بيتزا عائلية

بيتزا خفيفة و من غير خميرة خبز تتبرمج في آخر لحظة : الطريقة كعبة ياغرت طبيعي و كعبة عظم و تقيس بالياغرتا 1/2 ياغرتا ماء بارد و 1/2 ياغرتا زيت نباتي و باكو خميرة قاطو و رشة ملح و رشة سكر و تخطهم الكل و تخليهم يتفاعلو دقيقتين ثم تصب الفرينة بالعين و تلم حتى تتحصل على عجينة لينة و تكون خضرت صالصة ( تقلي شوية بصل و كعبات طماطم و تفوحهم بالاكليل و الزعتر و ملح و شوية سكر) ثم تحل العجينة و تدخلها للفرن 10 دق و بعد تصب الصالصة فوقها و تحط الجبن موتزاريلا و تزيد تطيبها ربع ساعة ثم تخرجها و تزينها بالتن و الزيتون و رشة معدنوس

بشكوتو دياري

بشكوطو السنة و العادة
الطريقة: 4 بيضات و حكة حليب سكر و حكة حليب زيت قطانيا و 2 خميرة قاطو و 2 فانيليا و مغرفة قشور برتقال مرحي و 2 مغارف جلجلان مقلي و 1/2 مغرفة بسباس مقلي و 2 مغارف عطرشية الي ما يحبش الحلو ينجم ينقص من السكر شوية نخلطو مليح و بعد نصبو الفرينة المغربلة كيف المطر حتى تتلم العجينة ( كيلو ناقص شوية ) و نحسوها طرية موش يابسة نخدموها مليح باليد و نصنعو الكعك او نصنعو صوابع بالقمع متاع البشكوطو و نطيبوهم في الفرن مدة 30 دق على 175 درجة حتى يحمارو شوية

 

مقرونة بالدندون العربي

مقرونة بالدندون العربي
تقلي الدندون والبصل بالباهي في الزيت وبعد تزيدو طماطم معجونة وطماطم شريحة وراس ثوم مهرس و امرق وزيد تابل وكركم وفلفل اكحل وملح ووريقة رند وفلفل مرحي وخليها تغلي وكيف تطيب اصمت المقرونة وما تطيبهاش برشا وخلط واقلي معاها قريّن فلفل حار وماتنساش رشيشة جبن

فلفل محشي بالحبق

فلفل محشي بالحبق واللحم العلوش مهدوي أصيل
الحشو عادي :
لحم وبصل ومعدنوس وحبق اخضر وعضم وفرينة وتابل وشوية برغل وكركم وفلفل اكحل وملح
نحشي الفلفل ونرميه في الصوص بالجلبانة وفي نصف الطياب نرمي كعيية بطاطا
نجم نحشي الفلفل والبصل والقرع بوطزينة بالحق بنين برشا

pan-cake

e ساهل وما ياخوش برشا وقت
300غ فرينة و 1/2 كيس خميرة غربلهم
وخلّط في وعاء : 4 بيضات و125 غ سكر و كأس حليب و 1 فانيليا في المكسور
وبعد خلط الجزئين مع بعضهم وطيب في المقلة  بالطبقة بالطبقة وكل مرة ادهن المقلة بالزيت ، حط بين الطبقات كريمة من اختيارك وزين بالشكلاطة

 

باتي دياري

استعملي العجينة المورقة تشريها جاهزة أو تصنعها في المنزل
الحشو: بيض مسلوق وبطاطا مصموتة وتن وجبن وشوية عضم بحيث الخليط ما يكونش سائل
تحل العجينة وتقسمها إلى مربعات متقايسة وبعد حط الحشو وادهن الاطراف بالبيض وسكرها واصغط عليها بالفرشيطة
ادهنها من فوق بالبيض المخلط بقطيرات حليب وحبيبات نسكافيه وبعد رش السينوج
طيبها في الفرن على 170 °

طاجين الطبقات بالقرنيط

اول حاجة يكون عندك قرنيطة متوسطة او 2 صغار مصموتين وطايبين
الطبقة الاولى :
تقطع بطاطا جويدة وتقليها وتسقطرها وتزيدها شوية معدنوس وبصلة متوسطة مسوتين في مغرفة زيت و 2 عضمات مصموتين و50 غ جبن قرويار وكان عندك برموزان او اي جبن آخر موش مشكل
وتاخو 8 بيضات تنحي الابيض تحطو في صحفة وتخليه على جنب والاصفر تزيدو للخليط متاعك ثم 2 بيضات اخرين كاملين
تاخو القرنيط تقطعو جويد وتخلي صوبعات للزينة
تفوح بالملح والفلفل الاكحل وشوية بسباس مرحي
تستعمل المول متاع الشيز كايك وتحطو يطيب في الفرن الساخن وتشعل الفور من فوق باش الطبقة من فوق تشد روحها ومن الاسفل يبقى مريقل
الطبقة 2 :
تصمت نصف راس بروكلو متوسط بالملح وسنة ثوم
وكيف يطيب سقطرو بالباهي وارفسو في صحفة وزيدو مغرفة كرام فراش و50 غ جبن قرويار او شيدار وشوية ملح وفلفل اكحل وبياض العضم وتنجم تزيد شوية قوتا انا اليوم ماحطيتش الحقيقة و2 مغارف كبار شابلور متاع خبز وتخلط الكل
تخرج الطاجين من الفرن تلقاه من فوق دوبما تماسكت وشدت روحها صب عليها الخليط بالشوية بالشوية وبمغرفة موش دفعة واحدة وبعد زين من فوق بصوابع القرنيط الي عندك وزيتون او فلفل بر العبيد كيما تحب
ورجعو يطيب وشعل الفرن من الاسفل باش يطيب سلة سلة