كيكة البرتقال

4 بيضات
كاس سكر
كيس فانيليا
مبشور برتقالة
تركضهم بالباهي وزيدهم
نصف كاس حليب
نصف كاس زيت نباتي
2 كيسان فرينة مغربلة
كيس خميرة قاتو
وطيبها على نار هادية
طبقة الكريم موسلين:
نصف لترحليب
2 مغارف نشاء
2 فصوص بيض
زهر وكيس فانيليا ومغرفة سكر
تخلط الكل وتطيبهم على نار هاديةوبعدما تطيب القاتو وتبرد زيدها 100 غ زبدة ( انا مانحبش برشا ممكن تزيدها حتى 350غ)وركضها وبعد صبها فوق القاتو وخليها تبرد الوقت الي تحضر فيه الطبقة الاخيرة :
نصف لتر عصير برتقال
2 مغارف نشاء
مغرفة كبيرة سكر
وتطيبهم على النار حتى تخثار
صبها على الطبقة الثانية برفق ورجعها تبرد في الثلاجة
وبعد زين بالكرام شنتي والغلة كيما تحب
وماتنساش الناباج فوق الغلة باش تحافظ على بريقها ونضارتها

 

كريمة الزبدة

تاخو 400غ زبدة وتحركها بين صوابعك حتى تولى بوماد  و في وعاء اخر 5 اصفر بيض بحرارة الغرفة
تجهز 400غ سكر مع كاس ماء وتحطهم يغليو حتى يولى عسل ويكون كعبورة بين صوابعك ما يكونش يابس برشا ولا سائل وبخرارة بين 116 و 125 درجة وبع ابدا ركض اصفر البيض وصب العسل في شكل خيط وركض يكون سالل في البداية وكلما يبرد يزيد ييبس وكيف يكمل العسل الكل يكون الخليط بارد زيد الزبدة بالشوية بالشوية حتى يتجانس الخليط الكل
ممكن تزيد الخليط شكلاكة او نسكافيه او خليه عادي وخليه يبرد في الثلاجة لحين تزيين القاتو

مقرونة بالكروفات

مقرونة بالكروفات
تصمت 8 كعبات طماطم خضراء وبعد سقطرهم وارحيهم
وقلي بصلة صغيرة في الزيت وزيدها الطماطم المرحية ومغرفة طماطم معجونة  وفوح بالثوم وشوية تابل وفلفل مرحي زيدها الملح والفلفل الاكحل والكركم  وخليها تشكشك وبعد زيدها الكروفات وخليها تغلي  حتى تخثار وتطيب
اصمت المقرونة وزين الصحنات

 

كمونية بزرزور الزيتون

تنظف الزرزور بالباهي وتحطو في الكوكوت ومعاه شوية ماء وزيت وملح وكركم وخليه يتصمط وبعد في نصف الطياب زيدو مغرفة طماطم معجونة وتابل وثوم وفلفل مرحي وفلفل أكحل وزيد سكر عليه الكوكوت مرة أخرى حتى يطيب بالباهي وتخثار الصوص زيدو رشة كمون وهبط الكمونية

أصمط البطاطا بالملح والكركم والفلفل الكحل أو اقليها واقلي قريّن فلفل وتاكلو بالشفاء

هريسة خضراء

ترحي الفلفل نيء بعدما تنحيلو الزريعة متاعو وترحي الطماطم والثوم نيين زادة وبعد تزيدهم شوية زيت وتطيبهم حتى يذبالو فوح بالملح والكروية وبعد حط في الصحنات وزيدهم قطيرة زيت جديد وتاكلو بالشفاء

 

هريسة حمراء

ترحي الفلفل الاحمر نيء بعدما تنحيلو الزريعة متاعو وترحي الطماطم والثوم نيين زادة وبعد تزيدهم شوية زيت وتطيبهم حتى يذبالو فوح بالملح والكروية  فما شكون يحب طعم الثوم نيء ينجم يزيد سنة ثوم نيئة مرحية بعدما تطيب وبعد حط في الصحنات وزيدهم قطيرة زيت جديد وتاكلو بالشفاء

