مقرونة بغلال البحر

حط في المقلة
راس بصل مفروم وزيت و3 كعبات طماطم مقطعين وتحركهم شوية وبعد تحط المول يكون منظف وتحرك شوية وتخليه يشكشك توا تتحل كعاب المول بالكعبة بالكعبة حتى يتحلو الكل زيدهم مغرفة كبيرة طماطم معجونة وراس ثوم مفروم وشوية هروس باش نفلفلوها والقرنيط والشوباي وامرق وزيد ملح وفلفل اكحل وكركم وشوية فلفل مرحي وخليها تغلي وكيف قريب تطيب زيد الكروفات وخليها لين تقر زيتها قطع وريقات حبق وبين صوابعك كمون واطفي وغطيها
اصمت المقرونة عادي وبعد نحي المول والقرنيط والكروفات وحدهم وخلط المقرونة بالصوص وزين بالباقي

خبز دياري

كيلو فرينة (مخلط شطر سميدة جويدة و شطر فرينة) 1خميرة ،مغرفة سكر،نصف كاس زيت ،بسباس و سينوج ما ء دافئ ، 2مغارف صغار ملح
تحط الخميرة في كاس ماء و مغرفة سكر و تخليهم يرتاحو 10دق و بعد تصبهم على الفرينة و تزيد الزيت والملح و و السينوج والبسباس و تزيد ماء دافىء و تعجن مليح لين تتحصل على عجينة لينة تخليها ترتاح ساعة و تفورم الخبزات و تخليهم يرتاحو 15دق و بعد تطيبهم في الفرن

نزهة

 

خبزة ياغورت بالكاكاو

اول حاجة الكيل هو حكة الياغورط نفرغوها ونكيلو بيها هي السكر والفارينة والزيت
4عضمات
وحدة يوغرط
شطر حكة زيت والا زبدة
حكة وشطر سكر
ثلاثة حكك فارينة
وحدة خميرةوحدة فانيليا
ركض السوائل مع بعضها بعد زيدهم الفارينة والخميرة مغربلين
نحي شوية من الخليط زيدو مغرفتين كاكاو مغرفتين حليب .
تدهن الطبق بالزبدة والفارينة وتصب شطر الخليط الابيض بعد صب خليط الكاكاو وفي الاخر الابيض حرك شوية بالفرشيطة ودخلها طيب 40دق على180 درجة
الزينة خذيت 100غ شكلاطة ذوبتها مع مغرفتين كرام فراش وصبيتها فوق القاتو .
تنجم تزين بالسكر محور او فاكية كل واحد شنوة يحب

ابتسام

سلاطة بيض

بيض مصموت و طماطم فرشكة احفرها في الوسط وتحضر سلطة تختارينها أو خس أو جرجير للزينة ، تحضر المايونيز بالبيض وتكون عاقدة عصر شطر كعبة قارص وتزيدها ملح وفلفل اكحل وتخلطهم بالباهي تاخو 3 فصوص بيض بحرارة الغرفة و200 مل زيت ذرة وتبقى تركض على سرعة كبيرة وفي نفس الوقت تصب الزيت في شكل خيط حتى يولي الخليط كريمي عاقد زيدها خليط القارص ومغرفة موتارد وبعد احفظها في وعاء مغطي في الثلاجة ، وزين كعاب الطماطم كيما الصور

حلقات الفلفل المحشي

تصمت بطاطا ومن بعد تزيدها بصل ومعدنوس وقت الي تطيب وترفسها بالفرشيطة كيف البوري وتزيدها ملح وفلفل أكحل وكركم وجبن مرحي وتن ومكعبات الموتزارلا ولمها بالعضم وقص الفلفل حلقات واشويهم في الزبدة وبعد زيد الحشو في الوسط وتنجم تعملو مقلي زادة

بالنسبة للصوص : قليت طماطم كعب مع سنون ثوم وزدت مغرفة صغيرة طماطم معجونة وشوية ماء وملح وكروية وفلفل مقطع وكيف تطيب زيد بطاطا وبيتنجال وعضم مقلين

درصاف البحري

لبلابي بالهرقمة والتن

تصمت الحمص بالماء الحلو ( ماء ماجل ) بالباهي باش يطيب أو حطو في الكوكوت ومعاه طرف من هرقمة البقري

وزيدو شوية ملح ، وبالنسبة للعضم : غلي الماء وأطفي عليه وبعد حط فيه العضم وخليه 3 دق وخرجو باش يبقى مروب بالصفة هذيكا

فركّ الخبزجويّد  ويكون بارد موش فرشك

وفي صحفة حط الخبز وفوقو الحمص الطايب بالماء متاعو وزيد هريسة عربي وعضم وتن وكمون وزيت زيتونة جديد كان عندك وقطيرة خل أو قارص انت وشنوة تحب وكعيبة زيتون وكبار

خلط الكل ب 2 مغارف وكول بالشفاء

 

تيراميسو

 

أنا استعملت المسكربون فيلادلفيا كرام شنتي خلطهم وزدهم مغرفة سكر محور ، ركضت الكرام شنتي وبعد زدتها الأخرين وحضّرت قهوة قوية ترضف البسكوي وتدهنو بالقهوة من غير ما تغطس الكعاب باش تبقى الكعبة شادة روحها وبعد تحط الكرام وتكمل الطبقات وفي الاخير رش كاكاو وإلا قهوة

بالنسبة للكرام تنجم تعوض بالفريدو والكرام فراش

ابتسام

خبزة هواء بالفاكية والموز

نحضر كريم شنتي وقهوة فيلتر و3 بشكوتو سيدة
و1 بشكوتو مدور
تذوب 200غ زبدة وتخلطها مع 300غ شامية تولي كيف الكريمة
تذوب 200غ شكلاطة و2 مغارف حليب و50غ زبدة في حمام مائي
ترحي 150 غ لوز مقلي
تقص 2 موزات حلقات
تبل البشكوتو في القهوة وترصف وبعد تصبى خليط الشامية وبعد حلقات الموز
طبقة 2 من البشكوتو المغطس في القهوة وبعد شكلاطة وموز ولوز
طبقة 3 من البشكوتو المغطس في القهوة وبعد كريمة الشامية ثم موز
واخيرا طبقة 4 من البشكوتو وفوقها شكلاطة ذايبة واخيرا زين كيما تحب
بالنسبة لعدد الطبقات ونوعية الحشو اختياري
هذه الخبزة تقليدية و بنينة برشاا