عجة بغلال البحر

تنظف الكروفات والمول والشوباي والكالمار ، وبعد في الطنجرة تحط زيت و3 كعبات طماطم خضراء تسوتيهم وتزيدهم الكروفات والشوباي مقطع مع الكالمار – يكون غطستهم مسبقا في الماء المغلى – وبعد زيد مغرفة صغيرة هريسة وارمي المول وفوح بالملح والفلفل الأكحل وشوية كركم وفلفل مرحي وغطي وخليها تشكشك لين تطيب كان تحب فقر العضم كان ماتحبش زيدها رشة معدنوس وتأكلو بالشفاء

قاتو بالفاكية

عملت جينواز فاني وجينواز شكلاطة بالنسبة للجينواز فاني تركض أربعة عضمات مع باكو فاني وخمسة مغارف سكر ومغرفة صغيرة جيلك تركضهم مليح ثم تزيدهم خمسة مغارف فرينة مغربلين وتحطها في الصينية في الفور وتحضر الجينواز الشكلاطة وهي نفس طريقة الجينواز الأولي اما تعوض زوز مغارف فرينة بزوز مغارف كاكاو ومن بعد تحضر كريمة الزبدة 300غ زبدة طرية تركضها مليح ومن بعد تزيدها 200غ سكر محور وحكة نستلي ومغرفة نسكافيه محلولة في شوية ماء وتركض كرام شانتي وحدها وتقسمها في اثنين النصف تزيده لكريمة الزبدة والنصف الاخر تخليه ابيض وتقسم كل جينواز علي اثنين وتاخذ نصف جينواز فاني وتسقيها بشحور خفيف وتحط كريمة الزبدة وتستويها ثم تحط نصف جينواز الشكلاطة وتسقيها وتحط كريمة الزبدة ومن بعد تكمل تحط جينواز الفاني وتسقيها وتحط كريمة الزبدة ومن بعد تكمل تحط جينواز الشكلاطة وتسقيها وتغلف القاطو بكلها بكرام شانتي وتذوب الشكلاطة مع شوية زبدة وتصبها من فوق وتزين بلوز إيفيلى وترش في الأجناب بالفستق

 مفيدة حمزة

كسكسي رأس السنة الهجرية

اصمت الفول وحدو بالقارص وقت إلى يطيب زللو زيدو ملح وفلفل أكحل وكركم
تصمت الحمص وحدو وقت إلى يطيب زيدو ملح وفلفل أكحل وكركم
بل الزبيب بالماء الساخن وبعد خلطو مع الحمص الطايب
أصمت العضم بكعيبة ملح باش يتقشر فيسع
أقلي قرينات فلفل اخضرلعشاق الفلفل المقلي
صوص الكسكسي :
طماطم معجونة وزيت وكركم وفلفل اكحل وفلفل مرحيو بصلة صغيرة قطعها جويدة وقديد :عصبان ومرقاز ولحم ( أغسلو كان القديد متاعك مالح )
ماتحطش ملح في الصوص
وتزيد طمطومة خضراء
قريّن فلفل أحمر
في المهدية يرميو وريقة سلق باش العام يجي أخضر أما في المناطق الاخرى بلاش على خاطر يطيبوه ليلة رأس السنة
سقي الكسكسي
وزينو
تاكلو بالشفاء والهناء

عين سبنيورية دون فرن

تحضّركمية من اللحم المفروم والبيض المسلوق ،نضع عليه الملح والفلفل الاكحل  ووالنعناع والثوم والتابل ، ثم كريات صغيرة فى حجم متوسّط ، ثم تلف البيضة باللحم ونقليها فى الزيتوتسقطرها بالباهي وبعد تقصها بسكين حاد

دجاج مجمر وتارت

العجينة : 300 غ فرينة ونصف باكو خميرة وعضمة و 150 غ زبدة وملح وتعجنها بالحليب
وتطيبها نصف طياب
الخليط :
دجاج وبيض مسلوق ونيء وجبن وبصل وشوية معدنوس  
تطيب الدجاج والبصل وشوية معدنوس وتفوح بالتابل والكرويةوالاكليل والملح والفلفل الاكحل حتى ينزح من ماه وبعد نزيد الجبن والعضم المصموت وتصب الخليط في التارت وتطيبها في الفرن

اعمل خليط في كاس متكون من : اكليل وزعتر وكروية وفلفل اكحل وكركم وملح وزيت وقارص وخلطهم بالباهي وصبهم على الدجاج ومعاهم 2 كيسان ماء وزيت وحطهم يغليو حتى ينزحو حطهم في الفور يتجمرو

أعمل السفافد متاع البطاطا والفلفل والقرع المقلي وزين الصحانات وتأكل بالشفاء

 

مقرونة بكعابر اللحم

كعابر اللحم المفروم: تفوح اللحم بالملح والكركم وتابل وكروية وسنينة ثوم وشوية نعناع شايحوشوية فلفل مرحي وكعبرهم ثم ارميهم في المرق إلى يغلي

الصالصة :ترمي كل شيء في الماء و الزيت و تحط 3 مغارف ماكلة طماطم معجونة و نفوحو ملح و فلفل اكحل و كركم و

تابل و كروية و راس ثوم مفروم و  شوية فلفل مرحي وكيف يغلي الماء ترمي الكعابر  تخليه يغلي و  تحط ورقتين رند على نار ضعيفة حتى  يطلع زيتها

ابتسام

أرز بلحم العلوش والفاكية

طيب أرز أزعر عادي باللحم : تقلي اللحم والبصل وامرق وتزيدو كركم وفلفل اكحل وملح وشوية زعفران ووريقة زند وحط الارز يفور فوقو بعد ما تريه بالزيت والكركم  والماء المغلى وكيف يطيب اللحم سقيه بالمرق متاعو ، وبالنسبة للفاكية أقليها شوية في الفور وبعد خرجها تبرد شوية وارميه تتقلي في الزبدة حتى تنضاج بالباهي وكان تحب خلط الفاكية مع اللحم وتزين الأرز وكان عندك برشا خلطها مع الارز وبعد زيد رش على اللحم وماتنساش الزبيب تكون بليتو في الماء الساخن وصبيت عليه شوية مرق أزعر باش يبنان وزيد رشو من فوق، فما شكون يصمط معاه عضيمات عربي وبعد زين الصحنات كيما تحب 

أرز بالدجاج

تقلي الدجاج وبصلة وبعد تزيد طماطم خضراء وطماطم معجونة  وتمرق وتزيد بسباس مرحي وفلفل اكحل وكركم وملح وفلفل مرحي
وكيف يغلي المرق أرمي الحمص طايب وسفناريا  كان تحب كعيبة بطاطا ولو أنها تمصت الأرز
تبل الارزبشوية زيت وكركم وماء يغلي وتحطو يفور
وفي التوفيرة الثانية تريه بالمرق ورجعو يفور
كيف يطيب سقي وأقلي الفلفل

محمّص باللمبوكة

تقلي بصلة في زيت الزيتونة وتزيدها كعيبة طماطم خضراء وبعد مغرفة طماطم معجونة وشوية طماطم شريحة وتمرق وتزيد الملح والفلفل الاكحل والكركم وشوية فلفل مرحي وترمي قطيعات اللمبوكة يغليو وبعد خرجهم وارمي المحمّص وكيف يطيب أقلي قرينات فلفل وقطيعات لمبوكة عدي بيهم وتأكلو بالشفاء