مقرونة زعرة بالدجاج
تحط شوية زيت وبصلة صغيرة ومكعبات الاسكالوب وتقليهم شوية وتمرق بفنجال ماء تقريبا وتفوح بالملح والكركم وفلفل اكحل وزنجبيل مرحي وشوية بسباس مرحي وكيف تختار الصوص زيدها حكة كرام فراش و100 غ جبن وخلطها وتكون صمطت المقرونة وماتخليهاش تتعجن الدنتي وخلط الكل وبعد حط في الصحنات وزين بالزيتون والجبن والمعدنوس
هذه مقرونة من غير ثوم خفيفة لليل وممكن تزيدعا شمبينيون كان تحب
مصلي باللمبوكة
تقطع بصلة وتقليها في شوية زيت وبعد تمرقها بكأس ماء وتخليها تغلي وتزيدها 2 سنات ثوم ونصف مغرفة قهوة طماطم معجونة وتابل مفوح ، وفي طبق الفرن تحط حلقات طماطم خضراء وبطاطا وفلفل وقارص والحوت من فوق وبعد تصب الصوص الطايبة وتحطو في الفور تشعل عليه من الأسفل والاعلى باش يتجمر وينزح وكيف يطيب رش عليه المعدنوس وتأكلو بالشفاء
Purè
تصمت 3 كعبات بطاطا بشوية ملح
وكيف يطيبو ارفسهم وزيدهم 30 غ زبدة ومغرفة زيت زيتونة و 1/2 فنجال حليب اي تقريبا 70 مل وارفسها بالباهي حتى تولى رطبة حطها في صحن وزينها كيما تحب بالمعدنوس والتن والعضم والزيتون وفلفل بر العبيد …
سابليه للعيد 
❤
💘
300 غ زبدة و 100 غ زبدة نباتية وكاس سكر محور و2 فانيليا تخلطهم حتى تتحصلي على خليط كريمي
تزيدهم كاس نشاء و4 بيضات وخلط بالباهي
غربل 3 خميرة وزيدهم كاس الا ربع حليب وقطيرة عطرشاء وخلط بالباهي المهم يكون عندك خليط كريمي ارطب
واخيرا زيد الخميرة والفرينة مغربلين تقريبا كغ ونصف وخليهاترتاح وبعد حلها كما هو في الصور وطيبها في الفرن على 180 °
ذوب رطل شكلاطة مع 30 غ زبدة ومغرفة كرام فراش في حمام مائي وكيف يطيب ادهن الكعبة بمعجون المشمش ورش علي شطرو جوز الهند والشطر الاخر تحط في الشطرات المغطسين في الشكلاطة والشايحين
وزيدهم كعيبرة شكلاطة للزينة وتاكلو بالشفاء
كسكسي شمسي بالجغالي اكلة مهدوية مميزة
تقلي الفلفل وتخرجو من الزيت
ترمي بصلة مقطعة جويدة وكعبة طماطم خضراء وبعد شوية تزيدهم 2 مغارف كبار طماطم معجونة وشوية طماطم شريحة وتمرق وتفوح بالملح والكركم والفلفل مرحي وبعد تزيد القرع وبصل صحيح وتخليه يغلي
تبل الكسكسي بالزيت والماء وتحطو يفور
تقشر الحوت وترش عليه شوية ملح وفي نصف الطياب اغسلو وارميه يغلي في المرق
تري الكسكسي بالمرق ورجعو يفور
وكيف يطيب سقيه وتاكلو بالشفاء
دجاج مشوي
تصمت الدجاج في الماء وشوية زيت وتفوحو بالملح والكركم وفلفل اكحل واكليل وعتر وشوية زنجبيل وتغليه حتي يطيب
تخرجو من صوصو وتفوحو بشوية اكليل فرشكة ورشة كروية وتدهن المقلة بالزيت وخليها على نار هادية حتى يتجمر ولونو يولي ذهبي
الصوص الباقية كيلها قداش من كاس ونصف الكمية عبيها بالارز مثال :
2 كيسان صوص وكاس ارز وغطيهه ومن الاحسن في التيفال او السيراميك باش يطيب من غير ما يلصق
وبعد زين الصحنات بالمعدنوس والقارص
باتي دياري
بالنسبة للبات شريتها حاضرة من عند patisserie
الحشو : تسوتي بصلة صغيرة في قطرات زيت وبعد تقلي مكعبات بطاطا صغار وتزيدهم عضمة مصموتة قطعها جويدة و100 غ جبن قرويار 2 جبن مثلثات وبيضة كاملة وخلط الكل بالباهي
حل البات تقريبا 3 مم واقسمها مربعات 8صم /8صم وحط الحشو وبعد اطويها
ادهنها باصفر البيض
رش سينوج
وطيبها في الفرن على 180 °
وفي الاخير شعل عليها الفور من الاعلى باش تتجمر وتجيك مزيانة
