هريسة حمراء

ترحي الفلفل الاحمر نيء بعدما تنحيلو الزريعة متاعو وترحي الطماطم والثوم نيين زادة وبعد تزيدهم شوية زيت وتطيبهم حتى يذبالو فوح بالملح والكروية  فما شكون يحب طعم الثوم نيء ينجم يزيد سنة ثوم نيئة مرحية بعدما تطيب وبعد حط في الصحنات وزيدهم قطيرة زيت جديد وتاكلو بالشفاء

مرقة صبارس

في الطنجرة نحط زيت وبصل وطمطومة خضراء ونقليهم ونزيدهم مغيرفة طماطم معجونة ونمرق ونفوح بالملح والكركم وفلفل مرحي وتابل مفوح ومغرفة هروس وراس ثوم كامل صحيح وكعبة بطاطا مقطعة ونحط الصبارس في الكسكاس ونسقطو مع المرق يغلي باش مايسيبش الشوك متاعو في المرقة ويسيب الفيحة
وكيف تطيب المرقة وتقر زيتها زيد رشة صغيرة كمون وطفي
زين الصحن بكعيبة قارص وقرين فلفل وتاكلو بالشفاء

 

قلاية قرنيط

تصمت القرنيط حتى يطيب وبعد تسقطرو وتقطعو وتحطو في طنجرة تيفال وتصب عليه زيت زيتونة وتقليه شوية وتزيدو مغرفة طماطم معجونة وترش عليها شوية ماء وتزيد كركم وملح وفلفل اكحل وفلفل مرحي وكروية وتخليه يشكشك على نار هادية
وكان تحب فقر عضيمات عربي كان ماتخبش عادي
اقلي بطاطا وفلفل ورش شوية معدنوس كيف تزين الصحنات
وتاكلو بالشفاء والهناء

مقرونة بالسكمري

قلي بصلة صغيرة وزيدهم كعبة طماطم خضراء مقشرة وكيف يتقلاو تزيدهم مغرفة كبيرة طماطم معجونة وشوية طماطم شريحة وثوم وتابل مفوح وامرق وزيد فلفل مرحي وكركم وملح وفلفل اكحل  وهروس وارمي السكمري في كسكاسو وخليها تغلي حتى تطيب وبعد اصمت المقرونة وخلطها

اقلي الفلفل واقلي شوية سكمري

سوفليه بالمرقاز

العجينة : كأس متوسط حليب دافئ وزيدو 11 غ خميرة خبز و2 مغارف  ص سكر ومغرفة ص ملح ونصف كأس زيت نباتي وبيضة ونصف كأس ماء وخلطهم بالباهي حتى يولي الخليط متجانس وبعد زيدو الفرينة شيئا فشيئا حتى تتحصلي على عجينة طرية حطها في مكان دافئ وخليها تتخمر

الصوص: تقطع رأس بصل كبير في الزيت وزيدو 3 كعبات طماطم خضراء وقليه شوية وبعد زيد المرقاز مقطع وهريسة عربي وملح وفلفل أكحل وشوية طماطم معجونة وخليها تطيب بالباهي

كيف تتخمر العجينة حلها جويدة  بالفرينة وحط عليها صوص وبيض مسلوق وجبن ومعدنوس وشوية بصل نية كان تحبوه وسكرها وانزل عليها بالفرشيطة في الاطراف وبعد أدهنها بأصفر البيض مع قطرات حليب ورش عليها سينوج وحطها تطيب في الفرن على 180 °

قاتو الدقلة بالفاكية

تأخو 4 بيضات بحرارة الغرفةوتزيدهم 4 مغارف سكر محوّر و1 فانيليا و1/2 مغرفة جيلك وتركضهم بالباهي حتى يولي الخليط كريمي ، وتكون محضرة كاس حليب  ومعاه 3 مغارف كبار دقلة مرحية  وتسخنهم بالباهي حتى تتحل الدقلة في الحليب وتبردها وبعد تزيدها للخليط مع 280غ فرينة و20 غ نشاء و1 خميرة قاتو ونصف كأس زيت نباتيوتخلط الكل بالباهي وبعد تحط في طبق الفرن وترش عليه الفاكية إلي عندك لوز أو بوفريوة أو فزدق وتحطها تطيب في الفرن على حرارة 180° وأخير وكيف تطيب خرجها وادهنها بالناباج وخليها تبرد بالباهي وبعد قصها

بولونيز

تقلي بصلة صغير واللحم المفروم وتزيدهم مغرفة طماطم معجونة ورأس ثوم وتابل مفوح وامرق وشوية فلفل مرحي وفلفل اكحل وكركم وملح ووريقات رند وخلي الصوص تغلي لين تطيب ، وبعد صفي اللحم وحدو وكيف تصمت المقرونة خلطها بالصوص وحط اللحم من فوق

أقلي قرينات فلفل وزين الصحنات وزيد رشة جبن

مصلي باللحم البقري

تصمت اللحم والبصل والزيت وكركم وفلفل اكحل وملح ومغرفة صغيرة طماطم معجونة لين يطيب وشوية تابل و بعد تحطو في طبق الفرن وتزيدو حلقات طماطم خضراء وفلفل وقارص وبطاطا وبعد تدخلو 30 دق للفرن يشعل من الجهتين
فما شكون يحبو شايح وفما شكون يخلي فيه شوية مرق باش يعديو
ماتنساش رشيشة معدنوس وبصل وقريّن فلفل أخضر مقلي

سلاطة مشوية

اشوي الفلفل والطماطم والثوم على الكانون أو فوق النار مباشرة وبعد غطيهم يبردو  في طنجرة وقشرهم وارحيهم وخلي فيهم لقش وفوح بالملح والكروية والزيت

 

مقرونة بالحوت

قلي بصلة صغيرة وزيدهم كعبة طماطم خضراء مقشرة وكيف يتقلاو تزيدهم مغرفة كبيرة طماطم معجونة وشوية طماطم شريحة وثوم وتابل مفوح وامرق وزيد فلفل مرحي وكركم وملح وفلفل اكحل وارمي الحوت في كسكاسو وخليها تغلي حتى تطيب وبعد اصمت المقرونة وخلطها

اعشاش التالياتلي بالتن

الصوص: تقلي بصلة صغيرة وبعد تزيدها طماطم خضراء مرحية وتفوح بالثوم وتابل وكروية ورند وملح وفلفل اكحل وكركم وفلفل أحمر وكيف تطيب أطفي عليها وتكون خاثرة موش جارية

الحشو : تقلي بطاطا مكعبات صغيرة وبعد في مقلة تيفال نقلي بصلة وفوقها شوية معدنوس وبعد نهبطهم من النار وتزيدهم البطاطا وممكن تستغنى عليها موش ضرورية وتن وملح وفلفل أكحل وجبن ووشوية كرام فراش

تصمت التالياتلي بالملح وقطيرة زيت وتسقطرها وبعد تحطها في شكل أعشاش وفوقها الصوص وبعد الحشو ثم رشة جبن قرويار أو برموزان وجبن موتزارلا وأخيرا جبة شرائح ودخلها للفرن 10 دق باش تتجبّن ويذوبو الاجبان الكل