مرقة شوباي بالجلبانة

تصمت الشوباي ودوبما  يهز الغلو في الماء باش ينحي الكشكوشة والحمورية وما يفسدش لون المرقة

قلي البصل والجلبانة والشوباي وبعد زيدو كعيبة طماطم خضراء وشوية طماطم معجونة وخليها تطيب وفوحها بالملح والفلفل مرحي والكركم والملح والبسباس المرحي وارمي كعيبة بطاطا و وكيف تطيب وتقر زيتها أرمي فرين فلفل أخضر وبعدين زيد أقلي  فلفل وزين الصحنات وتأكل بالشفاء

 

سلاطة غلال البحر

سلاطة غلال البحر
تصمت القرنيط والكالمار والشوباي بالملح والقارص
تصمتالكروفات صحيحة شوية بالملح والقارص وقطيرة زيت
تحط في الصحن وريقات سﻻطة وبعد تقطع سﻻطة وطماطم وبصل وتخلطهم وتعمل شوية غﻻل البحر مقطعين وشوية سﻻطة وبعد ترش الطبقة الاخيرة وتزين بالكروفات
تخلط زيت زيتونة وشوية ملح وشوية قارص وفلفل اكحل وتصبهم على السﻻطة وتاكل بالشفاء

قلاية دجاج

تحط الدجاج في الماء والزيت والملح والفلفل الاكحل والكركم وعلى طرف المغرفة طماطم معجونة أو بلاش وشوية زنجبيل وخليهم يغليو لين تشيح وتقر زيتها رش كروية وفقر عضيمة وزين الصحنات بالمعدنوس والبصل واقلي الفلفل وبالبطاطا

شربة مفورة بالعلوش

شربة مفورة بالعلوش
تحط اللحم في الماء والزيت يغلي وزيدو بصل وطماطم معجونة وفلفل اكحل وملح وكركم وفلفل مرحي يعني كل شيء في الماء
ناخو الشربة ونحط عليها قطيرات زيت وكركم ودوبما نبل يدي بالماء نخطها ونحطها تفور
وفي نصف الطياب نتريها بالمرق مرة
نصمت الحمص وحدو في ماء ماجل وكيف يطيب نحطلو ملح وكركم
نصمت السفناريا بالملح والكركم ونزيد شوية فلفل اكحل
وبعد نسقي ونزين الصحنات

فيليه صول باني

تفوح الفيليه بالملح والكركم وفلفل اكحل وشوية كمون وبعد لفهم في الفرينة ثم البيض ثم الشابلور واقلي على نار هادية

خبزة برتقال

خبزة برتقال :
الجينواز
5 بيضات
كيس فانيليا
كاس ونصف سكر
ركضهم بالباهي حتى يبياض العضم وبعد زيدهم
3/4 كاس زيت نباتي
كاس عصير برتقال
خلطهم برفق
غربل 3 كيسان فرينة و 2خميرة قاتو
وزيدهم للخليط وطيبها في الفور 170 °
باش تتحصل على خبزة عالية ومزيانة اقسمها على 2 وبل كل جزء منها بسيرو ( ماء +سكر ) باش تبقى القاتو طرية
الكريمة
هي كريمة عادية متكونة من نصف لتر حليب و 2 فصوص عضم و 2.5 مغارف نشاء ومغرفة سكر والي يحب الحلو ينجم يزيد السكر وخلطهم في البارد وبعد طيبهم على الغاز وكيف تطيب الكريمة تنجم تزيدها مبشور البرتقال وتخليها تبرد شوية وتحطها على الجينواز ودخلها للثلاجة
القاناش
نصف لتر عصير برتقال عليه 2 مغارف نشاء ومغرفة سكر حركم في البارد وطيبهم على الغاز وبعد صبهم برفق على طبقة الكريمة واخيرا حط القاتو تبرد في الثلاجة وبعد ساعة قصها وتاكلو بالشفاء والهناء

كسكسي بالعصبان الساحلي

كسكسي بالعصبان
مكونات العصبان:
لحم وكبدة وريّة ( الرية غليها قبل وبعد قطعها مع بقية المكونات ) وقلب ومعدنوس وبصل ونعناع شايح وبرغل وهريسة عربي وفلفل مرحي وكركم وملح وتابل وكروية وفلفل اكحل وقطيرة زيت ، وتلف في الكرشة إلى تكون ولّدتها كيف الشكيرات الصغار وبعد زيد لفهم في الردى وبعد بالمصارن إلى تنظفهم بالباهي وتعدي عليهم السكينة باش يخرج إلى في وسطهم ويبقاو جويدات ورهاف برشا ، وأخيرا لف بالخيط باش ما يتحلوش
صوص الكسكسي :
تغلي الماء وتحط فيه العصبان بعدما تنقبو وتزيد طماطم وفلفل مرحي وفلفل أكحل وزيت
تصمت السفناريا والحمص وتفوحهم بالملح والكركم والفلفل الاكحل
زين الصحنات

شكشوكة فلفل ملاحي

تصمت  البطاطا بشوية ملح وكركم وبعد في طنجرة تيفال تقلي البصل والطماطم خضراء لين تطيب وتزيدها  شوية طماطم معجونة ( على طرف المغرفة ) وتقطع الفلفل الاخضر والملاحي والفلفل إلى شيحناه في الصيف الحار وتخلطهم مع الطماطم وبعد تصب البطاطا المصموتة وفيها شوية ماء وتزيد شوية فلفل مرحي وكيف يغلي شوية تفقر العضم

ابتسام