تالياتلي بالبنادق

تاخو رطل لحم مفروم ، وهرس ثلاث سنينات ثوم مع تابل وكروية وحط شطرو فوح بيه اللحم متاعك وتزيدو ونعناع شايح وملح وكركم وفلفل اكحل وشوية فلفل مرحي
وبعد في طنجرة فيها الماء يغلي زيدها زيت وباقي التابل والكروية والثوم وكركم وملح ، وبل يدك بالماء وكعبر وارمي في المرق الازعر الي يغلي
خليها تغلي لين تشيح
اصمت التالياتلي وخلطها مع الصوص وزينها بكعيبات البنادق و رشة جبن برموزان أو اي جبن آخر تحبو

مرمز باللحم البقري

قلي البصل واللحم في الزيت وبعد تزيد طماطم خضراء وشوية طماطم معجونة وتمرق وتزيد فلفل أكحل وكركم  وتابل مفوح وملح والحمص يكون طايب وكيف قريب يطيب اللحم نقطع رأس بصل وكعبة طماطم ونرميهم في المرق وقرن فلفل اخضر وخليه لين تخثار المرقة وتقر زيتها تسربي في الصحنات وتزينهم بالبطاطا المقلية وقرين فلفل

سلاطة فول أخضر

تغلي الماء وتعصر فيه كعبة قارص كاملة وبعد ارمي فيه الفول باش يبقى أخضر ومزيان وزيد ملح وبعد كيف يطيب سقطرو وحطو في الصحن وقطع عليه بصل ومعدنوس وفوح بالملح والفلفل الكحل وقارص وزيت زيتونة وبالطبع زيد عضيمة مصموتة وكان تحب تن وكبار اختياري

شكشوكة قرع ربعي

اصمت القرع والملح حتى ينزح تماما من الماء
تقلي بصلة كبيرة بالباهي وتزيدها 5 كعيبات طماطم خضراء حتى تذبال بالباهي وتطيب زيدها 7 قرينات فلفل مقطعين والقرع المصموت وذوق الملح كان ناقص زيدها وشوي فلفل مرحي
المهم ما تزيدش ماء يلزمها تكون شايحة باش ما تميص

صرة التن مشوية

تقص صرّة التن شرائح وبعد فوحهم بالملح والكركم وزيت وفلفل اكحل وشوية كمون واشويهم على نار هادية

بانيني دياري

رطل فرينة ،1 خميرة فورية ،مغرفة صغيرة ملح ، مغرفة زيت ، تعجن بالماء الدافئ ، الرطل يعمل 6 كعبات، نعملو العجينة وكيف تتخمر نقصمها على 6قطع ونحلهم وبعد نحطهم على الورق الخاص بالطبخ ونخليه يتخمر مرة ثانية وبعد نحطوه في الفرن

 

سلاطة قرنيط

نظف القرنيط وتحطو يتصمط بالباهي وكيف يطيب قطعو وزيد قطع فوقو طماطم خضراء جويدة وبصل وشوية معدنوس وفوح بالملح والفلفل الاكحل والقارص وقطيرات زيت زيتونة وزينها كيما تحب
أنا هوني زدتها خس

filet de merlon pané

الصلصة:قطع 2 بصلات وتقليهم وتزيدهم 5 كعيبات طماطم وتخليهم يتقلاو لين يطيبو بالباهي تزيدهم مغرفة طماطم معجونة وخليهم يزيدو يتقلاو وبعد زيدهم شوية ماء وملح ومغرفة هريسة عربي وفلفل مرحي ورسة فلفل اكحل وتاكلو بالشفاء

 المرلون :

نحي السلسول والراس وبعد فوحو بالملح والفلفل الكحل وتابل مفوح وكمون وخليه يبنان وبعد لف الكعبة في الفرينة ثم العضم واخيرا شابلور الخبز واقلي على نار هادية

أعمل سلاطة بالموجود عندك وزين الصحنات وتأكل بالشفاء

 

كسكسي بالقرنيط

اصمط القرنيط 11 دق  في الماء باش ينحي الحمورية و تسقطرو و بعد تقلي بصلة و ترمي القرنيط و الطماطم و تقلي شوية و بعد تزيد 1/2 مغرفة صغيرة هريسة عربي و 3 سنون ثوم و و تفوح عادي بالفلفل اكحل و فلفل احمر و كركم و شوية تابل  و تمرق بالماء و في نصف الطياب ترمي الخضرة اللي تحبها قرع و جزر و وتصمت الحمص  وحدو في الماء  و عندما يطيب المكونات الكل تكون فورت الكسكسي فوق المرق تمرقو و تقدمو مع القرنيط و الخضرة