مرقة لحم باللوبيا

قلي اللحم و3 رؤوس بصل بالباهي وبعد تزيدهم مغرفة طماطم معجونة وملح وامرق وتفوح بالتابل والكركم وشوية فلفل مرحي وتسكر عليها الكوكوت لين يطيب اللحم ، تزيد قرين فلفل أخضر وتخليها تشكشك لين تقر زيتها

تبل الوبيا من الاحسن في ماء ماجل أو صافية وبعد تصمتها وكيف تطيب تزيدها الملح والكركم

تحط المرقة في الصحنات وترش عليها اللوبيا الجاهزة وتزين بالبطاطا المقلية والفلفل كان تحب

أنازدت بروكلو مقلي وهذه طريقته :

تصمت البروكلو في الماء ووريقة رند وملح وسنة ثوم لين يطيب وبعد تسقطرو وتفو في العضم وبعد الفرينة واقليه على نار هادية

سلاطة مشوية بالفلفل الأحمر

شويت الفلفل والطماطم والثوم فوق المشوى على الغازوبعد قشرتها ورحيتها وفوحتها بالملح والكروية والزيت

أرز بالشوفرات والمول

نظف الشوفرات والرؤوس متاعها تغسلهم بالباهي وتصمتهم والماء متاعهم ماتلوحوش
في طنحرة تيفال او سيراميك
تقلي بصلة وتزيدها 2كعبات طماطم مقطعين
وقليهم بالباهي وبعد حط معاهم كعيبات المول وكيف يتحلو زيدهم مغرفة طماطم معجونة وسنة ثوم وفوح بالملح والكركم وفلفل اكحل وصب كاس ارز و 2 كيسان ماء متاع الشوفرات وكملهم بالماء العادي زيد شوية فلفل مرحي
وخليه يغلي على نار هادية وكيف يشيح اطفي عليه وخلى السخانة ترجع ويطيب الارز

ممكن تخرج كعيبات المول قبل الأرز باش تبقى فيهم الصوص وتأكلو بالشفاء

لحمة تن

لحمة داندون تشقها برشا مرات في الوسط اما من غير ما تقصها يعني ما تقصش للاخر وتفوح بالفلفل اكحل وملح وكركب واكليل وزعتر مرحي وتحط في كل شق شوية طماطم واللي تحب سبناخ وموتزارلا وتلفها في ورقة الطبخ وتحطها في الفور علي درجة 200 مدة نصف ساعة

مفيدة حمزة

شكشوكة صيافي

شكشوكه صيفيه
انقطعوا البطاطه حجم صغير وجويده القرع في شكل دائري جويد
انسخن الزيت نضع أولا البطاطه تتحمر بعد انضيف القرع والفلفل الحار أخضر بعد القلي انضيف الطماطم الطازجه مقطعه والثوم وقليل من الماء والملح وقت تقرب اطيب انضيف البيض وانغطيها باش البيض اجينا مروب بالبخار

فرج سعيد

صحين مرهوج بالسوبيا

تصمت السوبيا في الماء و تقلي رطل طماطم خضراء في الزيت مليح مع شطر راس ثوم مقشر و مفروم و تزيد مغرفة طماطم معجون و شوية هريسة عربي و تمرق بشوية ماء من متاع السوبيا و تفوح ملح و تابل و كروية و تقلي بطاطا وحدها و تقلي قرون فلفل و ترمي السوبيا مسقطرة و مقصوصة جويدة في الصوص تغلي ربع ساعة و فقص كعبات عضم كيف العجة و ترمي الفىفل المقلي في الصوص و تطفي و تحط البطاطا المقلية في الاخر

كلثوم بالحاج

مقرونة بستيك ديك رومي وصلصة بيضة ومشروم وسلطة تونسية

قصيت لحم فخض الداندون فوحته ملح فلفل اكحل وفلفل احمر وموتارد بعد في قلاية كبيرة شويته في ملعقة كبيرة زبدة وشوية ويت في نصف الطياب زدته بصلة صغيرة مقطعة جيد بعد قصيت الفطر الطازج تنجم تعوضه بالمصبر وتبقى تحرك حتى الحم يكمل يطيب ونزيده كرام فراش (قشدة طازجة ) ملعقتين جبن ابيض ونحرك الكل بعد نحط عليه المقرونة النوع الي تحب مش شرط نوع محدد بعد طبعا نكون طيبتها في الماء نصف طياب