مرقة صبارس

في الطنجرة نحط زيت وبصل وطمطومة خضراء ونقليهم ونزيدهم مغيرفة طماطم معجونة ونمرق ونفوح بالملح والكركم وفلفل مرحي وتابل مفوح ومغرفة هروس وراس ثوم كامل صحيح وكعبة بطاطا مقطعة ونحط الصبارس في الكسكاس ونسقطو مع المرق يغلي باش مايسيبش الشوك متاعو في المرقة ويسيب الفيحة
وكيف تطيب المرقة وتقر زيتها زيد رشة صغيرة كمون وطفي
زين الصحن بكعيبة قارص وقرين فلفل وتاكلو بالشفاء

 

قلاية قرنيط

تصمت القرنيط حتى يطيب وبعد تسقطرو وتقطعو وتحطو في طنجرة تيفال وتصب عليه زيت زيتونة وتقليه شوية وتزيدو مغرفة طماطم معجونة وترش عليها شوية ماء وتزيد كركم وملح وفلفل اكحل وفلفل مرحي وكروية وتخليه يشكشك على نار هادية
وكان تحب فقر عضيمات عربي كان ماتخبش عادي
اقلي بطاطا وفلفل ورش شوية معدنوس كيف تزين الصحنات
وتاكلو بالشفاء والهناء

مقرونة بالسكمري

قلي بصلة صغيرة وزيدهم كعبة طماطم خضراء مقشرة وكيف يتقلاو تزيدهم مغرفة كبيرة طماطم معجونة وشوية طماطم شريحة وثوم وتابل مفوح وامرق وزيد فلفل مرحي وكركم وملح وفلفل اكحل  وهروس وارمي السكمري في كسكاسو وخليها تغلي حتى تطيب وبعد اصمت المقرونة وخلطها

اقلي الفلفل واقلي شوية سكمري

سوفليه بالمرقاز

العجينة : كأس متوسط حليب دافئ وزيدو 11 غ خميرة خبز و2 مغارف  ص سكر ومغرفة ص ملح ونصف كأس زيت نباتي وبيضة ونصف كأس ماء وخلطهم بالباهي حتى يولي الخليط متجانس وبعد زيدو الفرينة شيئا فشيئا حتى تتحصلي على عجينة طرية حطها في مكان دافئ وخليها تتخمر

الصوص: تقطع رأس بصل كبير في الزيت وزيدو 3 كعبات طماطم خضراء وقليه شوية وبعد زيد المرقاز مقطع وهريسة عربي وملح وفلفل أكحل وشوية طماطم معجونة وخليها تطيب بالباهي

كيف تتخمر العجينة حلها جويدة  بالفرينة وحط عليها صوص وبيض مسلوق وجبن ومعدنوس وشوية بصل نية كان تحبوه وسكرها وانزل عليها بالفرشيطة في الاطراف وبعد أدهنها بأصفر البيض مع قطرات حليب ورش عليها سينوج وحطها تطيب في الفرن على 180 °

قاتو الدقلة بالفاكية

تأخو 4 بيضات بحرارة الغرفةوتزيدهم 4 مغارف سكر محوّر و1 فانيليا و1/2 مغرفة جيلك وتركضهم بالباهي حتى يولي الخليط كريمي ، وتكون محضرة كاس حليب  ومعاه 3 مغارف كبار دقلة مرحية  وتسخنهم بالباهي حتى تتحل الدقلة في الحليب وتبردها وبعد تزيدها للخليط مع 280غ فرينة و20 غ نشاء و1 خميرة قاتو ونصف كأس زيت نباتيوتخلط الكل بالباهي وبعد تحط في طبق الفرن وترش عليه الفاكية إلي عندك لوز أو بوفريوة أو فزدق وتحطها تطيب في الفرن على حرارة 180° وأخير وكيف تطيب خرجها وادهنها بالناباج وخليها تبرد بالباهي وبعد قصها

بولونيز

تقلي بصلة صغير واللحم المفروم وتزيدهم مغرفة طماطم معجونة ورأس ثوم وتابل مفوح وامرق وشوية فلفل مرحي وفلفل اكحل وكركم وملح ووريقات رند وخلي الصوص تغلي لين تطيب ، وبعد صفي اللحم وحدو وكيف تصمت المقرونة خلطها بالصوص وحط اللحم من فوق

أقلي قرينات فلفل وزين الصحنات وزيد رشة جبن