خبزة هواء بالفراولو والرمان

خبزة هواء بالفراولو والرمان
نحضر كرام شنتي ونزيد نركضمعاها 50 غ زبدة بحرارة الغرفة ونخليها ترتاح في الثلاجة
نحضر الفراولو والرمان
نفرش في الطبق ورق بلاستيكي
نحط 1/4كمية الكرام 
ونضع في الاجناب انصاف الفراولو
ونزيد طبقة الرمان
نغطس كعاب البسكوي في الحليب
ونرصفهم
نزيد طبقة كريمة
طبقة بشكوتو وطبقة كريمة
طبقة كاكاو لنكهة الشكلاطة
طبقة كريمة
طبقة بشكوتو للتغطية الاخيرة وبعدها نلم عليها الورق ونخليها تبرد في الثلاجة
#طبخات تونسية 

تالياتلي بالدجاج وبريك

تنظف الدجاج بالقارص والخل وبعد تغسلو بالباهي وتحطو في الماء والزيت يغلي وتفوحو بالملح والأكليل والزنجبيل وكركم وفلفل أكحل وملح وكروية وتخليه يغلي لين يطيب ويقر زيتو ، أصمت  التالياتلي بالملح وبعد خرج الدجاج من الصوص وخلطها بالتالياتلي وبالنسبة للدجاج أقليه في شوية زيت حتى يتجمر وبعد زين صحنك بالفلفل والمعدنوس …

حشو البريك

تصمت بطاطا وبصل ومعدنوس وشوية من صدر الدجاج والكبدة وتفوح بالتابل والكركم والفلفل الكحل والملح وكيف يطيب ويشيح نزيدو جبن وعضم واقلي البريك  en bombon

لازانيا باللحم

.الصوص: تقلي بصلة في شوية زيت و تقلي 300 غ لحم مفروم تزيد عليهم مغرفة طماطم فلفل زينة و فلفل اكحل و كركم. الصوص بيشاميل:50غ زبدة و 50غ فارينة و نصف لتر حليب و شوية ملح.تحط فرشة لازانيا (الأوراق تصمطهم)فرشة صوص و فرشة بيشاميل.و من فوق تحط جبن و تحط في الفور تتجمر و صحة و بالشفاء

سناء الشواري

 

ميني بيتزا

العجينة :طرية برشا وممكن تستعملوها في معجنات اخرى
200 مل حليب
2 مغرفة صغيرة سكر
مغرفة صغيرة ملح
كيس خميرة خبز ( 11غ)
وتخلطهم بالباهي وخليهم يرتاحو في مكان دافئ 15 دق
وبعد زيدهم 80 مل زيت نباتي او زبدة ذائبة
وخلط
واخيرا ابدا زيد في الفرينة شيئا فشيئا حتى تتلم عجينتك
خليها تزيد تتخمر 15 دق
حضر الحشو :
قلي بصلة مقطعة جويدة وزيدها 2 كعبات طماطم و3 قرون فلفل مقطعين جويدين وفوح بالملح والفلفل الاكحل
تقسم عجينتك كويرات صغار
حل بالوحدة بالوحدة بالفرينة واضغط عليها بصحفة باش تخلى الاجناب عالين وحط فيها هريسة وبعد شوية خليط وجبن ورصف الكعب في الطبق
ادهنهم بخليط (اصفر بيض ونسكافيه وحليب )
ورش السينوج
وخليهم يرتاحو 15 دق اخرين
سخن الفرن وطيبهم على 200°
زينهم بالتن والزيتون والعضم

شربة مفورة بالدجاج

شربة مفورة بالدجاج
تبل الشربة بشوية زيت وكركم
تحضر الصوص عادية كيف الكسكسي وﻻ الروز( تقلي بصل ودجاج في الزيت وامرق وتزيد طماطم وفلفل مرحي وكركم وملح وفلفل أكحل وبسباس مرحي )
وتفورها ثم نهبطها وتريها بشوية مرق وبعدين ترجعها على النار
كيف تطيب سقيها وخلها تتشرب

ابتسام

بنادق باللحم وتشيش بالكروفات وهريسة

البنادق :تفوح اللحم بالكركم والفلفل اكحل ونعناع وكروية وتابل وسنة ثوم وملح وتعجنو بالباهي وتكعبرهم وبعد ترميهم في الماء الي يغلي وتزيدو زيت وكروية وملح وفلفل اكحل ومغرفة قهوة طماطم وتخليه يغلي حتى ينزح تماما ويقر زيتو

 الهريسة : حطيت بتصمت طماطم خضراء وراس بصل وراس ثوم وكيف يطيبو حطيت فلفل 

شايح منظف وبعد رحيت الكل وفوحت بالملح والكروية وزيت الزيتون

التشيش بالكروفات : كل شيء في الماء
كروفات وزيت وطماطم معجونة وطمطومة خضراء مقشرة وكلافس وبصل وكعيبة سفنارية جويدة وزيت وملح وفلفل اكحل وكيف يغلي ارمي تشيش عربي وخليها تغلي حتى تطيب

تشيش بالقرنيط

قلي بصلة والقرنيط وطمطومة خضراء في زيت الزيتون وتزيدهم مغرفة صغيرة طماطم خضراء وامرق وفوح بالملح والكركم وفلفل أكحل وتابل وفلفل أحمر شايح وكيف يغلي أرمي كاس تشيش وخليه يغلي على نار هادية حتى يطيب أرمي وريقة كلافس او معدنوس ( فما شكون يحبو بالكمون يرمي كعيبة ويطفي عليه النار ) انا الحقيقة مانحطش كمون على خاطر يولي قوي