كسكسي بالخضر

حط الماء يغلي ومعاه زيت وطماطم خضراء وطماطم معجونة وفلفل اكحل وكركم وفلفل مرحي وشوية طماطم شريحة وهريسة عربي كان تحبو حاااار وملح و قديد وحمص وبصل و3 سنات ثوم وفول وفلفل أحمر شايح وفلفل ملاحي ووريقات سلق وسفناريا وكرنب وبطاطا وتحط الكسكسي يفور وبعد في نصف الطياب تريه بالمرق ورجعو يفور وبعد أصمت العضم واقلي الفلفل وسقي كسكسيك

طاجين بروكلو

تسمط البروكلو و تسقطرو مليح و ترفسو بفرشيتة ، تقطع الدجاج صغيير و تفوحو بالكركم الفلفل الاكحل الملح و الزعتر و مغرفة زيت زيتون و بصلة مقطعة جويدة و تحطو يطيب في شوية ماء تخلط الدجاج مع البروكلو مع معدنوس مقطع جويد، جبن مرحي و طوابع ،شوية خبز مرحي او تراپي خبز بارد و عظم . تحطو في الطبق و تدهن من فوق بفص عظم مركض و تحط في الفور ،،،، بالشفاء

رجاء علاية

طبق أرز بالعلوش

اول حاجة حطيت اللحم يطيب في الكوكوت وفوحتو بالملح والكركم والزيت والفلفل الأكحل وكيف طاب عريت عليه وحطيت 2 كعبات بطاطا يغليو مع اللحم وزدتو كروية ، وبعد نحيت اللحم والبطاطا وشوية من الماء متاع اللحم وحطيتو في طبق الفرن ورشيت عليه كروية وفلفل أكحل وقطيرات زيت ودخلتو يتجمر في الفرن وتكمل البطاطا الطياب متاعها ، وبالنسبة للأرز خذيت 2 كيسان وصبيتهم في الطنجرة ومعاهم 2 رؤوس بصل وكعيبة هيل وفلفل أحمر مقطع جويد وملح وصبيت عليهم 4 كيسان ماء اللحم وكان لقيت الماء أقل كمل بالماء العادي وغطيه وخليه يغلي وحدة وحدة ، الطنجرة إلى تطيب فيها لازم ما تلصقش وكيق يشيح الأرز ذوق الملح وزيد كان لقيتو ناقص ورشيشة معدنوس وغطيه وخلي ترجع عليه السخانة وبعد زين الصحنات كيما تحب ، أنازدت مايونيز كيما تعرفو يحبوها الأولاد وهي زادة معمولة في يومها ودياري

Brochettes de lotte

سمك : نظفو وقصو في شكل مكعبات وبعدوحضر خليط من قارص وزيت وملح وفلفل أكحل وشوية كمون وتابل مفوح بالثوم وصبو على الحوت وخليه يبنان في الثلاجة مدة ساعتين على الاقل،واعمل قطع طماطم وقارص وفلفل وحضر السفافد كيما في الصور وحطهم في الفرن وشعل عليهم من الاعلى حتى يطيبو ويتجمرو

الأرز : تقلي بصلة كبيرة وتصب كأس أرز و 2 كيسان ماء وتفوح بالملح وسنة ثوم وزنجبيل والاهم عصرة القارص باش تخليه أبيض برّاق وتغطيه لين ينزح وبعد خليه يبرد توا تلقاه طاب وكل كعبة وحدها ، أما المهم تطيب في التيفال أو السيراميك على خاطر يلصق في الاينوكس أو الالومنيوم ….

بوري البطاطا : تصمت 4 كعبات بطاطا في الماء والملح وبعد ارفسهم وزيدهم 1/2 كأس حليب وزيت وزبدة وفلفل اكحل وخلطها بالباهي وبعد زين كيما تحب

شربة عدس

تغلي ماء ماجل او صافية
وفي الكوكوت حط شوية زيت زيتونة وزيت قديد ( او دجاج او قرنيط ) وبصلة وقليهم وبعد زيدهم مغرفة فلفل مرحي وشوية طماطم معجونة وامرق بالماء الي يغلي وزيد شوية بسباس مرحي وارمي العدس وغطي الكوكوت 15 دق
وبعد حلها تلقاه طاب زيدو كعيبة ملح وتاكل بالشفاء
ردو بالكم فيسع يطيب كيف يبدا ماء ماجل او صافية وكوكوت