كوتلات مشوي ومرقاز

تفوح اللحم بالكركم والكروية والزيت والملح والفلفل الكحل وتخليه يبنان ساعة على الأقل في الثلاجة

سندس مساعد 

أرز بالشعيرية

الروز

تقلي بصلة في شوية زبدة وزيت تحط معاه رشة فنجان شاي بمقرونة شعيرية او رشتة على كاس روز وزيد كل ما تزيد في كمية الروز خليها مع البصل حتى تحمار شوية بعد زيد عليها الروز حركهم الكل بعد امرق بالماء اللازم كاس روز عليه كاس ونصف تفوحه ملح فلفل اكحل 4حبات هيل ونصف عود قرفة وخليه يغلي بعد نقص عليه وخلي حتى يشرب ماه حتى اذا ظهرلك مازال ناقص طياب تنجم تزيده شوية وما تحركوش حتى يهدى باش يبدا كعبة كعبة

سندس مساعد

مادلين

المادلان
4بيض 160غ سكر رشة ملح 220غ فرينة رشة خميرة مرطبات بشر برتقال 100غ زبدة ذايبة
تغلط الكل والزبدة تزيدها اخر حاجة وتصبها في كيس الحلواني وتدهن القالب الخاص بيها بزبدة طرية وتملاها وتحط حبة شكلاطة في كل كعبة وطيبهم خليهم يبردو ذوب شكلاطة المرطبات على حمام مريم وادهن نفس القالب بالشكلاطة الذايبة ورجع الحبات فوق الشكلاطة وخليها في الثلاجة حتى تجمد ونحيهم وعاود حتى تكمل كعباتك

سندس مساعد

بنادق باللحم

البنادق :تفوح اللحم بالكركم والفلفل اكحل ونعناع وكروية وتابل وسنة ثوم وملح وشوية فلفل مرحي وتعجنو بالباهي وتكعبرهم وبعد ترميهم في الماء الي يغلي وتزيدو زيت وكروية وتابل وملح وفلفل اكحل وتخليه يغلي حتى ينزح تماما ويقر زيتو
ممكن تعقمهم وتخليهم مدة طويلة للاستعمال في السفر

طبق كبدة مع اقراص البروكلو بالجبنة

250 غ بروكلو اصمتهم بالملح والكركم وسنة ثوم
وكيف يطيبو سقطرهم بالباهي زيدهم 70غ جبن قرويار ومغرفة كرام فراش و2 مغارف شابلور متاع خبز ومغرفة فرينة ومغرفة معدنوس جويد وملح وفلفل اكحل وبياض 2 بيضات تخلطهم بالباهي وترفسهم وتحطهم في البوش وتصنع الكعاب كيفpetit four وتطيبهم في الفرن على 180° واخيرا شعل عليه الفور من الاعلى باش يتجمرو الكعاب

تاخو رطل كبدة تنظفها بالباهي وتقطع فوقها راس بصل كبير و4 سنات ثوم وتقليهم بالباهي وبعد تزيدهم شوية ماء وكركم وملح وفلفل اكحل وزنجبيل وتخليهم يغليو وكيف قريب تنزح زيدها كروية و2 مغارف معدنوس مقطع ودوبما تشكشك واطفي عليها

شاباتي المهدية

البات :
كاس حليب وكاس ماء دافئ و 2 خميرة خبز ومغرفة ص ملح و2 مغارف ص سكر ونصف كاس زيت نباتي وكاس فرينة
خلطهم بالمكسور وتتحصل على خليط سائل وخليهم يتخمرو في مكان دافئ 20 دق
وبعد زيدهم سميد جويد حتى تتلم العجينة وخليها تزيد تتخمر حتى يتضاعف حجمها
تحل العجينة بالفرينة او الزيت كيما تحب في شكل دوائر وتحط فيها هريسة و2 جبن و2 بيض وتن وجبن موتزارلا وفوندون وشرائح وزيتون وبعد سكرها وطيبها في المقلة

كسكسي بالمرجان

نظف المرجان ونرش عليه الملح ونخليه يبنان في الثلاجة
ونحضر الصوص :
نقلي بصلة وكعيبة طماطم خضراء وبعد نزيد 3 مغارف ماكلة طماطم معجونة وكعيبرة طماطم شريحة و2 مغارف فلفل مرحي ونمرق
نحط قرع جديد وكعيبة بطاطا كان تحب وسنة ثوم و فلفل احمر شايح ونمرق ونزيد الملح والكركم والفلفل الاكحل وكيف يغلي المرق نرمي الحوت
نبل الكسكسي بشوية ماء وزيت ونحطو يفور
نتريه بعد بالمرق متاعو ونرجعو يفور
واخيرا نقلي الفلفل ونسقي الكسكسي وماتنساش رش شوية فلفل اكحل فرشك وزين الصحافي

طاجين تن بالبات

البات :
كاس صغير حليب وكاس ماء دافئ و 1خميرة خبز ومغرفة ص ملح و1 مغرفة ص سكر ونصف كاس زيت نباتي وكاس فرينة
خلطهم بالمكسور وتتحصل على خليط سائل وخليهم يتخمرو في مكان دافئ 20 دق
وبعد زيدهم الفرينة حتى تتلم العجينة وخليها تزيد تتخمر حتى يتضاعف حجمها
تحل العجينة بالفرينة في قاع المول بالقلقال تكون جويدة برشا
تحضر الخليط :
تسوتي بصل وبعد زيدو مغرفة معدنوس واقلي مكعبات صغار بطاطا وزيدهم للخليط ومغرفة كبيرة كرام فراش 200 غ تن كامل وكبار و 50غ جبن فوندون وقطع قرينات فلفل بر العبيد وعضمة مصموتة ومقطعة وشوية تابل وفلفل اكحل والملح موش لازم على خاطر عندنا برشا مملحات
فقر 4 بيضات وخلط الكل وصبو على العجينة
حل شوية من العجينة وغطي بيها الطاجين
اعمل اي شكل بالعجينة زين بيه الطاجين من فوق
وادهن باصفر البيض وقطرات حليب
رش شوية سينوج
وطيبها في الفرن على 200 °

كيكة مالحة بالشوفرات

كيكة الشيڥريت …. خذيت رطل شيفريت مقشر مع قرعة مقطعة جوييييد مع باذنجانة مقطعة جويييدة و سوتيتهم في 50 غ زبدة . حطيت معاها فلفل بر عبيد مقطع ، زيتون مقطع ، مملحات إذا تحبهم ، جبن ، 6 بيضات ، 2 كيسان حليب ، كاس زيت .
أضفت لهذا الخليط رطل فرينة و زوز خميرة مرطبات و طرحتها في الطبق ثم دهنتها من الفوق ببيضة مركضة و حطيتها في الفور ،،،،،، بالشفاء

رجاء علاية