تصمت البطاطا بالملح وكيف تطيب تسقطرها وتزيدها شوية زبدة وشوية زيت وفلفل أكحل وشوية حليب وترسها بالباهي لين تولي عجينة رطبة وكالقيتها يابسة زيدها حليب وبعد اطرحها في الصحن وزينها بالتن والزيتون والعضم وفلفل بر العبيد والماييس ….. وقدمها مع الاطباق الموجودة عندك
أنا ضد توفيح الحوت برشا وهاو علاش : الحوت مختلف طعمه من عند الله سبحانه وكيف نكثر الفاح يولي كلو بالكمون وماعادش تلقى الفارق بين أنواع الأسماك ولذلك كيف تاكل السردينة والمجل موش نفس الطعم ، نعمل خليط زيت وقارص وملح وفلفل أكحل وكركم ونحركو بالباهي ونصبو على الحوت ونخليه يبنان في الثلاجة على الاقل 2 ساعات وبعد نشوية وذوق الطعم
تقطع اللحم شرائح جويدة والكبدة كذلك وبعد تأخو صحفة وتحط فيها زيت وملح وفلفل أكحل وكركم وكروية وقارص وتخلط الكل بالباهي وتصبو على اللحم والكبدة وتخلط الكل بالباهي وتخليه على الاقل ساعتين في الثلاجة يبنان وبعد تأخو المقلة تيفال أو قرانيت وتدهنها بالزيت وتحط فيها شرائح اللحم والكبدة وتغطيها وتحطها على نار هادية وكيف تطيب زيدها عصرة قارص ورشيشة معدنوس وتاكل بالشفاء
هذه سلاطة مصموتة ومتكونة من جلبانة وسفناريا وبطاطا ومفوحة بالملح وقطيرة زيت وكركم وموش برشا ماء المهم تجي قد قد اي لين ينزح الماء متاعها
وبعد تعمل خليط متكون من زيت وقارص وفلفل اكحل وتقطع شوية بصل ومعدنوس وزين بالعضم والتن والزيتون ….
واحد كغ زقوقو منظف ومسوم ومرحي في رحى بحيث يخرج زيتو ممكن في البيت أو عند الرحاي 3 ل ماء للرحي والتصفية 600 غ فرينة 600 غ سكر (إلى يحبو اكثر أو أقل ممكن يزيدوأو ينقصو ) الكريمة البيضاء : 1 ل حليب 4 فصوص بيض 4 مغارف نشاء سكر قدر الحاجة ترحي الزقوقو وتصفيه بالماء دون إضافة وبعد تزيدو الفرينة وتصفيه مرة ثانية وتحطو يطيب على الغاز على نار هادئة مع التحريك مدة 3ساعات كيف الملوخية حتى يقر زيتو ملاحظات هامة : عند الغليان تميّص العصيدة ما تتفجعش عادي نقص النار وخليها تطيب وبرا أقضي على روحك وحرك من حين لآخر السكر أضيفيه في النصف ساعة الأخيرة تبدا تكحال شيئا فشيئا العصيدة الناجحة تكون كيف تصبّها في الصحافي سائلة وكيف تبرد تولي كيف الياغورت لزجة لا تكون ميّة ولا قالب صابون وعليها نقاط زيت وكيف تمسها في الطبقة العلوية صبعك يبدا فيه الزيت المهم تطيب العصيدة في وقت طويل ووسعو بالكم ماتعملوش كيف ألي هي تيبس ونهبطها وتقول العصيدة طابت ردو بالكم في شراء الزقوقو يكون أسود وفرشك موش مندّي ولاّ بالح لونو وإن شاء الله عصيدتكم تجي بنينة
ممكن تكون الطبخة بالدجاج العادي
حطيت الدجاج في الماء والزيت في كوكوت وزدتو راس بصل وسنة ثوم وزنجبيل وكروية وملح وفلفل اكحل وكركم واكليل وبعد سكر علي الكوكوت وخلي الدجاج يطيب وكيف ينزح المرق خرج الدجاج سوتيه في شوية زيت حتى يتجمر والمرق يكون خاثر . اصمت مقرونة وخلطها فيه وزين الصحن كيما تحب وباي سلاطة تحبها
هذه الروسات :
تبل الكسكسي بالماء السخون وقطيرة زيت وبعد تحطو يفوّر
وفي التوفيرة الثانية حط 50 غ زبدة وبل الكسكسي بالزهر
وكيف يطرى الكسكسي بالباهي
نحط عليه شوية زهر اخرى وقطيرة زيت جديد و2 مغارف سكر وتزيد الرمان والزبيب إي تكون بليتوا مسبقا بالماء الساخن
والي يحب يصب عليه حليب وتاكلو بالشفاء
#طبخات تونسية