سندس مساعد

طماطم شريحة

هذه الطماطم شريحة (شايحة في الشمس)منغير مصبرات عولة عام كامل 🤗🤗😃😄تغسل الطماطم وتحلها في اثنين وتحط فوقها الملح وترصفها فوق كرتون أو اي شيء آخر وتحطها في الشمس مدة 3او 4ايام ثم تغسلها باش ينقص الملح والغبرة وتزيد تشيحها نهار كامل وترحيها وتحط فوقها شوية زيت وصحة وبالشفاء

فتحية النمري

ساليه منوع

ميني باتي: تاخذ عجينة مورقةتحلها و تعمل دائرات صغار و تحط شوية حشو ( معدنوس و بصل مذبلين و جبن رابي و عضم طايب رابي شوية تن و الا شوفرات تحط الي عندك و الا دجاج طايب و تخلط بأبيض عضمة و الاصفر تدهن بيه الكعبات من الفوق مع شوية سينوج و يطيبو 20 دقيقة حط الخليط فوق الدائرة و غطيه بدائرة اخرى
الميني بيزا: تعجن عجينة عادية رطل فرينة عليه باكو خميرة خبز و شويةملح و شوية سكر و ثلاثة مغارف زيت و تلم بالماء الدافي و تحلها رهيفة بعد ما تخمر و تقصها بقالب السابلي المتوسط و تحطلها الصوص بالشوية و تطيبها ربع ساعة و تزيدها الجبن في الاخر و بعد تخرجها و تحط الزيتون و التن
السالي الي بالقالب تحضر خليط كيف الطاجين بعد ما تطيب الدجاج ترحيه في الميكسور مع شوية زيتون و كبار و معدنوس و تزيدو العضم الني و الجبن و تعبي القوالب السيليكون و تطيبو ربع ساعة على 170درجة و تزينو بالجبن و الزيتون و تنجم تتفنن في الزينة حط شوفرات و الا قطانيا و الا زيتون و تستعمل البروشات الصغار فيهم برشا انواع و اشكال حلوين للتقديم

كلثوم بالحاج

مرقة كالمار محشي

الصوص : ماء وزيت وطماطم معجونة وبسباس مرحي وكركم وملح وفلفل اكحل وفلفل مرحي وكيف يغلي أرمي كعب الكالمار والبطاطا وخلي يغلي لين يقر زيتو

الحشو :الشوش متاع الكالمار أصمتهم وزيدهم بصل ومعدنوس وبرغل وبسباس مرحي وكركم وملح وفلفل مرحي وبعد شق كعبة الكالمار من الأسفل واحشيهم وبعد ارميهم في الصوص إلى تغلي

مدلين لفطور الصباح

تركض 4بيضات و كاس سكر و تزيد50غ زبدة ذايبة و الا شطر كاس زيت نباتي و كعبة ياغرت نكهة الليمون و تبشر شوية زاست متاع ليمونة فرشكة و تزيد 2كيسان فرينة و باكو خميرة قاطو و تخلط الكل كان تحسو جاري تنجم تزبد شوية فرينة و تعبي القوالب الصغار متاع السيليكون و تطيبهم من ربع ساعة إلى20 دق على 170درجة تنجم تحط حبيبات الشكلاطة و تنجم تعوض الليمون بقشور برتقال و الا سكر فانيلبا فوح بالي تحب و الحاجة الباهية انهم فيسع يطيبو موش كيف الكايكة.

كلثوم بالحاج

أرز بالعلوش

أرز بلحم العلوش
تحضير الصلصه
نضع الزيت اللحم طماطم معلبه كركم فلفل اسود فلفل حار ثوم شويه ماء وبعض من أوراق الرند انقليوهم شويه بعد انضيف الماء الساخن نصف الطبخ لما اللحم يصبح طرى انضيف الخضار
تحضير الأرز
انسخن قليل من الزيت انضيف الأرز ونخلطه فورا حتي يدهن كل حبات الأرز بالزيت بعد انضيف الماء الساخن 
نطبخ نصف الطبخ
طريقة التحضير
بعد أن تطبخ الصلصة يجب أن لا تكون عاقده نخرج الخضار واللحم ونضع الأرز في الصلصة ليكمل الطهي
نضع الخضار واللحم في طبق الفرن ونضع فوقها الأرز وندخله إلي الفرن لبعض الوقت

فرج سعيد