بنادق في الفرن

تفوح اللحم بالكركم والفلفل اكحل ونعناع وكروية وتابل وسنة ثوم وملح وشوية فلفل مرحي وتعجنو بالباهي وتكعبرهم وتحط في المقلة شوية زيت وتسوتيهم لين يتبدل لونهم ، وتحضر في طنجرة ماء وزيت وجلبانة ورأس بصل صغير وتخليهم يغليو لين تطيب الجلبانة وتفوح بالملح والكركم وشوية طماطم معجونة وتابل وكروية وثوم وبعد في طبق الفرن تحط حلقات طماطم وقارص وفلفل أخضر والصوص وتزيدهم كعيبات البنادق وتدخلهم يكملو يطيبو في الفرن لين يتجمر

مصلي بالسفن

تنظف السفن وتحطلو شوية ماء ودوبما يغلي ويخرج الكشاكش متاعو نحي الماء وعاود أغسلو وحطو يتصمت نصف طياب في شوية ماء نظيف ومعاه سنة ثوم وقلي بصلة صغيرة في الزيت وتزدها مغرفة قهوة طماطم معجونة وامرق شوية وتخليه يغلي وفوحو بالملح والكركم وسنة ثوم وفلفل اكحل ، وفي طبق الفرن حط حلقات طماطم خضراء وقارص والسفن تفوحو بالتابل وسنة ثوم مهرسة ويعد تصب عليه الماء متاع الصمتان وتحطو في الفرن لين يشيح ويتجمر أقليلو البطاطا او ممكن تحطها تطيب مع المرق والفلفل الاخضر ورشة معدنوس كان تحب

شيز كايك بالفراولو بدون فرن

باكو بسكوي سيدة 24 كعبة تهرسو و تلمو ب 120 غ زبدة جديدة و تحلوهم في طبق يتحل من الجنب خاص بتالتشيز كايك و تخلط 6كعبات بتي سويس طبيعي و حكة كرام فراش و زوز ساشيات كرام شانتي تركضهم و بعد ما يبردو تخلط الكل و تصبو فوق البسكوي و تحطو في الثلاجة مدة ساعتين على الأقل و في الأخير نغسلو الفراز و نشفوه و نقصوه و نغطيوها الكل بالفراز

كلثوم بالحاج

طبق فول وجلبانة

تسمط الفول والجلبيانه اتصفيهم اتبردهم انقطع عليهم بصل اخضر فلفل اخضر حار معدنوس فلفل اسود ملح جبن البرمجان كعيبات بيض اتخلطهم و تقليهم في الزيت

الشاف فرج سعيد

فريكاسي في الفرن

فريكاسي اما مش مقلي هذا في الفور 😊كيف ما تعرفو المقلي يضر بالمعدة كيف نكثرو منه 😊عحينة الفريكاسي اللي تتكون من 1 خميرة خبز ومغرفة ملح ومغرفة سكر تحلهم في كاس حليب دافي وكاس ماء دافي ومغرفتين زيت وعضمة وتلمهم بالفرينة مع 1 خميرة قطو وتعملهم فورمات فريكاسي وتدهنهم بفص العضمة وترش السينوج والجلجلان وتدلهم الفور ومن بعد ما يطيبو تشقهم وتحشيهم بالهريسة والجبن والبطاطا المصموطة والعضم الطايب والتن 😊وتاكلو بالشفا

مفيدة حمزة

قنارية محشية

ألڨنارية نحيتلها ورقها و نظفتها من الوسط ودهنتهابشوية قارص . و تنقبهم من الخلف بسكين .
الحشو : لحم مفروم و كبدة مقطعة جويييدة و برغل جويد و معدنوس و بصل تفوحهم بفلفل احمر، فلفل اكحل ، ملح ، كركم ،نعناع أخضر او شايح ، ةتلمهم بزوز عظمات .
تحشي الڨنارية و تقلي الأعلى فقط في زيت حامي .
تحضر المرق : تقلّي الزيت ، ترمي فيه الجلبانة و الطماطم يتقلاو شوية و تفوح بفلفل احمر و فلفل اكحل و كركم ، تمرق بالماء و كيف يقيم الغلو ترمي الڨنارية و تخليها تغلي لين قريب تطيب تحط الملح باش الجلبانة ما تحصرمش . ( اني رميت مع الڨنارية المعاصم متاحها بعد ما نظفتهم بنان برشا )

رجاء علاية 

غريبة فرينة

كيلة ناقصة زبدة ذايبة وكمّلها بالسمن كيلة سكر محوّر
أبيض عضمة. اخدمهم بايدك حتى نصف ساعة تقريبا. ثم زيدهم ثلاثة كيلات فرينة
و une pincée de levure chimique
ثم خلّطهم مليح مليح وارحيهم بالرحاة اللحم ثم أعمل. كعابر وحطهم في الفور وتاكل بالشفاء

Kasoum Baraket‎

مرقة جلبانة وقنارية بالعلوش

انقليو البصل في الزيت مع اللحم وانضيف الطماطم والفلفل الحار بعد ما يتقلاو نمرقوها بالماء الساخن
نصف الطبخ انضيف الخضار » القنارية والجلبانة  » مع شويه ثوم ومقدنوس والملح

فرج سعيد

فراولو للديسير

تحضر قاطو جنواز ب 5ببضات و 5مغرف سكر و5مغارف فرينة و باكو فانيليا و تطيبها فوق ورق الطهي و تحضر كريم باتيسيار و الا كرام شانتيي كيف ما تحب و تقص القاطو حسب اكواب التقديم و تحط ااقاطو في القاع و تنجم تسقيه بشوية عصير و تصفف الفراز على الاجناب و تصب الكريمة مع شوية فراز مقطعة و بعد تغطي من الفوق بقطعة قاطو اخرى و تزين بتاكرام شانتيي و تحطها في الثلاجة تبرد قبل التقديم و الي ما يحبش يحضر الجنواز ينجم يستعمل أي نوع متاع بسكوى

كلثوم بالحاج

المخارق

250 غرام سميد ارطب – 250 غ فرينة بيضة واحدة – فنجان صغير زبدة ذايبة شوية ملح و باكو خميرة خبز باكو فانيليا و ماء دافيء تخلط المكونات تتحصل على عجينة طرية تخليها تخمر ساعتين و بعد تدهن طبق بالزيت و تعمل صوابع قد كعبة المرقاز و تنقبها ثلاث نقبات و تقلي في زيت غارق على نار متوسطة و تخليها تطيب حتى تحمار لونها و تخرجها طول وسط الشحور يكون حضرتو و برد ترميهم سخونين و تخرجهم في كسكاس يستقطرو .الشحور 2 كيسان سكر عليهم كاس ماء و تخليه يغلي و بعد تعصر شطر ليمونة و ترمي فيه عود قرفة يغلي و وقت يعمل فقاقيع و يخثار تطفي

كلثوم بالحاج