قاتو بالفرنبواز والبرتقال

القاتو:
4 بيضات ياغرتة سكر
1 فانيليا
مبشور ليمونة
تركضهم بالباهي وتخلط ياغرتة وياغرتة حليب وياغرتة زيت وتزيدهم للخليط واخيرا 3 ياغرتات فرينة مغربلين ومعاهم 1 خميرة قاتو
خلط الكل برفق
طيبها في الفرن على 180 °
وكيف تخرجها من الفرن اسقيها بكاس صغير حليب 50 مل
الكريمة :
نصف لتر حليب
كيس كريمة فانيليا
1 فانيليا ومغرفة قهوة نشاء
ومغرفة ماكلة سكر
تطيبها على نار هادية
وبعد زيدها كيف تطيب 50غ زبدة وحرك بالباهي حتى تذوب وويولي عندك خليط متجانس
صب الكريمة على القاتو الطايبة وزينها بشوية شكلاطة
نظف الغلة وزينها فوق القاتو وبعد زيدها ناباج باش تحافظ على بريقها ونضارتها
وقسمها كيما تحب وتاكلو بالشفاء
انا نقصت في كمية السكر باش ماتكونش قوية

بيتزا بدون فرن

العجينة
رطل فرينة
مغرفة ص ملح
2 مغارف ص سكر
1 خميرة خبز
30مل زيت نباتي
وتدفىء حليب وتلم بيه العجينة وخليها تتخمر
تعمل صوص بيتزا
تحل العجينة قدر المقلة الي عندك جويدة وحطها تطيب ودوبما تشد روحها وتصفار اقلبها وادهنها بالصوص ورش عليها موتزارلا وجبن وبيضة مسلوقة وتن وبعد سكرهاوقدمها في الصحن
ممكن تزيد هريسة لعشاق الحار
صوص البيتزا :

تقلي بصل وبعد تزيد معاه طماطم خضراء مصموتة ومرحية وكيف تتقلي زيدهم طماطم معجونة وفلفل مرحي وثوم وفلفل اكحل وكركم وملح وزعتروشوية اكليل وتيقى تغلي حتى تطيب وتبقى خاثرة

شبتية

خليط الشبتية : لحم وكبدة وقلب ومعدنوس وكان تحب شوية ليّة رابيها و بصل بأوراقو وفلفل أكحل وكركم وملح وتابل وكروية وبرغل جويد طمطومة خضراء فلفل مرحي قطيرات زيت فرينة وعضم وشوية خبز مرحي

الصوص : بصل وطماطم معجونة جلبانة كركم ملح تابل وكروية فلفل أكحل وفلفل مرحي زيت وبطاطا تخلط الخليط وتلف الكعاب في  الفرينة وتقليهم وبعد ترميهم في الصوص

شربة باللحم

خوذ الكوكوت وحط فيها ماء وزيت واللحم إلى عندك وونصف حزمة كلافس و2 كعبات طماطم خضراء وجلبانة وسفناريا وبطاطا  وملح وفلفل أكحل  وكركم وبصل  وسكر الكوكوت ، وبعد نصف ساعة تلقي كل شيء طايب حط فيها مغرفة شربة وخليها  تغلي لين تطيب

زهرات المقرونة المحشية بدون فرن

تاخو 400غ اسكالوب مفرومة وبصلة وتسوتيهم في شوية زيت وتفوحهم بالملح والكركم وفلفل اكحل وزنجبيل وتابل وسنة ثوم وصب عليهم رشة ماء وغطيهم يطيبو على نار هادية حتى تنزح من الماء

وفي طنجرة اخرى تيفال أو قرانيت :
تسوتي بصلة ومغرفة طماطم معجونة صغيرة ومعاها طماطم خضراء مصموتة ومرحية وبعد تفوح بالملح وتابل وثوم وفلفل اكحل ورند وفلفل مرحي وتمرقها وتخليها تغلي لين تطيب وماتوليش عاقدة تماما خلي فيها الصوص باش تطيب الزهرات  وبعد تبدأ تحشي بالكعبة بالكعبة وترصفهم في الطنجرة و ترش عليهم بالكعبة بالكعبة شوية جبن برموزان او فوندون واخيرا موتزارلا ( انظر الصور )

حطها على الغاز  تطيب على نار هادية وحدة وحدة و رصف في الصحنات وزيدها اي نوع من السلايط وتاكلو بالشفاء

سفافد لحمة مع الأرز

في طنجرة تحط اللحم مقطع مكعبات مع الماء والزيت وبصلة وفلفل اكحل وكركم وزعفران وخليه يغلي وكيف يطيب زيدو كروية وخرج اللحم وحطو في السفافد وشوية صوص متاعو في طبق الفرن ودخلو يتجمر والصوص البقية كيلها قداش من كأس وزيدها نصف عدد الكيسان أرز وحطها تغلي لين تنزح  ( 2كيسان ماء اللحم وكأس أرز ) بحيث تتحصل على طبق الأرز مع السفافد

جينواز

تاخو 8 بيضات بحرارة الغرفة و 8 مغارف سكر مليانين وكيس فانيليا وتركضهم بالباهي حتى تتحصلي على خليط كريمي وبعد صب عليهم نصف كاس زيت ونصف كاس حليب وغربل 8 مغارف فرينة و2 مغارف نشاء و1 خميرة قاتو وخلطهم مع بعض وبعد صبهم على الخليط مع الحليب والزيت وحرك برفق
استعملت قوالب مربعة وفي القاع افرش ورق الزبدة
طيب على 180° وشعل عليه الفرن من فوق 
شكل الجينواز كيما تحب

مرقة علوش بالجلبانة والقنارية

قلي بصل واللحم في الزيت وزيدهم طمطومة خضراء ومغرفة طماطم معجونة صغيرة باش ما تبداش مطمطمة وفوح بالملح والفلفل الاكحل وكركم وشوية فلفل مرحي وتزيد 2 كيسان جلبانة وتمرقها وتخليها تغلي وكيف يطيب اللحم ترمي القنارية وقرين فلفل أخضر وتخليها تغلي أو سكر عليها الكوكوت 5 دق وخليها تشكشك لين تقر زيتها