مجّل مشوي وزيت جديد

تقشر المجّل وتفوحو بالملح والكركم والفلفل الاكحل والزيت وتخليه يبنان ساعة وبعد تشويه تتبنن مطعم السمك الخالص مع قطيرة زيت زيتونة وخبيزة طابونة 

   

أرز بالعصبان

 

صوص الأرز

تقلي بصل في الزيت وتزيدو مغرفة طماطم ونصف مغرفة فلفل مرحيوتمرق بالماء الساخن وتزيد فلفل مرحي وبسباس وقرفة وشوش ورد وكركم وكيف يغلي تحط العصبان يطيب على نار هادية

رتاج

سلاطة فجل

تقطع فجل وبصل وطماطم وتزيدهم فلفل أكحل وخل وزيت زيتونة وملح ورشيشة معدنوس وكعيبة زيتون

رتاج

عوينة مصبّرة

3 كيلو عوينة 1لتر ماء – 400غ سكر ‘تغلي الماء والسكر لين يدوب السكر تخليه يبرد شوية وتاخد لعونة تغسلها و تقسها على زوز وتنحي القلوب وتعبي في الدبابس يكونو معقمين وبعد تصب السيرو وتقلب الدبابس 5 دقايق وبعد تغليهم وتخليهم يبردو في ماهم و تحفضهم في خزانة الكوجينة

نزهة

بيتزا عائلية

العجينة : كأس حليب وكأس ماء دافئ و 2 مغارف سكر ومغرفة ملح وكيس خميرة خبز تخلطهم بالباهي وبعد زيدهم 3/4 الكاس زيت و 2 كيسان فرينة وخليهم يتخمرو 15 دق  في مكان دافئ وبعد زيدهم فرينة بالشوية بالشوية حتى تتلم العجينة وتولي معادش تتلصق

الصوص

تقلي بصل وبعد تزيد معاه طماطم خضراء مرحية وكيف تتقلي زيدهم طماطم معجونة وفلفل مرحي وثوم وفلفل اكحل وكركم وملح وزعتر
وتبقى تغلي حتى تطيب وتبقى خاثرة

تحل العجينة وتحط فوقها الصوص وخليها ترتاح وبعد رش عليها الجبن وخليها تطيب وفي نصف الطياب فقر عضيمات  ورجعها للفرن وكيف تطيب تماما زينها بالتن والزيتون والمعدنوس والبصل المسوتي …..

بريك بالتن

تحط في طنجرة صغيرة كعبة بطاطا كبيرة و3 مغارف معدنوس مقطع ورأس بصل وماء وتخليه يغلي وتفوحو بالملح والكركم وتابل مفوح وفلفل أكحل وكيف ينزح تماما من الماء نهبطو ونرفس الكل بالباهي ونزيدو جبن وعضمة مصموتة ومقطعة جويدة و 2 عضمات نيين ونقسم كعبة البريك على 2 ونحط الحشو ونطويها ، واقلي في زيت كثيف وعلى نار هادية

رافيولي باللحم والقوتا

رافيولي باللحم والقوتا
تصمت 4 كعبات طماطم وتسقطرهم وترحيهم الصوص: تقلي نصف راس بصل كبير وتزيدو 1/2 مغرفة طماطم معجونة وتصب عليه الطماطم المرحية وتخليه يتقلي وبعد تمرق وتفوح بالملح والكركم والفلفل الاكحل وتابل وثوم ووريقة حبق وفلفل مرحي وتخليها تطيب ، تكون الصوص خفيفة باش ماتوليش عاقدة برشا ومطمطمة
وبالنسبة للرافيولي تتحط في بلاتو متاع فور وتصب عليها الصوص والجبن الفوندو والموتزارلا و كان تحب تعمل شوية باشامال خفيفة وفوحها بالملح والجبن والجوز الطيب تخليها تطيب في الفرن لين تشيح وتتجمر

صحين مقلي

صحين مقلي

 تريلا mange tout

الصوص :

تصمت 3 طمطومات خضر وتقليهم مع 4 سنات ثوم وتزيدهم طماطم معجونة وهريسة دياري ( فلفل شايح ترحيه مع سنة ثوم ) وتفوح بالفلفلالمرحي والملح والكركم وشوية كروية وتخليها لين وتولي خاثرة

تقلي البطاطا والفلفل

الباقي مقلي عادي

الحوت نفوحوه بالتابل المفوح والكمون والملح

البطاطا بالملح

الفلفل بالكمون والملح

ميني همبرقر

باكو خميرة مع مغرفة سكر ومغرفة ملح وتحلهم في كاس ماء دافئ وكأس حليب دافىء وتزيدهم مغرفتين زيت وتلمهم بالفرينة تخليها ترتاح ومن بعد تشكلهم كويرات صغار ويزيدو يخمرو وتدهنهم باصفر العضم وترش سينوج وجلجلان وتطيبهم في الفور وبعدما تخرجهم تشق الكعبة وتحط شوية هريسة جبن طوابع laitue جمبون وتزين من فوق بالاعواد وتحط فيهم شوية فلفل عبيدي جمبون زيتون وتاكل بالشفا

مفيدة حمزة

مرمز بالعلوش

مرمز بالعلوش 😍
تقلي البصل واللحم في الزيت وبعد تزيد طماطم خضراء وشوية طماطم معجونة وتمرق وتزيد فلفل أكحل وكركم وملح والحمص يكون طايب وكيف قريب يطيب اللحم نقطع رأس بصل وكعبة طماطم ونرميهم في المرق وقرن فلفل اخضر وخليه لين تخثار المرقة وتقر زيتها