خوذ الكوكوت وحط فيها ماء وزيت وقطايع الدجاج إلى عندك وحزمة معدنوس وحزمة سلق و2 كعبات طماطم خضراء وحمص وسفناريا وبطاطا وعدس وملح وفلفل أكحل وبسباس مرحي وكركم وبصل وكان عندك خضر أخرى متاع برودو حطها وسكر الكوكوت ، وبعد نصف ساعة تلقي كل شيء طايب حط فيها مغرفة شربة ودوبما تغلي سكر عليها
مايلزمش تحط طماطم معجونة في البرودو تقويه وزادة ماتزيدش على مغرفة شربة لسان عصفور باش ما يبداش ملكز بالعجين
دوبما تصمت الشوباي باش يتنحى الحمورية متاعو وتصمت 5 كعبات طماطم وتسقطرهم وترحيهم وبعد في طنجرة تحط رطل شوباي مقطع في زيت زيتونة وتقليه وتزيدو الطماطم مع 2 سنات ثوم مقطعين جويدين وكيف يتقلي بالباهي فوح بالملح والكركم وفلفل الاكحل وشوية كروية وقطيرات ماء وشوية فلفل مرحي وخليه يشكشك لين يشيح ، أقلي معاه البطاطا والفلفل ورشيشة معدنوس كان تحب وتأكل بالشفاء
بريكة في الفور على طريقة طبخات تونسية
تنقص في كبر البريك وتدهنهم الزيت او الزبدة
الحشو :
كعبة بطاطا تقطعها جويدة برشا
تسوتي شوية بصل وتزيدو مغرفة معدنوس مقطع
تزيد 2 بيضات مصموتين مقطعين
100 غ جبن
حكة تن كاملة و3بيضات نيين
مغرفة كرام فراش
وفلفل اكحل
وتدهن الصحافي البيراكس الخاصين بالفرن بالزيت
وتحط فيهم البريك وتعبيه بالحشو وطيبهم في الفرن
على 180 درجة
Pan cake au fruits
2 بيضات
1 فانيليا
3 مغارف سكر
ركض الخليط بالباهي حتى يولي كريمي
تزيدو 3 مغارف كبار مليانين فرينة مغربلة و مخلط معاها نصف كيس خميرة كيميائية
وتزيد كاس تاي متوسط حليب ونصف الكاس زيت او زبدة
تخلط الكل بالباهي
تدهن المقلة التيفال بالزيت وسخنها بالباهي وبعد تصب فيها لوش من الخليط وغطيها وبعد طيبها على الجانب الآخر
تنجم تزين الكعاب بالغلة والعسل او الشكلاطة او الكريمة باي نوع يحبوه الاولاد
الملاوي التونسي
البات شريتها حاضرة مع الخبز اليوم وممكن تصنعها في الدار
روسات البات :
2 كيسان حليب
1/2 كأس زيت نباتي
1/2 كاس ماء
2 مغارف صغار ملح
5 مغارف كبار سكر
كيلو فرينة للعجن زايد شوية او ناقص
تعجنها بالباهي وخليها ترتاح في شكل كويرات صغيرة وبعد حلها كبيرة وجويدة وطيبها في طاوة كبيرة وماتخليهاش لين تيبس فيسع اقلبها
الحشو :
هريسة وجبن وسلاطة خيار وطماطم وبصل وبطاطا مقلية وكبار وتن وكعيبتين عضم مصموتين ومقطعين جويدين وبعد لفها وحطها في مكينة البانيني
سامية
كسكسي شمسي بالسردينة
قلي بصلة وطمطومة خضراء وزيد3 مغارف ماكلة طماطم معجونة وكعبورة صغيرة طماطم شريحة
امرق وحط مغرفة ماكلة مليانة فلفل مرحي وكركم وملح وفلفل اكحل
وحط القرع و البصل صحيح وفلفل احمر شايح وسنة ثوم ، وبعد بل الكسكسي الشمسي بالزيت والماء وحط سردينة في الكسكاس وغطسها في المرق
وحطو يفور، وبعد تريه بالمرق متاعو وكيف تطيب الخضر تسقي وتزين الصحنات ، وتقلي الفلفل والسردينة وبعد زين الصحنات
