سلاطة حمص

كاس كبير حمص طايب
1/2 فنجال زيت زيتونة
2 طوابع جبن
20 غ زبدة
ملح
نعناع شايح
عصير قارصة كاملة
وسنة ثوم مفرومة
ترحيه الكل في المكسور
وممكن تزيد شوية ماء متاع صمتان الحمص كان ماحبش يترحى
ممكن تعوض الجبن بالكرام فراش وزيد ملح
زين بشوية فلفل وحمص طايب ومعدنوس وتن او نشوبة

خبزة درع

خبزة الدرع بنة و خفة جربوها
حارة عضم زوزكيسان درع و كاس فرينة كاس و ربع سكر و كاس زيت و كاس حليب و باكو خميرة و باكو فنيليا و قطرات عطرشية و جلجلان و لوز مهروش تركض العضم و السكر و الفانيليا و تزيد باقي الكونات و تخلط مليح و تصب في قالب مدهون بالزيت تطيبها نصف ساعة على 180

كلثوم

فطيرة بالصوص

خليط الفطيرة : 2 مغارف معدنوس و 5 بيضات ومغرفة هريسة عربي و 3 مغارف فرينة وملح وفلفل اكحل وفلفل مرحي وراس ثوم مهرس وكروية خلطهم بالباهي واقليهم ، بالنسبة للصوص : كل شيء في الماء طماطم معجونة وبصلة صغيرة وشوية هريسة وملح وزيت وفلفل اكحل وثوم وكروية وفلفل مرحي وكركم وكيف يغلي أرمي كعيبة بطاطا وقرين فلفل أخضر وبعدين أرمي الفطيرات إلى قليتهم وخليها تشكشك لين تطيب زينها بقرينات فلفل مقلي أو بطاطا مقلية ….

 

قلاية شوباي

تصمت الشوباي حتى يطيب وبعد تسقطرو وتقطعو وتحطو في طنجرة تيفال وتصب عليه زيت زيتونة وتقليه شوية وتزيدو مغرفة طماطم معجونة وترش عليها شوية ماء وتزيد كركم وملح وفلفل اكحل وفلفل مرحي وكروية وتخليه يشكشك على نار هادية
وكان تحب فقر عضيمات عربي كان ماتحبش عادي
اقلي بطاطا وفلفل ورش شوية معدنوس كيف تزين الصحنات

خبز قمح دياري

تنظف القمح وترحيه كامل من غير ماتنحي النخالة
تدفي كاس حليب وكاس ماء ونصف كاس زيت زيتونة وملح و2 مغارف صغارسكر و22 غ خميرة خبز وتخلطهم بالباهي وتخليهم يتخمرو 15 دق
وبعد زيدهم الدقيق متاع القمح حتى تتلم العجينة وخليها تتخمر 15 دق اخرين
وبعد حل العجينة ورش عليها السينوج وخليها ترتاح 15دق اخرين وبعد طيبها في الفرن

 

معمول بالتمر

تحضر التمر وترحيه وتفوحو بالقرفة وشوش ورد وجلجلان مرحي ونصف مغرفة زبدة وتخلطو بالباهي وتعمل كعيبرات صغار
عجينة المعمول :
200 غ زبدة بحرارة الغرفة
100 غ زبدة نباتية
2 فانيليا
مغرفو سكر محور
تخلطهم الكل حتى تتحصل على خليط كريمي
تزيد 3 بيضات بالوحدة بالوحدة وتخلط
وكيف يتجانس الخليط زيدو كاس نصف سميد جويد و2 خميرة قاتو
وتواصل تخلط
وزيد الفرينة بالشوية بالشوية حتى تتلم العجينة
حطها في ساشي غذائي وخليها ترتاح 30 دق
اصنع المعمول وحطو يطيب في المكينة او اصنعو بالقالب وطيبو عادي في الفرن
انا بطبيعتي منقصة في السكر وزيد التمر حلو وممكن تزيز او تنقص السكر كيما تحب

 

بسكويت التمر

ذوب 250غ زبدة وزيدها كاس زيت زيتونة و50 مل ماءورد و2 فانيليا وتخلّطهم بالباهي مع ذرة ملح وبعد غربل 1 كغ فرينة و 2خميرة قاتو وخلطهم باش تلقي العجينة شايحة شوية زيد أعجنها بماء دافئ وخليها في ساشي غذائي ترتاح 30 دق في الثلاجة ، تعجن الدقلة بمغرفة زبدة وجلجلان وفرفة وشوش ورد وبعد أصنع الكعاب عادي مثل الصور وطيبهم في الفرن على 180° ، المهم يطيبو كيف كعك الورقة ماتحمرهمش أنا نفضلهم موش معسلين على خاطر الدقلة بطبيعتها حلوة وكان تحب تعسلهم أنت حرة