور من فوق دوبما تحمار خرجها تلقاها يبست وشدت روحها

الاسكالوب باني

كفتة البروكلو :اصمت البروكلو بالملح والكركم وسنينة ثوم ووريقة رند ، وبعد تسقطرووتصمت كعبة بطاطا وترفسهم بالباهي وتزيدهم معدنوس وبصل جويدين وجبن وفلفل أكحل وتابل مفوح بالثوم وعضمة وزدتها مغرفة هريسة دياري كان تحب و2 مغارف كبار فرينة وتخلط بالباهي بحيث تتحصل على عجينة ، اعمل كرات ولفهم في الخبز المرحي ( شابلور) وبعد أقليهم على نار هادية في شوية زيت

الصوص الباردة : 2 طوابع جبن مثلث أو مربعات ومعاهم نصف علبة كرام فراش وعصير نصف كعبة قارص وملح وفلفل أكحل وقطيرات خل ونصف كأس تاي زيت زيتونة وارحيه في المكسور وصبو فوق السلاطة

 الاسكالوب : تعمل خليط متكون من زيت واكليلي وملح وكركم وكروية وفلفل أكحل وزنجبيل وقارص وتفوح بيه الاسكالوب وخليه يبنان ساعة على الاقل في الثلاجة وبعد لفو في الفرينة ثم البيض ثم الشابلور واقلي على نار هادية

ravioli maison

البات:
تخلط 3 بيضات ونصف كاس تاي زيت وذرة ملح وفلفل اكحل وتزيد الفرينة لين تتحصل على عجينة
الحشو :
لحم مفروم تقليه مع بصل وتفوح بالملح والكركم وجوز الطيب وفلفل اكحل وكيف يطيب زيدو جبن
الصوص :
تصمت 4 كعبات طماطم وتسقطرهم وترحيهم الصوص: تقلي نصف راس بصل كبير وتزيدو 1/2 مغرفة طماطم معجونة وتصب عليه الطماطم المرحية وتخليه يتقلي وبعد تمرق وتفوح بالملح والكركم والفلفل الاكحل وتابل وثوم ووريقة حبق وفلفل مرحي وتخليها تطيب ، تكون الصوص خفيفة باش ماتوليش عاقدة برشا ومطمطمة
وبالنسبة للرافيولي تتحط في بلاتو متاع فور او السيراميك وتصب عليها الصوص والجبن الفوندو والموتزارلا و كان تحب تعمل شوية باشامال خفيفة وفوحها بالملح والجبن والجوز الطيب تخليها تطيب في الفرن لين تشيح وتتجمر

عين سبنيورية بالسبناخ

تسمط السبناخ بشوية ملح و بعد تنحيلو ماه وتخليه على جنب و تسمط 4كعبات عضم
تاخد 600 غ لحم مفروم وتفوحو بالفلفل اكحل ،ملح ،رشة جوزة الطيب noix de muscade) شوية معدنوس ،بيضة نية و 80 غ خبز مرحي و50غ فرماج مرحي وتخلطهم مليح و بعد تحطهم فوق ورق الفرن و تعمل بيها مستطيل و تحط فوقو السبناخ مقطع وبعد فرماج مقطع دوائر و من فوق البيض الطايب وحدة بجانب الاخرى و بعد نلويها بمساعدة ورق الفرن و نسكرها من الشيرتين و نحطها في الثلاجة نصف ساعة بعد نخرجها و نحل ورق الفرن وندهنها بشوية زيت و نسكرها و نحطها في بلاتو و ندورها بالبطاطا مقصوصة مفوحة بفلفل اكحل و ملح و شوية كليل و شوية زيت و ندخل البلاتو للفرن 40 دق على 180 200درجة انت والفرن و كيف نخرجها نخليها تبرد بعد نقصها

 نزهة

tiramisu

Recette

5 بيضات

 .250g mascarpone

. cacao

.500g biscuit langue .de chat

.قهوة خفيفة.افصل ابيض العظم عن الاصفر وركض الابيض بقرصة ملح حط فيه حتى يولي كريمة بيضاء موس تم ركض. الاصفرمع تلاتة مغارف سكر حتى تولي كريمةوزيد الماسكربون لخليط الاصفر وزيد فوقه موس ابيض العظم. واقلب وامزجوا مع بعضهم بسياسةحتى فين يدخلوا في بعظهم بعد غطس البسكويت في قهوةخفيفة واعمل فرشة في طبق وغطيها بالخليط الي تحصلت عليه تنجم تزيد فواكه جافة والا كعيبرات الشكلاطة بين الطبقة والطبقة  وتكمل هكاكة وتفرش طبق متاعك ومن الفوق رش غبرة الكاكاو

أميرة القايد

هلالات باللوز والفزدق

125غ زبدة طرية 150 غ سكر محور نخلطوهم و نزيدو ساشي فانيليا و شطر كاس نشاء و 2 بيضات و فص بيضة و شطر باكو خميرة قاطو و نلمو بالفرينةو نعمل كعبورات٢ قد الجوزة و نبرموهم على الرخامة و نشكلو هلال و ندهنوه بأبيض العضمة و نغطسوه في الفاكية المهروشة و بعد نطيبوهم ربع ساعة في الفور مسخن على 170درجة

كلثوم بالحاج

كيكة الشكلاطة والبرتقال

كيك الشكلاطة والبرتقال :
250 فرينة، 3 بيض ، 200 سكر و تنجم تنقص ،رشة ملح ،1 خميرة قاطو ،100مل عصير برتقال ،بشر برتقالة،100مل زيت نباتي ،
80 غ كعب شكلاطة صغار، 30 غ كاكاو
تركض البيض والسكر مليح وتزيد عصير البرتقال والزيت وديما تركض وبشر البرتقال والفرينة مخلطة مع الخميرة ورشة الملح و مغربلة و بعد تقسم الخليط على اثنين و تزيد 30 كاكاو لنصف الخليط وكعب الشكلاطة وتخلط مليح وبعد تصب في قالب 24 صنتمترالخليط الاول والثاني و تدخلها فرن 180 د 45 دق انت والفرن