كفتة نازلي وشكشوكة

مكونات الكفتة : نازلّي مصموط ومسبل بصل مذبّل في شوية زيت ومعدنوس وملح وفلفل اكحل وكركم وفلفل مرحي سنينة ثوم وتابل و2 مغارف كبار فرينة و2 عضم وتخلط المكونات بالباهي وبعد تلفهم في الشابلور وتقليهم على نار هادية

الشكشوكة : تقلي في طنجرة تيفال الطماطم والثوم مقطع بالباهي وبعد تزيد فلفل أخضر وكروية وشوية فلفل مرحي وتفقر العضم

كسكسي أسمر بالجغالي

تقلي الفلفل وتخرجو من الزيت
ترمي بصلة مقطعة جويدة وكعبة طماطم خضراء وبعد شوية تزيدهم 2 مغارف كبار طماطم معجونة وشوية طماطم شريحة وتمرق وتفوح بالملح والكركم والفلفل مرحي وبعد تزيد القرع وبصل صحيح وتخليه يغلي
تبل الكسكسي بالزيت والماء وتحطو يفور
تقشر الحوت وترش عليه شوية ملح وفي نصف الطياب اغسلو وارميه يغلي في المرق
تري الكسكسي بالمرق ورجعو يفور
وكيف يطيب سقيه وتاكلو بالشفاء

مفيدة حمزة

مرقاز مشوي

تقلي بطاطا وتحضر سلاطة تونسية بالفقوس والطماطم والبصل وفرينات فلفل أخضر مقلي وكعيبات طماطم وأخيرا رشة هريسة وتأكل بالشفاء والهناء

ابتسام

عضمة مقلية

الصحين هذا ديما حاضر في البيت التونسي وتفوح البيضة بالملح والفلفل الأكحل

حوت مقلي وصلصة

قلي الطماطم الخضراء بالباهي مع سنينات ثوم مقطعين جويدين وتزيدها شوية طماطم معجونة وهريسة عربي وتفوح بالفلفل مرحي والكروية والثوم

صحن تونسي

تعمل سلاطة مشوية وفوقها سلاطة خضراء بالفقوس والطماطم والبصل مقطعة جيدة وتفوحهم بشوية ملح وتحطهم فوق السلاطة المشوية وفوقهم بطاطا مصموتة وعضم مروّب وتن وهريسة وزيتون وكبار ومعدنوس وزيت زيتونة في الاخير

ريم المنزلي

 

صحن تونسي

تقلي بطاطا وقرع وفلفل وطماطم مع ثوم وعضم وبعد تاخو الدجاج والكبدة وتفوحو بالفلفل اكحل والكروية والملح والاكليل وزيت زيتونة وتخليه يغلي حتى يخثار صبو على طبقات المقلي وزين الصحنات ، كفتة البروكلو :
تصمت البروكلو بالكركم والملح والثوم ووريقة رند
وبعد تسقطرو وترفسو وتقطع معاه بصل ومعدنوس وهريسة عربي بالثوم وفلفل أكلح وملح وتابل مفوح وعضمة و2 مغارف فرينة ومغرفة خبز
تعمل قريصات صغاروتحطهم يتشواو في مقلة تيفال دوبما تدهنها بالزيت على نار هادية

كفتة البروكلو

صمت البروكلو بالملح والكركم وسنينة ثوم ووريقة رند ومعاه كعبية بطاطا، وبعد تسقطرو بالباهي وترفسو بالباهي وتزيدو معدنوس وبصل جويدين وجبن وفلفل أكحل وتابل مفوح بالثوم وشوية زعتر وعضمة وزدتها مغرفة هريسة دياري و2 مغارف كبار فرينة ومغرفة خبز مرحي وتخلط بالباهي بحيث تتحصل على عجينة ، اعمل كرات ولفهم في الخبز المرحي ( شابلور) وبعد أقليهم على نار هادية في شوية زيت

مقرونة بالصوص والجبن

تقلي بصلة ومعاها 4 طماطم خضراء تصمتهم وتسقطرهم وترحيهم وبعد تزيدهم طماطم معجونة ورأس ثوم مهرس مع تابل ووريقة رند وملح وفلفل أكحل وكركم وفلفل مرحي وكيف قريب تطيب زيدها رشة زعتر وقرين فلفل أخضر قصو جرار ، أصمت المقرونة ومعاها قطيرات زيت وبعد زين صحنك بالعضم المصموت والسلصة كان تحبها والزيتون والتن والجبن

بيتزا تركية

البات :
150 مل حليب
150 مل ماء دافئ
2 مغارف قهوة سكر
مغرفة قهوة ملح
1 خميرة فورية
تخلطهم بالباهي وتخليهم يتخمرو في مكان دافئ
وبعد 15 دق زيدهم 150 مل زيت نباتي
وزيد الفرينة حتى تتلم العجينة وزيد خليها تتخمر حتى يتضاعف حجمها
قصها في شكل دوائر واجبدهم شوية وعبيهم ب
هريسة وبعد بصل مسوتي
مع المعدنوس
وبعد عضم مصموت
جبن فوندون وموتزارلا
كبار
تن
واخيرا بيضة ورشة زعتر وملح وحلقات فلفل بر العبيد وزيتون
طيبها في الفرن على 180 °
وكيف تطيب زيدها معدنوس مقطع وتن فرشك
وتاكلو بالشفاء