قاتو عيد الميلاد

عملت جنواز 5 بيضات ركضتهم مع 5 مغارف سكر وقطرات فانيليا ليكيد و زدتهم 5 مغارف فرينة و مغرفة صغيرة جيلك ( و هو محسن الجنواز ) كان موش متوفر حطو شطر باكو خميرة قاطو و صبو الخليط فوق ورق الطبخ في بلاطو الفرن خشنها 1 صم و طيبتها 15 دق على 175 درجة ما لازمش تحمار لازم تخرج بيضاء و ما تتلسقش انا عملت 3 جنواز يعني الكمية هاذي في ثلاثة و قت يحضرو تسقي بالوحدة بسيرو خفيف غلي كاس سكر و 2 كيسان ماء يكون جاري و نزيدو مغرفة قهوة نيسكافي و تسقي بواسطة قرشاة او ترش رشان باش تتبل شوية و ما تكونش شايحة القاطو و تحط كريمة الزبدة بين الطبقات ( تخلط 200 غ زبدة جديدة و 2 مغارف سكر محور ة و شوية نسكافي او كاكاو و ركض مليح )و ترش لوز و بوفريوة مهروشين و في الاخر تصب قاناش شكولا( تذوب اربعة قوالب شوكولا فوق بان ماري و تزيدهم زوز مغارف كبار كرام فراش و مغرفة صغيرة زبدة و تحرك و تحاول تغلف القاطو بالشكلاطة تحط بالشوية بمغرفة حتى تتغلف الكلها و تزين بالفاكية المهروشة فستق مثلا و الفستق راهو 50 غ تكفي و كعبة كيوي تكفي و شوية كرام شانتي نحطوها في الثلاجة و نزينو اللي ما عندوش بوش يعمل فرتونة بورق الطبخ و يعبيها بالكرام شانتيي و يعمل نقبة صغيرة من اللوطة و ينزل و يحاول يكتب و الا يصور اللي يحب و هذي فرصة باش في راس العام ان شاء الله تعملو القاطو في الدار

كلثوم بالحاج