قديد العيد

🙂
نقص اللحم شرايط وبعد نفوحو ببرشا ملح وفلفل اكحل وفلفل مرحي وكركم وتابل وكروبة ونعناع شايح وقطيرات زيت ونخليه في الثلاجة يبنان ليلة كاملة وبعد سقطرو في كسكاس وانشرو على الحبل وكل ليلة غطيه باش ما يتبلش بالندوة وإلا المطر والصباح عريه يشيح والمهم المكان يكون مشمس ، وبعد اسبوع او أكثر كيف يشيح سليه في زيت نباتي بالباهي ثم زللو من الزيت هذاكا وحطو في زيت جديد زيتونة وفي دبوسة بلار
ثبتو في الزيت متاع تسلية القديد كيفاش يولي ؟
تتلم فيه الاتربة متاع الجو
تذوب فيه الشحوم الملتصقة في اللحم المشيح
وزيت قليان
هذاكا عﻻش يلزم نصفي القديد ونحطو في دبوسة بلار ونصب عليه زيت زيتونة فرشك
فما شكون يغسلو اما انا مانعملهاش على خاطر فيها risque يفسد القديد
عصبان القديد:
قطعنا الكبدة واللحم والرواري…. ونفوحوهم بالكروية والزيت والكركم والفلفل الاكحل والمرحي والنعناع الشايح
ونبل المصارن والكرشة بالماء السخون
وبعد نفوح الكل ونبدا نعصبن في الكعبات ونربطهم وحدة وراء وحدة وبعد ننشرهم في الشمس على الاقل 4ايام ونسلي القديد الكل مع بعضو

كسكسي بالمناني

كسكسي بالمناني
نقلي بصلة صغيرة مقطعة جويد بعد ما نقلي جرون فلفل يعطيو نكهة للزيت ونخرجهم وبعد البصل نزيد كعيبة طماطم اخضر طايبة تذبال شوية ملح عليها بعد نزيد مغرفة طماطم معجون ونفوح فلفل احمر واكحل وكركم وملح ونقلي ونمرق بشوية بعد نمرق فرد مرة ونرمي بطاطة حسب حاجتي وقرع ونخليهم يطيبو في نص الطياب نخلط الحوت وفي نفس الوقت نبل الكسكسي ونحطه يفور وبعد ما يطيب نسقي
سندس مساعد

فريكاسي دياري

فريكاسي دياري
2 كيسان ماء دافئ مع 2 مغارف ص سكر ومغرفة ص مليانة ملح 2 خميرة خبز تخلطهم بالباهي وتغطيهم 15 دق
تلقاهم فوجو ولاو رغوة تزيدهم 2 مغارف زيت نباتي وبيضة وتزيد تحركو بالباهي وبعد زيد الفرينة واعجن حتى تولي عندك عجينة متماسكة وماتلصقش في اليدين كمية الفرينة موش محددة انت كبر الكاس اقل او اكثر شوية من كغ
وغطيها وخليها تتخمر وبعد 15 دق اخرى تقريبا حل العجينة واصنع الكعاب انظري الصور
ارمي في زيت سخون والنار تكون هادية باش تطيب من الداخل والخارج
ماتقويش في النار تتحرق وتبقى معجنة
خلي الكعب الي تصنعهم يرتاحو بين 5 و 10 دق
الزيت يكون كثيف
واصمت بطاطا بالملح والكركم وبعد زيدها 2 مغارف هريسة وارفسها
باش يكون ناحج 100%يلزم مفوج ومن الداخل فيه شوية فراغ يعني موش بكلو عجين
وتاكلو بالشفاء

الفلفل الاخضر الشايح

الفلفل الاخضر الشايح
تغسل الفلفل ويكون بعلي موش متاع بيوت وتخلي ينشف
قطعو وزيدو حفينة ملح
وحطو على طريف في الشمس وكيف يشيح تحطو في دبوسة بلار في الكوجينة مايصيرلو حتى شيء وكيف تستحق خوذ شوية وبلها في الماء باش يتنحى الملح وطيب بيها
اسئلتكم: فاش نستعملوا ؟
شكشوكة .كسكسي بالبسباس او الفرفوشة .البندلاقة .الخبيزة . صالصة حوت واكلات اخرى

كيكة بالشكلاطة

كيكة بالشكلاطة
6 بيضات بحرارة الغرقة
2 فانيليا بنكهة الزهر
كاس ونصف سكر
ركضهم بالباهي حتى يولي الخليط كريمي ابيض
غربل 3 كيسان فرينة و1 خميرة كيميائية
وزيدهم للخليط و كاس حليب ونصف كاس زبدة ذايبة
خلط الكل برفق
ادهن المول الزبدة والفرينة ، أنا خذيت 2 قوالب واحد في شكل كايك والآخر دائري وطيبها في الفور على 170 د
القاناش :
200غ شكلاطة
30غ زبدة
2 مغارف كرام فراش
تذوب الكل في حمام مائي وكيف يذوب خليه يبرد وصبو على الخبزة وبعد رش شوية شكلاطة وتأكلو بالشفاء