بندلاقة

اصمت البندلاقة في الماء ومعاها العدس الفول الاخضر  وتخليها لين تنزح من الماء متاعها
تقلي بصلة وكعبة طماطم خضراء وبعد تزيد طماطم معجونة وهريسة عربي وثوم وكروية وفلفل مرحي و2 قرينات فلفل اخضر وقديد جديد وتصب عليها البندلاقة المصموتة وبعد خليها تشكشك حتى تنزح تماما وكان تحب فقر عضم او اقليه وحطو من فوق أو أقلي معاها سكمري أو سردينة أو أي سمك عندك أو دجاج

مقرونة بالمرقاز

صمت 4 طماطم الخضراء وترحيهم
وفي طنجرة تقلي بصلة والمرقاز شوية وبعد تزيد مغرفة كبيرة طماطم معجونة وتقليها معاهم وبعد تحط الطماطم المرحية والكركم والثوم والتابل والملح وتمرق وتزيد الفلفل المرحي والرند والفلفل الاكحل وقرين فلفل اخضر وتخليها تغلي لين تطيب
تصمت رطل مقرونة
وتخلط
وتاكل بالشفاء

طاجين الطبقات بالجوزة

الطبقة الاولى :  العجينة : 300 غ فرينة ونصف باكو خميرة وعضمة و 150 غ زبدة وملح وتعجنها بالحليب و تنقبها بالفرشيطة، وبعد حضر خليط الدجاج

تطيب الدجاج بالبصل وتفوح بالزيت وملح وفلفل اكحل وكركم واكليل وزنجبيل مرحي وشوية زعتر وتابل مفوح وتخليه لين يشيح من الماء متاعو ويبرد زيدو أصفر بيض وجبن و2 بيضات مسلوقين وبالنسبة لكمية البيض تزيد بالشوية بالشوية حتى تتحضل على خليط كريمي وترحي الكل في الخلاط  وتصبو على طبقة العجين وتحطو في الفرن وشعل عليه الفور من فوق باش تشد روحها الطبقة العليا

تأخو 300غ قوتا ومعاها أبيض بيض وجبن وملح وفلفل أكحل وشوية زوج الطيب وترحيه بالمكسور وكيف تحس الطبقة الاولى شدت روحها تصب الخليط متاعك برفق وتشعل الفرن من الأسفل

ارحي 200 غ جوزة وكيف يطيب الطاجين ويشد روحه رش عليه الجوزة المرحية وخليه يبرد وبعد قصو كيما تحب

 

كسكسي بالدنديق

 نظف الدنديق ونرش عليه الملح ونخليه يبنان في الثلاجة
ونحضر الصوص :
نقلي بصلة وكعيبة طماطم خضراء وبعد نزيد 3 مغارف ماكلة طماطم معجونة وكعيبرة طماطم شريحة و2 مغارف فلفل مرحي ونمرق
نحط قرع جديد  وسنة ثوم و فلفل احمر شايح ونمرق ونزيد الملح والكركم والفلفل الاكحل وكيف يغلي المرق نرمي الحوت
نبل الكسكسي بشوية ماء وزيت ونحطو يفور
نتريه بعد بالمرق متاعو ونرجعو يفور
واخيرا نقلي الفلفل ونسقي الكسكسي وماتنساش رش شوية فلفل اكحل فرشك وزين الصحافي

مرقة كالمار محشي

مرقة كالمار
الصوص : ماء وزيت وطماطم معجونة  وكركم وملح وفلفل اكحل وفلفل مرحي وكيف يغلي أرمي كعب الكالمار وخلي يغلي لين يقر زيتو

الحشو :الشوش متاع الكالمار أصمتهم وزيدهم بصل ومعدنوس وبرغل وبسباس مرحي وكركم وملح وفلفل مرحي وبعد شق كعبة الكالمار من الأسفل واحشيهم وبعد ارميهم في الصوص إلى تغلي
بالنسبة للبطاطا ممكن ترميها في المرق أو كيما نعمل انا نصمتها بالملح والكركم وأخر حاجة نحطها في الصحنات على خاطر تمص الفيحة متاع الكالمار الكل وزيد تسيب النشاء متاعها

بقلاوة عربي باللوز

العجينة
2 كغ فرينة
2 فناجل صغار زيت نباتي 
ذرة ملح
وتعجن بالماء الدافئ
اللوز
2كغ ونصف لوز
200 غ فرينة
200 غ سكر
ممكن اضافة فاكية مقلية
العسل :
كيلوغرامين ونصف  سكر تغليهم مع 3كيسان ماء كبار وكيف قريب يتسكر زيدو 1/2 كاس عطرشاء  وأوراق العطرشاء أرميهم في العسل وغليه وبعد كيف قريب ييبس حطلو كاس تاي قارص  ودوبما يهز الغلو تقريبا 4 دق زيد 2،5 مغارف ماكلة قلوكوز واطفي عليه وخليه يبرد

في وعاء فيه ماء بارد باش يبقى أبيض اللون

الطريقة :
تقسم العجينة الى كويرات بالضبط 25
تحط 10 ورقات من الاسفل
تحط اللوز
وتزيد تعرك شوية عجين وتخليها ترتاح المهم اعمل 15 ورقة من فوق
وكيف العادة بين الورقة والورقة شقشق

بالزبدة الذايبة ومغلية بالباهي

بعدما تحط اللوز رش شوية سكر محور باش تشد الورقة الفوقانية
الورقة الاخيرة ماتشقشقهاش خليهاهذيكة تحمي الورقة الاساسية

الطبق 40/60 صم

كان تحب تستعمل اللوز الغير مفسوخ بلو بالماء الساخن باش تحي منو الحمورية والغبرة وشيحو وارحيه واعمل شطر لوز مفسوخ وشطر لوز عادي عندو طعم مميّز ومتاع زمان

القلوكوز مادّة أضفتها للعسل باش تخلي الكعبة تتعلك وبنينة وما يسيحش العسل بالسخانة